Read Kaqchikel Dn 6 Bible Online

Dn 6 - Kaqchikel bible

Dn 6

¹Toq ri rey Darío ruchapon chik nuq'et-tzij, kan xerutaluj k'a e 120 aj-raqen richin nikiq'et-tzij pa kiwi' ri winaqi' ri ek'o chupan chijun ri rajawaren.

²Y pa kiwi' chik ri aj-raqen ri' xeruya' chik e oxi' q'atoy taq tzij. Y jun chike rije' ja ri Daniel. Konojel re aj-raqen re' k'o chi nikibij chire ri Daniel y ri e ka'i' rachibil ronojel ri samaj ri nikiben, richin chi utz nibe ri ajawaren chuwech ri Darío.

³Jak'a ri Daniel kan más k'a ruq'ij chikiwech rije', roma rija' kan k'o jun nimalej etamabel rik'in. Y roma ri' ri Darío xuya' pa kiwi' ri q'atoy taq tzij y ri aj-raqen.

⁴Roma ri' konojel ri aj-raqen y ri e q'atoy taq tzij, kan nikikanoj k'a rubanik richin ta nikitzeq ri Daniel chire ri rusamaj ri ya'on pan ajawaren. Jak'a xa kan man jun ri achike ta nikil chirij, roma rija' kan nuben k'a ronojel ri bin chire, y man jun etzelal nuben.

⁵Man rik'in ri', re achi'a' re' kan jantape' k'a nikich'ob jebel rij ri achike nikiben chire. Y xkitz'et chi man yetikir ta nikisujuj roma ri rusamaj y roma ri' xkikanoj richin ta ri Daniel nuq'ej ruwi' ri rupixa' ri ru-Dios.

⁶Kan jari' k'a konojel ri aj-raqen y ri e q'atoy-tzij xkimol k'a el ki' y xe'apon chuwech ri rey y xkibij chire: Rey Darío, kan jantape' ta k'a xkak'ase'.

⁷Roj ri oj aj-raqen, ri yojq'aton-tzij, y ri pixabanela' qamolon k'a pe qi' richin noqaya' chawech re jun pixa' re xqach'ob roj chi k'atzinel chi niban. Re pixa' re' nubij k'a chi chupan re jun ik' re' man jun wineq ri nixuke' richin nuya' ruq'ij jun chik dios, o jun chik wineq ri man ja ta rat. Y ri wineq ri man xtiniman ta chire re pixa' re', kan xtik'aq k'a chupan ri jul ri akuchi ek'o-wi ri koj.

⁸Wakami k'a, rat qa-rey, tajikiba' k'a re jun pixa' re', y taya-el ri abi' chuwech, richin keri' kan man jun xtijalo, achi'el k'a ri pixa' richin ri qaruwach'ulew Media y Persia, ri kan man jun niq'ajo ruwi', xecha'.

⁹K'ari' ri rey Darío xuya' k'a el ri rubi' chuwech ri wuj richin ri pixa', ri xkiben ri achi'a' ri'.

¹⁰Jak'a ri Daniel, toq xunabej chi xtalux yan rutzijol re jun pixa' re', xjote-q'anej chupan ri ka'i' wiq rachoch, xujeq ri ru-ventana ri k'o pa ruchojmilal ri tinamit Jerusalem y xxuke' richin nich'on y nimatioxin rik'in ri Dios, kan achi'el ri rubanon-pe. Y re' xuben oxi' mul pa jun q'ij.

¹¹Ri achi'a' ri nich'upun kik'u'x chirij ri Daniel xkimol k'a el ki' richin nibekiq'elebej. Y kan xbekila' xukul richin nich'on y nimatioxin rik'in ri ru-Dios.

¹²Ri achi'a' ri' kan chi'anin k'a xebe rik'in ri rey richin nibekinataj chire ri pixa' ri'. Y xkibij chire: Rat rey, xawelesaj k'a rutzijol ri jun pixa' ri nubij chi man jun wineq xtuya' ruq'ij jun chik dios o jun chik wineq ri man ja ta rat, chupan re jun ik'. Y ri wineq ri xtuben keri' kan xtik'aq k'a chupan ri jul chikikojol ri koj, xecha'. K'ari' ri rey xubij chi kan keri' wi y man jun niq'ajo ruwi'.

¹³K'ari' xkibij k'a chire ri rey chi ri Daniel ri jun chike ri e k'amon-pe pa Judá, man nuqasaj ta ri' chuwech, ni man niniman ta chire ri pixa' ri', y chi xkitz'et chi rija' nich'on rik'in ri ru-Dios oxi' mul pa jun q'ij.

