Read Kaqchikel Dn 10 Bible Online

Dn 10 - Kaqchikel bible

Dn 10

¹Chupan ri rox juna' chire ri q'atbel-tzij richin ri Ciro, rey pa ruwi' ri ruwach'ulew Persia, jari' toq k'o xq'alajirisex chinuwech yin. Y ronojel ri xbix chuwe kan qitzij y kan k'o-wi ruk'ayewal chupan. Y k'ari' xq'ax chinuwech ri xbix chuwe.

²Jak'a toq man jani tiq'ax chinuwech, yin kan janila k'a xibison oxi' semana.

³Kan man xintej ta k'a ri jebelej taq q'utun, ni man xintej ta ti'ij, ni man xinqum ta vino, ni man xinya' ta jubulej taq aq'om chuwij, k'a toq xtz'aqet na oxi' semana.

⁴Toq xk'is ri oxi' semana, jari' ri q'ij juwineq kaji' chire ri nabey ik' chire ri juna'. Jari' toq yin ink'o k'a chuchi' ri raqen-ya' rubini'an Hidequel.*f2*

⁵Y xitzu'un k'a apo pa ruwi' ri ya' y xintz'et k'a chi k'o jun achi'el achin ri rukusan tzieq ri banon rik'in lino seq-seq, y ri ximibel-rupan banon rik'in q'anapueq ri peteneq pan Ufaz.

⁶Ri rutz'umal kan nich'ich'an, y ri rupalej kan nisaqirisan achi'el nisaqirisan ri koyopa'. Y ri pa taq runaq'-ruwech achi'el xa ta ruxaq-q'aq'. Y ri e ruq'a-raqen achi'el ri q'enq'oj-pueq ri jebel josq'in nitzu'un, y ri ruch'abel kan achi'el kich'abel e k'iy winaqi'.

⁷Xa kan xaxe k'a chinuwech yin ri xk'utumej-wi ri jun achin ri', y ri achi'a' ri ek'o wik'in man xkitz'et ta. Jak'a kan xpe jun nimalej xibinri'il chikij, y roma ri' xe'animej y xbekewaj-ki'.

⁸Xa xik'oje' k'a kan nuyon, richin xintz'et kan ri achin ri'. Kan xk'is k'a ri wuchuq'a' y xinkajmaj-qa.

⁹Y toq xinwak'axaj ri ruch'abel, xa xijupuju-qa pan ulew, y keri' nubanon xpe k'a jun nimalej waran chuwe.

¹⁰Y k'o k'a jun q'abaj xichapo-qa, y xuben chuwe richin xixuke-q'anej y xinchakalibej ri nuq'a'.

¹¹Y xubij k'a chuwe: Daniel, ri kan utz at tz'eton roma ri Dios. Taya' k'a ri axikin chire ri ch'abel ri xtinbenbij chawe. Kayakatej-q'anej, roma xa in taqon-pe awik'in re wakami, xcha'. Kan xaxe k'a xubij keri', yin xipa'e-q'anej y kan yibaybot k'a.

¹²K'ari' xubij chuwe: Daniel, man taxibij-awi', roma kan chupan k'a ri q'ij toq rat xpe pan awánima chi naqasaj-awi' chuwech ri Dios, y yach'on rik'in richin nawetamaj, kan ja k'a q'ij ri' toq xak'axex ri ach'owen, y jari' toq yin xipe awik'in.

¹³Jak'a ri itzel ángel ri k'o pa ruwi' ri ruwach'ulew Persia, xa xiruq'et-qa juwineq jun q'ij. Jari' toq xapon ri Miguel, jun chike ri tata'al kichin ri ángel. Y rija' kan xiruto'.

¹⁴Wakami, in peteneq richin nonq'alajirisaj chawech ri xtipe pa ruwi' ri atinamit chawech-apo, roma ri xk'utumej chawech xa kan richin k'a ri q'ij ri', xcha'.

¹⁵Rokik najin rubixik chuwe re ch'abel re', yin xa kan jun k'a in chiqil-wi pan ulew, y man yich'on ta chik.

¹⁶Jari' toq rija' xuchop ri nuchi', y kan jari' k'a xich'on y xinbij chire: Roma ri xk'utumej chinuwech, yin kan janila yibison, y maneq chik wuchuq'a'.

¹⁷¿Achi'el ta k'a toq xkitikir xkich'on awik'in, yin ri in asamajel, roma xa kan xk'is ri wuchuq'a' jumul, y man yitikir ta chik ninjiq'aj wuxla'?, xicha' chire.

¹⁸K'ari' xjel chik apo jun bey wik'in y xiruchop richin xuya' wuchuq'a'.

¹⁹Y xubij k'a chuwe: Rat ri kan utz at tz'eton roma ri Dios, man taxibij-awi'. Ja ri uxlanibel-k'u'x tik'oje' awik'in. Tatija' aq'ij y man kamayamo-qa, xcha' chuwe. Rokik najin nich'on wik'in, xk'oje' chik jun bey wuchuq'a', y xinbij chire chi tich'on k'a wik'in, roma kan xuya' yan wuchuq'a'.

²⁰Y rija' xubij: ¿Awetaman ri achike roma in peteneq awik'in? Yin in peteneq awik'in richin nonq'alajirisaj chawech ri tz'ibatel kan chupan ri wuj ri richin ri qitzij. Chirij ri' kan xkitzolej chik richin ninbenbana' oyowal rik'in ri itzel ángel ri k'o pa ruwi' ri ruwach'ulew Persia. Toq xkitikir chirij rija', xa xtibeyakatej chik pe ri itzel ángel ri k'o pa ruwi' ri ruwach'ulew Grecia. Y ninwajo' k'a richin nawetamaj chi kan xaxe k'a ri Miguel ri chajinel iwichin rix ri nito'on wichin.