Read Kaqchikel Dn 8 Bible Online

Dn 8 - Kaqchikel bible

Dn 8

¹Toq k'a k'es na ri Belsasar, rey pa ruwi' ri ruwach'ulew Babilonia, y chupan ri rox juna' richin ri ruq'atbal-tzij, yin kan xk'utumej chik k'a chinuwech jun chik banobel.

²Yin kan xinna' k'a chi ink'o pa tinamit Susa, akuchi-k'o-wi ri ruk'u'x ri ajawaren, ri chiri' pa ruwach'ulew Elam. Y yin ink'o k'a chuchi' ri raqen-ya' rubini'an Ulai.

³Yin xintz'et k'a apo chi k'o jun achij karne'l ri k'o-apo chuwech ri raqen-ya' ri'. Y ri karne'l ri' k'o k'a ka'i' nima'q taq ruk'a'. Jun k'a chike ri uk'a' ri' kan xk'iy-q'anej más.

⁴Y xintz'et chi ri karne'l ri' nuben chi nitoq'on ri keri' pa qajbel-q'ij, pa xaman y pa xokon, y kan man jun k'a chikop ri nitikir ta nupaba-ri' y nukol ta el ri' chuwech roma ri ruchuq'a'. Kan nuben k'a ronojel ri achike ri niqa' chuwech y ri karne'l ri' kan janila k'a xnimer.

⁵Rokik k'a ninch'ob rij ronojel re', xintz'et k'a chi peteneq jun achij tzuntzun re kere' pa qajbel-q'ij. Kan pa kaq'iq' k'a peteneq-wi y k'o k'a jun ruk'a' kojol runaq'-ruwech.

⁶Ri tzuntzun ri' xapon k'a rik'in ri karne'l ri k'o ka'i' ruk'a', ri xintz'et chuchi' ri raqen-ya'. Y rik'in ruchuq'a' y rik'in royowal xuchop-ri' rik'in ri achij karne'l.

⁷Y ri tzuntzun xuq'ej y xuwulaj k'a ri ka'i' ruk'a' ri achij karne'l, y ri karne'l xa kan man jun chik k'a ruchuq'a' richin ta xuto-ri'. Chirij ri' ri tzuntzun xuqasaj k'a pan ulew ri achij karne'l, xpa'e' chirij y kan man jun xkolon pa ruq'a'.

⁸Ri achij tzuntzun ri' kan janila k'a xnimer ri ruchuq'a', y rokik ri', ri jun nimalej ruk'a' ri k'o kojol runaq'-ruwech xa xq'aj-el, y pa ruk'exel ri' xebe'el chik pe kaji' nima'q uk'a' ri kan yeq'alajin pa xaman, pa xokon, pa relebel-q'ij y pa qajbel-q'ij.

⁹Y chire jun chike ri uk'a' ri' xbek'ulun chik k'a pe jun ti ko'ol uk'a', ri kan janila xk'iy pa ruchojmilal ri xokon, ri relebel-q'ij, y pa ruchojmilal ri tinamit Israel.

¹⁰Kan janila k'a xnimer re jun uk'a' re' y kan xeberuq'i' ronojel ri ek'o chikaj; y xeruqasaj k'a pe juba' chire ri ch'umila' k'a pan ulew y xerupalibej.

¹¹Pa ruwi' ri', kan xunimirisaj-ri' chuwech ri aj-raqen ri k'o pa kiwi' rije'. Y man jun rejqalen xuben chire ri kamelabel ri yesuj q'ij-q'ij, y ri rachoch ri Dios kan xuqasaj ruq'ij.

¹²Ri uk'a' ri' xuben k'a ronojel ri xrajo' rija' y kan xbe k'a pa jotol. Roma ri yakatajinenri'il ri', kan xejach ri winaqi' pa ruq'a'; keri' chuqa' ri kamelabel ri jantape' yesuj. Keri' kan xuqasaj k'a pan ulew ronojel ri qitzij.

¹³Chirij ri' xinwak'axaj k'a chi jun ángel nich'on, y k'o chik k'a jun ángel ri xch'on-apo chire ri nich'on nabey, y xuk'utuj chire chi janipe' nitane' ri itzel banobel rik'in ri kamelabel ri jantape' yesuj, y ri yakatajinenri'il chirij ri rachoch ri Dios y ri rutinamit, ri xejach pa ruq'a' ri ti ko'ol uk'a' ri kan xerupalibej.

