Read Kaqchikel Ez 47 Bible Online

Ez 47 - Kaqchikel bible

Ez 47

¹Ri achin ri xuk'ut ri rachoch ri Dios chinuwech xuben chuwe richin xitzolin chik ri pan okibel ri k'o chunaqaj ri rachoch ri Dios. Jari' toq xintz'et chi ri chuxe-qa ri ruchi-jay nibulbu'x-pe ya' ri nel-pe re kere' pa relebel-q'ij. Ri ya' niqaqa-pe pa rijkiq'a' ri rachoch ri Dios y pa xokon chire ri porobel.

²Xeri' ri achin xuben chuwe richin xinel-el chiri' chuwa-jay pan okibel ri k'o pa xaman y xuben chuwe richin xinpiskolij-el-wi' chirij ri tz'aq richin yinapon pan okibel ri k'o pa relebel-q'ij. Y ri raqen-ya' ri' nibulbu'x xel-pe chuxe' ri tz'aq pa rijkiq'a' ri okibel.

³Ri achin ri' k'o k'a jun k'an pa ruq'a', y xbiyin-qa pa xulan chuchi' ri raqen-ya'. Y toq xbiyin 299 jaj rik'in ka'i' q'a'aj, xuben chuwe richin xinq'axaj ri raqen-ya'. Y ri ya' ri' chuqul-waqen xapon-wi-q'anej.

⁴Chirij ri' xbiyin chik qa 299 jaj rik'in ka'i' q'a'aj y xuben chuwe richin xinq'axaj chik ri ya' ri'. Y xapon-q'anej chuwa-nuch'ek. Xbiyin chik qa 299 jaj rik'in ka'i' q'a'aj y xuben chik chuwe richin xinq'axaj chik ri ya'. Y xapon-q'anej xenupan.

⁵Xbiyin chik qa 299 jaj rik'in ka'i' q'a'aj y ri raqen-ya' xa kan man yitikir ta chik ninq'axaj, roma ri ya' ri' xa kan janila xnimer rupan. Xa kan xaxe k'a yimuxan ri yitikir ninq'axaj.

⁶K'ari' xubij chuwe chi kan tintz'eta' jebel. Y chirij ri' xuben chuwe richin xitzolej chik chuchi' ri raqen-ya' ri'.

⁷Y xintz'et chi, chi e ka'i' ruchi' ri raqen-ya' ek'o janila che'.

⁸K'ari' ri achin xubij chuwe: Re ya' re' nibiyin-qa pa relebel-q'ij y napon k'a pa raqen-ya' Jordán. K'ari' nok-apo chupan ri Tzayi-Choy. Y toq napon-qa chiri', ri ya' ri k'o chupan ri Tzayi-Choy kan nok k'a ki'.

⁹Xabakuchi napon-wi ri raqen-ya' ri' kan xkek'ase' k'a jalajoj ruwech chikopi' e richin ya' y janila ker, roma ri ya' richin ri raqen-ya' ri nel-pe pa rachoch ri Dios kan nuben chire ri ya' k'ey chi nok choj ya'.

¹⁰Kan k'a pan En-gadi ri k'o pa xaman, k'a pan En-eglaim ri k'o pa xokon chire ri Tzayi-Choy, xkek'oje' ri e chapoy taq ker y chiri' k'a xtikisa-wi ri kiya'l richin nikichop ker. Y ri ker ri ek'o chiri' kan pa ruk'iyal ri xkek'oje', y kan jalajoj k'a ri ker achi'el ri ek'o chupan ri palou.

¹¹Jak'a akuchi ri niq'ate-wi rubey ri ya' y ri ch'abeq xa kan jantape' tzey, richin chi chiri' nel-wi-pe ri atz'an.

