Read Kaqchikel Dn 9 Bible Online

Dn 9 - Kaqchikel bible

Dn 9

¹Toq k'a k'es na ri rey Darío, ruk'ajol ri Asuero, ri aj-Media, y chupan ri nabey juna' toq xkiben rey chire pa ruwi' ri ajawaren richin Babilonia.

²Jari' k'a toq yin Daniel xintz'et k'a jebel ri wuj ri xuya' ri Jehová chire ri q'alajirisey ruch'abel rubini'an Jeremías, ri akuchi nubij-wi chi nibetz'aqet yan ri juna' oxk'al lajuj ri ek'o pa ximonri'il ri aj-Jerusalem.

³Yin kan xich'on k'a rik'in ri Dios ri wajaw richin chi xink'utuj utzil chire pa kiwi' ri nuwinaq. Ximewayin k'a, xinkusaj k'a qirix taq tzieq y xitz'uye' pa chaj richin chi rija' xirak'axaj.

⁴Y xich'on k'a rik'in rija' richin xinq'alajirisaj chuwech ri qamak. Y xinbij k'a chire: Wajaw, nimalej Dios, ri kan ruk'amon chi niqak'en akiy, rat ri kan man amestan ta ri xajikiba' chi kan najoyowaj kiwech ri ye'ajowan awichin y nikitaqej ri apixa'. Y rat kan jare' abanon-pe.

⁵Jak'a roj xa kan oj makuwineq-wi chawech, kan qabanalon itzel taq banobel, kan oj itzel taq winaqi' qabanon chawech, y kan xojyakatej chawij. Y pa ruwi' ri', roj xa xqach'er k'a kan qi' chire ri nubij ri jalajoj ruwech apixa'.

⁶Man xqanimaj ta k'a ri xkibij ri e q'alajirisey ri ach'abel, stape' kan pan abi' rat xech'on kik'in ri qa-rey, ri e tata'al, ri qate-qatata' y kik'in chijun ri qatinamit Israel.

⁷Rat ajaw kan at choj-wi, jak'a roj xa sachineq qak'u'x; keri' ri ek'o pa Jerusalem, y keri' chuqa' ri ch'aqa' chik qawinaq israelita ri ek'o nej naqaj chupan ch'aqa' chik ruwach'ulew, ri akuchi xojataluj-wi rat, roma xqapaba-qi' chawech.

⁸Wajaw yin, kan qitzij chi roj kan oj k'ixbitajineq-wi, keri' chuqa' ri qa-rey, ri e tata'al y ri qate-qatata', y re' kan roma k'a oj makuwineq chawech.

⁹Rat, kan at jun Dios joyowanel, y kan nakuy ronojel ri qamak, stape' kan oj yakatajineq chawij.

¹⁰Kan man qaniman ta atzij, roma xa man qataqen ta ri nubij ri apixa' ri xaya' chiqe koma ri e q'alajirisey ri ach'abel.

¹¹Qonojel k'a roj israelita xa xqaq'ej ruwi' ri apixa'. Xqach'er k'a kan qi' richin man xqanimaj ta ri atzij. Y xa roma ri' xqaqa ri ruk'ayewal pa qawi', achi'el ri tz'ibatajineq kan chupan ri wuj richin ri pixa' ri ruya'on kan ri asamajel Moisés.

¹²Rat kan xataqej k'a ronojel ri abin-pe pa qawi' roj y pa kiwi' ri aj-raqen y pa kiwi' ri e q'atoy taq tzij, roma kan xaya' pa qawi' ri jun nimalej ruk'ayewal. Kan man jun bey k'a banatajineq rik'in jun chik ruwach'ulew ri achi'el ri xuk'uluwachij ri tinamit Jerusalem.

¹³Kan xpe k'a ri ruk'ayewal pa qawi' achi'el ri tz'ibatel kan chupan ri wuj richin ri pixa' ri ruya'on kan ri Moisés. Man rik'in ri' kan man at qakanon ta k'a y man qaya'on ta kan ri itzel banobel, richin ta chi yojbiyin pa ruchojmilal chawech rat.

¹⁴Roma ri', rat Jehová xaya' q'ij chi xpe re jun ruk'ayewal re' pa qawi'; ronojel ri samaj ri naben rat kan pa ruchojmilal-wi. Jak'a roj xa man xqanimaj ta ri atzij.

¹⁵Wakami k'a, Ajaw qa-Dios roj, ja rat ri xatelesan-pe richin ri atinamit pan Egipto rik'in ri nimalej awuchuq'a', y roma ri' kan janila xanimirisaj ri abi', y kan keri' ri abanon-pe. Man rik'in ri' roj kan oj makuwineq-wi chawech; kan qabanon k'a ri itzel taq banobel.

