Read Kaqchikel Ez 9 Bible Online

Ez 9 - Kaqchikel bible

Ez 9

¹Y chirij k'a ronojel re', ri Jehová xch'on k'a kow wik'in y xubij chi kek'amer-pe ri chajinela' richin ri tinamit Jerusalem; y ri e peteneq kan kibanon-pe rutzil ri kikamisabal.

²Xintz'et k'a e waqi' achi'a' xe'ok-pe chiri' pan okibel ri k'o pa xaman. Y chikijujunal k'a rije' kik'amon-pe kikamisabal pa kiq'a'. Y kachibilan k'a jun achin ri rukusan tzieq ri banon rik'in lino y ri xerupan rutzeqeban tinta richin tz'ibabel. Y xe'ok-apo chiri' chuwa-jay y xepa'e-qa chunaqaj ri porobel ri banon rik'in q'enq'oj-pueq.

³K'ari' ri ruk'ojlemal ri Jehová xyakatej-el pa kiwi' ri querubín ri akuchi kan k'o-wi-pe y xbe k'a, y xuchojmij-el ri akuchi niban-wi oken chire ri rachoch. K'ari' ri Dios xroyoj k'a ri achin ri rukusan tzieq lino ri uk'uayon tinta richin tz'ibabel.

⁴Y xubij chire chi tibe chukojol ri tinamit y tuya' ketal nik'aj-kiwech ri winaqi' ri yebison y yejilon, roma ri itzel taq banobel ri yekiben ch'aqa' chik winaqi' chiri', ri kan nrixowaj rija'.

⁵Y chike ri e waqi' achi'a' ri e rachibilan ri tz'ibanel xubij chi kebiyin chupan ri tinamit y kekikamisaj kan ri winaqi', jak'a man tikijoyowaj kiwech.

⁶Xubij chi kekikamisaj k'a chi rijita'q, chi xtani', chi alaboni', chi ixoqi', chi ak'uala'; jak'a man jun tikiben kan chike ri winaqi' ri k'o ketal. Rije' xkichop k'a kikamisaxik ri achi'a' ri k'o kiq'ij ri ek'o chupan ri rachoch ri Jehová.

⁷K'ari' xubij chike chi kekinojisaj rik'in kaminaqi' ri ruwa-jay y keri' k'a xtikiben chi xtok man ch'ajch'oj ta. Xeri' xeruteq-el pa tinamit ri kamisanela'. Y rije' kan xebekamisan kan.

⁸Y rokik k'a ye'ajin rije' chi kamisanik chiri' pa tinamit, yin xik'oje' kan nuyon. Y xink'eq k'a wi' pan ulew y rik'in k'a janila q'axo'n xisik'in y xinbij ¡Jehová, at wajaw! ¿Kan nawelesaj ronojel ri awoyowal chirij ri tinamit Jerusalem, richin chi ye'ak'is ri juba' chik winaqi' ri k'a ek'o kan?, xicha'.

⁹Y ri Jehová xubij chuwe: Ri winaqi' israelita y ri aj-Judá kan janila chik nim ri kimak y roma ri' ri ruwach'ulew kan nojineq rik'in kamik y chuqa' rik'in etzelal. Y rije' kan nikibij-qa chi yin man yentz'et ta y chi yin xenmalij yan kan.

¹⁰Roma ri' kan man xtinjoyowaj ta k'a kiwech, jak'a xa xtiqaqa ri ruk'ayewal pa kiwi' roma ri kibanobal, xcha'.

¹¹K'ari' ri tz'ibanel xuya' ri rutzijol chi xuben yan ronojel ri xbix chire.