Read Kaqchikel Ez 7 Bible Online

Ez 7 - Kaqchikel bible

Ez 7

¹Ri Jehová xch'on chik wik'in y xubij chuwe:

²Rat Ezequiel, taya' k'a re jun rutzijol re' chike ri awinaq: Ri ruk'isibel q'ij naqaj chik k'o-wi.

³Kan xtinwelesaj k'a woyowal chiwij y kan xtinch'ojij k'a chiwe ronojel ri itzel taq ibanobal, roma kan man niqa' ta chinuwech yin.

⁴Kan man xtinjoyowaj ta chik iwech toq xtinya' rutojbalil-mak pan iwi', roma ri itzel taq ibanobal ri xe'ibanala', kan man niqa' ta k'a chinuwech. K'ari' k'a xtiwetamaj in achike yin.

⁵Yin Jehová ri ink'o pa ruwi' ronojel, kan xtinya-pe jun nimalej wululen chiwij y chirij chik ri' xtipe chik jun.

⁶Ri ruk'isibel taq q'ij kan noqaqa yan el y kan naqaj chik k'o-wi, ja q'ij ri' toq xtibek'is ri iruwach'ulew Israel.

⁷Kan niqaqa yan k'a ri wululen chiwij rix winaqi' richin ri ruwach'ulew Israel. Kan ninaqajub yan k'a pe ri q'ij richin nimalej xibinri'il. Y ri xibinri'il ri' xtipe pa ruk'exel ri nimaq'ij ri niben chiri' pa ruwi' taq juyu'.

⁸Kan ja yan re wakami xtinwelesaj woyowal chiwij. Kan k'a xkitane' na chire ri q'atoj-tzij pan iwi', k'ari' xtich'uch'u' ri wánima chiwij. Kan xtinben k'a keri' chiwe, roma ri itzel taq banobel ri ye'iben, kan man niqa' ta chinuwech y kan man utz ta nintz'et yin.

⁹Y kan man xtinjoyowaj ta k'a iwech toq xtinya' rutojbalil-mak pan iwi' roma ronojel re'. K'ari' k'a xtiwetamaj chi ja yin Jehová ri yibanon ronojel re'.

¹⁰Ri q'ij richin wululen kan xoqaqa yan, roma kan xoqaqa yan ri retal, achi'el ri q'ayis yebebos-pe richin nikik'ut chi noqaqa yan ruq'ijul ri job.

¹¹Ri kamik kan k'iy k'a ruk'ayewal ruk'amon-pe, achi'el jun che' ri nuya' k'iy ruwech y roma ri' kan jujik chi re wululen re' kan xtipe. Xa kan man jun k'a ri xtik'oje', ni ta ri beyomel, ni ta ri k'o rejqalen.

¹²Xoqaqa k'a ri q'ij y xoqaqa k'a ri ramaj toq ri k'ayinel man nikikot ta rik'in ri ruk'ayij y ri loq'onel man nibison ta richin nuya' kan ruméro, roma ninbenya' yan ri rutojbalil pa kiwi' konojel.

¹³Y wi k'o ta jun nuk'ayij rulew, kan man jun bey chik xtitikir xtukol, stape' k'a k'iy juna' xtik'ase-el, roma kan konojel xkenwelesaj-el. Y re' kan jujik chi xtibanatej roma kan man xtinjel ta chik ri nuch'obonik.

¹⁴Stape' xtixupux-pe ri trompeta richin nikichojmirisaj-ki' richin yebe pan oyowal, xa man jun xtibe, roma ri woyowal xa kan qajineq chik pa kiwi' rije'.

¹⁵Chupan ri tinamit k'o wayjal y yabil y chirij-el ri tinamit k'o ri espada. Y roma ri', ri ek'o chupan xkeken roma wayjal y yabil. Jak'a ri ek'o pa juyu' xkeken chi espada.

¹⁶Y ri winaqi' ri ek'o kan chupan ri tinamit, xa xke'animej-el pa taq juyu'. Y toq ye'oq' roma ri kimak, xa xkeq'ajan achi'el nikiben ri taq paloma.

¹⁷Xtik'is k'a ruchuq'a' ri kiq'a' y ri kaqen.

¹⁸Xtikikusaj k'a tzieq qiriqoj-qiriqoj retal richin bis, kan xkebaybot roma xibinri'il, kan xtikaqer ri kipalej roma k'ix y xtikisokaj ri rusumal-kiwi' retal richin k'ixbilal.

¹⁹Ri isaqipuaq y ri iq'anapuaq xkek'aq-el pa taq bey, achi'el niban rik'in ri q'ayis, roma jari' xbanon chiwe richin xixtzaq chupan ri itzel taq banobel. Ronojel ri' xa man jun rejqalen xtuben, ri beyomel ri' man xtitikir ta xkixrukol chuwech ri woyowal, ni man xtitikir ta xtunojisaj ri ipan.

²⁰Kan inimirisan k'a iwi' rik'in ri jebelej taq ruwi-ixkinaj, retz'aba'l ruwi' q'abaj, ichinaj; y rik'in ri' xe'ibanala-q'anej wachibel ri kan yenwixowaj yin. Y roma ri' yin kan xtinben q'ayis chire ronojel re'.

²¹Xtinben k'a chi xkepe winaqi' ri man e iwinaq ta, richin xtikeleq'aj ronojel re' iwik'in y xtikiben chire chi man ch'ajch'oj ta chik.

²²Yin kan xkixinmalij kan y xkepe k'a itzel taq winaqi' richin xke'eleq' chupan ri wachoch y xtikiben chire chi man ch'ajch'oj ta.

²³Ke'inaba' k'a cadena richin yixxime', roma chupan ronojel ri ruwach'ulew y ri pa tinamit janila kamik ri yebanatej.

²⁴Yin xkenk'en k'a pe itzel taq winaqi' ri e richin ch'aqa' chik ruwach'ulew richin xke'ok'oje' chupan ri iwachoch. Chuqa' ri jay ri akuchi niya-wi kiq'ij ch'aqa' chik dios, re' xke'ok man ch'ajch'oj ta. Y kere' kan xtinqasaj k'a kiq'ij ri e nima'q taq iwinaq.

²⁵Ri nimalej xibinri'il xtipe k'a pan iwi' y kan xtikanoj k'a ri uxlanibel-k'u'x, jak'a xa man xtiwil ta chik.

²⁶Ri wululen kan xtipe y chirij ri' kan xtipe chik jun. Xtipe ruk'ayewal y chirij chik ri' xtipe chik jun. Rix xtikanoj jun q'alajirisey nuch'abel, jak'a man jun xtiwil. Chuqa' man xkek'oje' ta chik sacerdote richin yixkitijoj, ni man xkek'oje' ta chik achi'a' ri k'o kiq'ij richin yixkipixabaj.

²⁷Ri rey kan xtukusaj k'a tzieq richin bis y ri e tata'al kan xkebison janila. Y rix kan janila xkixbaybot. Kan achi'el rubanik ri imak kan keri' ri rutojbalil ri xtinya' pan iwi'; richin keri' xtiwetamaj chi ja yin Jehová, xcha'.