¹⁶Qajaw Dios, rat kan at choj-wi, y roma ri' tabana' utzil chi tik'o-qa ri awoyowal pa ruwi' ri atinamit Jerusalem, ri juyu' ri ch'aron chawe rat. Roma ri kimak ri qate-qatata', ri tinamit Jerusalem xa k'o pa jun nimalej ruk'ixbilal, chikiwech ri ch'aqa' chik tinamit.

¹⁷Tabana' utzil qa-Dios roj; kan tawak'axaj k'a ri nuch'owen ri ninben awik'in, y ronojel ri utzil ri nink'utuj chawe; roma ri awajowabal kan xtiq'alajin ta ri awutzil pa ruwi' ri awachoch ri tolan-tolan rubanon kan.

¹⁸Kan tawak'axaj k'a ri nuch'abel, tatzu-pe ri ruk'uluwachin ri tinamit ri akuchi ninatex-wi ri abi'. Yin nink'utuj re utzil re' chawe man roma ta choj ri qak'aslen chawech, xa kan roma k'a ri ruk'iyal ri ajoyowanik rat.

¹⁹Ajaw, tabana' utzil kinawak'axaj yan k'a, takuyu' k'a ri qamak. Taya' k'a axikin chire ri nuch'owen ri ninben awik'in. Tak'uluba' k'a pe ri nuch'abel nu-Dios yin, roma ri abi' rat kan jari' k'a ri ninatex pa ruwi' ri awinaq y ri atinamit, xicha'.

²⁰Y yin kan yinajin k'a chi ch'owen rik'in ri nu-Dios, richin xinchol chuwech ronojel ri qamak roj israelita. Kan yinoq' k'a chuwech rija', richin xink'utuj utzil chire pa ruwi' ri tinamit Jerusalem.

²¹Rokik yinajin chire ri ch'owen ri', jari' toq ri Gabriel, ri nutz'eton chik chupan ri achi'el achik', peteneq k'a pa kaq'iq' y xoqaqa wik'in, chupan ri ramaj toq nisuj ri kamelabel richin tiqaq'ij pa Jerusalem.

²²Ri Gabriel xch'on wik'in y xubij: Daniel, yin in peteneq awik'in richin nonya' awetamabal y ana'oj.

²³Kan xaxe k'a toq rat xachop yatzijon rik'in ri Dios, kan jari' toq xbix chuwe yin chi yinoch'on awik'in. Y jare' k'a xipe richin nonq'alajirisaj ri xk'utumej chawech. Rat kan utz k'a at tz'eton roma ri Dios, y roma ri' xiruteq-pe. Wakami kan tiq'ax k'a jebel chawech ri nel chi tzij ri xk'utumej yan chawech.

²⁴Ri Dios nubij chi 490 juna' nrajo' richin chi yekolotej ri awinaq israelita y ri atinamit Jerusalem, y richin nik'is ri rutojbalil ri yakatajinenri'il y ronojel mak. Chupan ri q'ij ri' xtikik'ul ri kuyubel-mak, y xtik'oje' k'a ri ruchojmilal jantape' achi'el ri e q'alajirisan y ri xk'utumej chawech. K'ari' xtijaqatej ri k'ak'a' rachoch ri loq'olej Dios.

²⁵Ja juna' ri' nitikeriba' richin niwajlaj toq xtel ri rutzijol chi nipabex chik q'anej jun bey ri tz'aq richin ri tinamit Jerusalem. Toq xkechojmirisex k'a ri tz'aq y ri bey ri chiri', kan xtuk'uaj k'a kawineq beleje' juna', y kan xtik'oje' janila ruk'ayewal. Y k'o chi nikiq'axaj chik 434 juna' k'a toq xtoqaqa na ri jun tata'al ri taqon-pe roma ri Dios.

²⁶Toq xq'ax yan ri 483 juna', kan xtelesex k'a ruk'aslen ri tata'al ri', jak'a xa man roma ta rumak rija'. Chirij re' jun aj-raqen ri man etaman ta ruwech y ri ruwinaq xkepe pa Jerusalem achi'el jun raqen-ya' ri nel-el pa ruk'ulba't. Y kan xtikiwulaj k'a ri tinamit Jerusalem y ri rachoch ri Dios. Ri ruk'ayewal y ri labal kan xtik'oje' k'a jantape' k'a toq xtik'is na ri 490 juna', achi'el ri rubin ri Dios.

²⁷Chirij re' ri aj-raqen kan xtujikiba' k'a rutzij kik'in ri ruwinaq ri Dios chupan ri rutikeribel ri wuqu' chik juna'. Jak'a toq xq'ax yan oxi' juna' rik'in nik'aj, kan xtupaba' k'a rusujik ri kamelabel y ri jalajoj ruwech sipanik. Chirij k'ari', rija' xtiberubana' jun banobel ri kan nrixowaj ri Dios, keri' k'a xtuben k'a toq xtitz'aqet ri wuqu' juna' ri', toq ri Dios xtuya' ri rutojbalil-mak pa ruwi'.