¹⁴Toq ri rey xrak'axaj re ch'abel re', kan janila k'a xq'axon ránima y xukanoj rubanik richin ta xukol ri Daniel chuwech ri kamik. Y keri' k'a xuben k'a xqaqa na qa ri q'ij.

¹⁵Jak'a ri achi'a' ri' xkimol-ki' richin xebe rik'in ri rey, y xkibij chire: Qa-rey, toqaqa chi'ak'u'x, chi ri pixa' ri xajikiba' yan atzij chire, y xel yan rutzijol. Ri' kan man jun xtijalo, xecha'.

¹⁶K'ari' ri rey xuteq k'a ruk'amik ri Daniel, y xubij chire: Daniel, ri a-Dios ri kan k'o awik'in jantape', ja ta k'a rija' ri xtikolon awichin, xcha'. Chirij ri' xkik'eq-qa chupan ri jul ri akuchi ek'o-wi ri koj.

¹⁷Y xbek'amer k'a pe jun abej richin xtz'apex kan ruwi' ri jul. Y ri rey kan xuya' kan retal rik'in ri retal q'atbel-tzij chuwi-ruq'a', y keri' chuqa' ri e tata'al richin chi titz'etetej chi kan xbanatej ri pixa' ri xbix.

¹⁸Chirij ri' ri rey xbe pa rachoch, xkotz'e-qa y kan man jun xutej-qa. Kan man jun k'a xrajo' chi xk'amer ta pe chuwech, ni ri jalajoj ruwech q'ojom y kan man xwer ta k'a chuch'obik rij ri Daniel.

¹⁹Ri ruka'n q'ij ri rey xyakatej-el nimaq'a' yan, y xbe chi'anin chuchi' ri jul ri akuchi k'o-wi ri Daniel.

²⁰Xjel k'a apo chuchi' ri jul y rik'in bis xroyoj-qa ri Daniel. Y xubij-qa: Daniel, ri at rusamajel ri k'aslik Dios, ri Dios ri jantape' nasamajij, ¿kan xtikir kami xaruto' chikiwech ri koj?, xcha-qa.

²¹Ri Daniel xch'on k'a pe y xubij: Kan jantape' ta k'a xkak'ase' rat rey.

²²Ri nu-Dios xuteq k'a pe jun ru-ángel richin xutz'apej ri kichi' ri koj, richin chi man jun xkiben chuwe. Roma yin xa kan man jun k'a numak chuwech rija'. Keri' chuqa' chawech rat rey kan man jun numakun, xcha'.

²³Y ri rey kan janila k'a xkikot, roma k'es ri Daniel. Y xubij k'a chi telesex-pe chupan ri jul. Keri' xel-pe ri Daniel y kan man jun k'a sokotajik k'o chirij, roma rija' kan xukuquba' ruk'u'x rik'in ri ru-Dios.

²⁴Chirij ri' ri rey kan xubij k'a chi kebek'amer-pe ri achi'a' ri nich'upun kik'u'x chirij ri Daniel, y kek'aq chupan ri jul ri akuchi ek'o-wi ri koj. Kan keri' k'a xban chike ri achi'a' ri', e kachibilan ri kixjayilal y ri kalk'ual. Y kan k'a man jani k'a ke'apon-qa kik'in ri koj, kan ja yan ri' xkik'eq-pe-ki' ri koj chikij, y kan xekiwech'.

²⁵Xeri' ri rey Darío xutz'ibaj k'a el wuj chike konojel winaqi' ri ek'o pa rajawaren, y kere' k'a ri nubij ri wuj: Ja ta ri uxlanibel-k'u'x ri xtik'oje' iwik'in chi'iwonojel.

²⁶Yin ri in rey ninya' k'a pan iwi' chi'iwonojel re jun pixa' re': Kan konojel k'a ri winaqi' ri ek'o chupan ri wajawaren kan tikiqasaj k'a ki' chuwech ri ru-Dios ri Daniel; Roma ri Dios ri' kan jari' ri k'aslik Dios; ja rija' ri Dios richin tibe-q'ij tibe-seq. Ri rajawaren kan man jun k'a xtiwulan richin; ri ruq'atbal-tzij kan man k'isel ta k'a.

²⁷Rija' kan yerukol ri winaqi' y kan yerujikiba' kan, kan yeruben k'a meyel taq banobel chila' chikaj y chuwech re ruwach'ulew. Ja rija' xkolon richin ri Daniel chikiwech ri koj, xcha' ri Darío.

²⁸Keri' k'a ri Daniel xk'oje' k'a ruq'ij chupan chijun ri q'atbel-tzij richin ri rey Darío. Y chirij ri Darío, xk'oje' chuqa' ruq'ij chupan ri q'atbel-tzij richin ri Ciro, ri rey richin ri ruwach'ulew Persia.