¹⁴Y xubij k'a ri nabey ángel: Re' xtitane' k'a toq xtitz'aqet na ri jubama wuqu' juna'. Chirij ri' k'ari' xtich'ajch'ojir chik jun bey ri rachoch ri Dios, xcha'.

¹⁵Xk'uluwachitej k'a chi toq xintz'et yan ronojel re', y rokik ninch'ob rij ri achike nel chi tzij, kan jari' k'a xbepa'e' chinuwech jun ri achi'el titzu'un jun wineq, y rija' rubini'an Gabriel. Y jun chik wineq xch'on-pe chiri' chuchi' ri raqen-ya' Ulai, ri kan nureq ruchi' y nubij chire ri Gabriel chi tuq'alajirisaj chinuwech ri yinajin chutz'etik.

¹⁷Y ri Gabriel kan xjel k'a apo wik'in. Y jari' toq yin kan janila xinmey, y roma ri' xinqasaj-wi' k'a pan ulew chuwech. Jak'a rija' xubij k'a chuwe chi yin k'o chi niq'ax jebel chinuwech ri yinajin chutz'etik. Ronojel re' kan xtibebanatej k'a chiqawech-apo, xcha'.

¹⁸Rokik rija' nich'on wik'in, yin xa ximayamo-qa y xijupuju-qa pan ulew. Jak'a rija' xiruchop-qa y xuben chuwe richin xipa'e' chik q'anej.

¹⁹Y xubij k'a chuwe: Yin kan xtink'ut k'a chawech ri xtipe toq xtik'is juba' ri oyowal, y re' kan qitzij.

²⁰Ri karne'l rik'in ka'i' ruk'a' ri xatz'et nel chi tzij ri q'atbel-tzij richin ri ruwach'ulew Media y ri Persia.

²¹Ri achij tzuntzun nel chi tzij ri q'atbel-tzij richin ri ruwach'ulew Grecia, y ri uk'a' ri k'o kojol runaq'-ruwech, nel chi tzij ri nabey rey pa ruwi' ri ruwach'ulew ri'.

²²Y chirij ri uk'a' ri', ri kaji' ri xbek'ulun-pe pa ruk'exel; nel chi tzij kaji' q'atbel-tzij ri xkebeyakatej-pe chupan ri ajawaren ri', xaxe k'a man junan ta kuchuq'a' rik'in ri nabey.

²³Pa ruk'isibel chire ri kiq'atbal-tzij ri e kaji' rey ri', toq ri ketzelal xik'o yan ruwi', jari' toq xtibeyakatej chik pe jun rey ri janila nowineq y q'olonel.

²⁴Kan janila k'a ruchuq'a' xtik'oje', jak'a xa man ruchuq'a' ta rija'. Y rija' xtuben k'a chi xtipe wululen pa kiwi' ri winaqi'. Ronojel ri xkeruben, kan utz k'a xtel chuwech; xkeruk'is k'a konojel achi'a' israelita ri k'o kiq'ij, y chuqa' e k'iy kiwinaq.

²⁵Kan xtich'akon k'a roma ri retzelal y ri q'olonik ri yeruben. Y toq ri winaqi' man jun nikimey, chaq k'ate' k'a xkerukamisaj. Kan janila k'a xtunimirisaj-ri', y kan xtupaba-ri' chuwech ri Dios, jak'a rija' xa xtuwulaj.

²⁶Ri xq'alajirisex chawech pa ruwi' ri jubama wuqu' juna' ri' kan qitzij chi keri' xtibebanatej. Jak'a rat Daniel kan man tatzijoj ri xatz'et, roma re' xa kan xtibebanatej k'a toq q'axineq chik k'iy juna', xcha'.

²⁷Chirij ronojel re', yin nina' chi xk'is wuchuq'a' y kan xiyawej k'a ka'i-oxi' q'ij. Y toq xik'achoj-el xiyakatej-el y xibe chik pa nusamaj rik'in ri rey, jak'a xa janila nuxibin-wi', roma ri xintz'et. Y kan man niq'ax ta chinuwech.