Read Kaqchikel Ez 48 Bible Online

Ez 48 - Kaqchikel bible

Ez 48

¹Ri ruk'ulba't ri ruwach'ulew nitiker-pe chuchi' ri palou y nibe pa relebel-q'ij y niq'ax-el pan Hetlón y choj nibe pan Hamat. Napon pan Hasar-enán ri k'o chukojol ri ruwach'ulew Damasco y napon k'a pan Hamat. Ri tzobaj richin Dan xtikichinaj ri kulew ri k'o pa xaman. Y pa xokon chire ri Dan xtikichinaj kan ri tzobaj richin Aser. Y pa xokon chire ri Aser xtikichinaj kan ri tzobaj richin Neftalí. Y pa xokon chire ri Neftalí xtikichinaj kan ri tzobaj richin Manasés. Y pa xokon chire ri Manasés xtikichinaj kan ri tzobaj richin Efraín. Y pa xokon chire ri Efraín xtikichinaj kan ri tzobaj richin Rubén. Y pa xokon chire ri Rubén xtikichinaj kan ri tzobaj richin Judá.

⁸Pa xokon chire ri Judá k'o chi nich'er kan ri ulew richin jun sipanik chuwe yin. Ri ruwach'ulew ri' nitiker-el pa relebel-q'ij y napon k'a pa qajbel-q'ij chire ri ruwach'ulew Israel. Y ri raqen ri ulew ri nich'er kan 7,485 jaj. Y pa runik'ajal ri ulew ri' xtik'oje-wi ri wachoch.

⁹K'o chi nich'ar jun ulew chuwe yin y ri ruwech 7,485 jaj y ri raqen 2,973 jaj.

¹⁰Nel chi tzij ri pa xaman y pa xokon 7,485 jaj ruwech y ri pa relebel-q'ij y pa qajbel-q'ij k'o 2,973 jaj raqen. Y re ulew re' ch'aron chike ri sacerdote. Y pa runik'ajal ri ulew ri' xtik'oje-wi ri wachoch.

¹¹Re ulew k'a re' kan xtich'ar kan chike ri e sacerdote ri e rijatzul kan ri Sadoc, roma rije' man xekitzeqelibej ta ri ch'aqa' chik levita toq ri israelita xkijech'ej kan ki' rik'in ri nubey.

¹²Roma ri' ri ulew ri' k'o janila rejqalen y jun sipanik chike ri e sacerdote. Y nik'oje' kan kere' pa xokon chire ri kulew ri levita.

¹³Chunaqaj ri kulew ri sacerdote pa xaman xtik'oje-wi kulew ri levita. Y ri ulew ri' 7,485 jaj ri ruwech y 2,973 jaj ri raqen.

¹⁴Re ulew re' ja re' ri más utz chupan chijun ri ruwach'ulew Israel. Man tik'ayix juba' chire ri ulew o xtijal o xa xtiq'ax ta pa ruq'a' jun chik wineq, roma re ulew re' kan jachon chuwe yin Jehová.

¹⁵Ri juba' ulew ri xtik'oje' kan 7,485 jaj ri ruwech y 1,487 jaj ri raqen. Y re' kan ch'aron richin yek'oje' winaqi' chuwech y chuqa' kisoq'olbal ri kawej. Y pa runik'ajal ri ulew ri' xtik'oje-wi ri tinamit.

¹⁶Ri akuchi k'o-wi ri tinamit nrajo' 1,338 jaj chi e kaji' ruxikin.

¹⁷K'o jun soq'olbel ri xtusutij-rij ri tinamit ri k'o oxk'al kajlajuj jaj rik'in nik'aj raqen. Keri' rubanik chi kaji' ruxikin.

¹⁸Y pa relebel-q'ij y ri pa qajbel-q'ij chire ri tinamit xtik'oje' kan juba' ulew richin tiko'n. Y ri retabal ri ulew ri' 1,487 jaj raqen. Keri' rubanik chi ka'i' ruxikin. Re ulew re' xtisamajix ruwech, y toq xtiwachin, re' xtik'atzin richin xketzuq ri winaqi' ri xkesamej chupan ri tinamit ri'.