¹²Y chi e ka'i' ruchi' ri raqen-ya' ri' xkebek'iy-pe jalajoj kiwech che'. Y ri che' ri' kan xkewachin y e tijel ri ruwech. Ri kixaq man jun bey xketzaq-el y jantape' yewachin. Ik'-ik' yechaq'aj kiwech ri che' ri', roma ri niya'an richin ja ri ya' ri nel-pe pa rachoch ri Dios. Y ri ruwech kan richin yetij y ri kixaq ri che' ri' kan xtik'atzin richin aq'om, xcha' ri achin ri'.

¹³Chirij re' ri Jehová xubij: Toq rix israelita xtich'er ri ruwach'ulew richin niwichinaj, k'o chi nich'er chiwech ri ruwach'ulew pa kablajuj tzobaj, achi'el ri kajlabal ri e rijatzul kan ri Israel. Y ri e rijatzul kan ri José, xtikichinaj kan ka'i' mul chikiwech ri ch'aqa' kach'alal. Y yin xtinbij chiwe ri akuchi ek'o-wi ri kik'ulba't.

¹⁴Yin xinya' nutzij richin xinya' re ruwach'ulew re' chike ri iwati't-imama' y roma ri' kan xtich'er k'a junan chiwech richin xtiwichinaj.

¹⁵Y jare' k'a ruk'ulba't ri ruwach'ulew ri k'o pa xaman. Nitiker-pe rik'in ri palou y niq'ax-pe kere' pa relebel-q'ij chunaqaj ri tinamit Hetlón y nibe kela' pa tinamit Sedad.

¹⁶Choj nibe rik'in ri tinamit Berotá, ri Sibraim ri k'o pa ruwach'ulew Damasco y napon k'a pa tinamit Hamat. Napon pa tinamit Hasar-haticón y jari' napon rik'in ri ruk'ulba't ri ruwach'ulew Haurán.

¹⁷Ja k'a k'ulba't re' ri k'o pa xaman ri nibe chuchi' ri palou y napon k'a pa tinamit Hasar-enán ri k'o pa xaman chire ri ruwach'ulew Damasco y ri Hamat.

¹⁸Ri k'ulba't ri k'o kere' pa relebel-q'ij choj nibe pa xokon chukojol ri ruwach'ulew Haurán y ri Damasco; k'ari' nibe pa qajbel-q'ij y napon k'a pa raqen-ya' Jordán. K'ari' nixule-qa pa xokon chire ri raqen-ya' ri' ri nuch'er ri ruwach'ulew Galaad rik'in ri ruwach'ulew Israel. Napon k'a chuchi' ri Tzayi-Choy y choj nibe chuchi' ri ya' k'a toq napon rik'in ri tinamit Tamar ri k'o pa xokon chire ri Israel.

¹⁹Ri k'ulba't ri k'o pa xokon nitiker-el rik'in ri tinamit Tamar y choj nibe pa qajbel-q'ij. Niq'ax-el rik'in ri alaxibel-ya' Meribá-cadés y napon k'a pa ti ch'uti'n raqen-ya' richin Egipto y napon k'a pa palou.

²⁰Ri ruk'ulba't ri k'o pa qajbel-q'ij nitiker-el pa raqen-ya' richin Egipto y nibe pa xaman chuchi' ri palou y napon k'a pa taq taq'aj chuwech-pe ri tinamit Hamat.

²¹Jak'a ruwach'ulew re' ri xtitaluj chiwech achi'el rubanik ri kablajuj itzobaj.

²²Jari' ri ulew ri xtiwichinaj kan rix y chuqa' ri nikichinaj kan ri winaqi' ri man e rijatzul ta kan ri Israel, rije' xkek'oje' chi'ikojol y chuqa' ri kalk'ual. Xtiben chike chi kan achi'el e iwinaq israelita y toq xtich'ar ri ruwach'ulew, rije' k'o chi xke'ichinan iwik'in.

²³Y xabachike tzobaj xkek'oje-wi, chiri' k'o chi xtikichinaj kan kulew. Ja yin Jehová ri yibin.