¹⁹Y ri xkesamej chiri', xkepe chupan ri kablajuj tzobaj y yek'oje-qa chiri' pa tinamit.

²⁰Chijun ri ulew ri ch'aron kan, ri retabal 7,485 jaj, chi kaji' ruxikin. Y re ulew re' nich'ar k'a kan juba' chuwe yin y juba' chike ri tinamit.

²¹Ri q'atoy-tzij xtrichinaj ri juba' ulew ri k'o kere' pa relebel-q'ij y pa qajbel-q'ij richin ri ulew ri ch'aron chuwe yin. Ri pa xaman chire ri ulew ri' k'o ri rulew ri Judá y ri pa xokon k'o rulew ri Benjamín. Ri nik'aj chire ri rulew ri q'atoy-tzij 7,485 jaj ri raqen y nitiker-el rik'in ri ulew wichin yin y napon k'a pa palou re kere' pa qajbel-q'ij. Y ri nik'aj chik 7,485 jaj ri raqen y nitiker-el rik'in ri ulew wichin yin y napon k'a pa Tzayi-Choy ri k'o kere' pa relebel-q'ij. Ri wachoch xtik'oje' pa runik'ajal ri ulew ri'. Ri kulew ri levita y ri tinamit ek'o-el chuchi'. Y ri rulew ri q'atoy-tzij ek'o pa taq ka'i' ruxikin.

²³Ri kiruwach'ulew ri ch'aqa' chik tzobaj choj nibe pa xokon. Y pa xokon chire ri rulew ri q'atoy-tzij xtikichinaj kan ri tzobaj richin ri Benjamín. Y pa xokon chire ri ruwach'ulew ri Benjamín xtikichinaj kan ri tzobaj richin ri Simeón. Y pa xokon chire ri ruwach'ulew ri Simeón xtikichinaj kan ri tzobaj richin ri Isacar. Y pa xokon chire ri ruwach'ulew ri Isacar xtikichinaj kan ri tzobaj richin ri Zabulón. Y pa xokon chire ri ruwach'ulew ri Zabulón xtikichinaj kan ri tzobaj richin ri Gad.

²⁸Ri k'ulba't ri k'o pa xokon chire ri ruwach'ulew ri Gad, nitiker-el pa tinamit Tamar y niq'ax-el pa qajbel-q'ij chuchi' ri alaxibel-ya' Meribá-cadés y napon k'a pa ch'uti'n raqen-ya' richin ri Egipto y keri' napon k'a pa palou.

²⁹Jak'a ruwach'ulew re' ri xtich'ar richin xtikichinaj kan ri iwijatzul, ri kablajuj tzobaj e richin ri Israel. Yin Jehová ri yibin.

³⁰Ri tinamit xtisutix-rij rik'in tz'aq y ri retabal k'o 1,338 raqen y ruwech. Y keri' rubanik chi kaji' ruxikin. Y pa taq kaji' ruxikin ek'o oxi' okibel. Y chikijujunal ri okibel ri' ruk'uan jun chike ri kibi' ri e ruk'ajol kan ri Israel. Ri okibel ri ek'o pa xaman chire ri tinamit, kibini'an Rubén, Judá y Leví. Ri okibel ri ek'o pa relebel-q'ij chire ri tinamit, kibini'an José, Benjamín y Dan. Ri okibel ri ek'o pa xokon chire ri tinamit, kibini'an Simeón, Isacar y Zabulón. Y ri okibel ri ek'o pa qajbel-q'ij chire ri tinamit, kibini'an Gad, Aser y Neftalí.

³⁵Y ri raqen ri tinamit 5,352 jaj pa taq kaji' ruxikin. Y ri tinamit xtubini'aj: Ri Jehová kan wawe' k'o-wi, xcha' ri Jehová.