Read Kaqchikel Os 1 Bible Online

Os 1 - Kaqchikel bible

Os 1

¹Ri Jehová xch'on k'a wik'in yin Oseas ri ruk'ajol ri Beerí, toq yeq'aton-tzij pa ruwi' ri ruwach'ulew Judá, ri Ozías, Jotam, Acaz y ri Ezequías. Chuqa' jari' toq ri Jeroboam ri ruk'ajol ri Joás niq'aton-tzij pa ruwi' ri ruwach'ulew Israel.

²Toq ri Jehová xuchop nich'on wik'in, kere' xubij: Oseas, kak'ule' rik'in jun ixoq itzel ruk'aslen y kek'oje' awalk'ual rik'in ri e achi'el ri ruk'aslen rija'. Roma ri tinamit Israel xa janila xutz'ilobisaj-ri' achi'el jun ixoq ri yerukanola' achi'a' richin nimakun kik'in, xcha' chuwe.

³Yin kan keri' k'a xinben, xik'ule' k'a rik'in jun ixoq rubini'an Gómer rumi'al ri Diblaim, rija' xyawej kan chirij jun ak'ual y xalex jun ti ral.

⁴K'ari' ri Jehová xubij chik k'a chuwe: Ri awalk'ual Jezreel k'a ri rubi' ri xtaya', roma yin xa kan xtinbenya' yan k'a rutojbalil-mak pa kiwi' ri e rijatzul kan ri Jehú, roma ronojel ri kamik ri xkiben chupan ri taq'aj Jezreel y xtik'is ri ajawaren richin ri tinamit Israel.

⁵Napon yan k'a ri q'ij richin toq ri aj-labal richin ri tinamit Israel xkebech'akatej chiri' pa taq'aj richin Jezreel, xcha'.

⁶Ri wixjayil xyawej chik k'a jun bey y xk'oje' chik jun ti ral xten y ri Dios xubij k'a chuwe: Ri ti ami'al xtubini'aj: Man Jun Xtijoyowan ruwech,*f1* roma yin kan man xtinjoyowaj ta chik ruwech ri tinamit Israel y kan man xtinkoch' ta chik.

⁷Jak'a ri e aj-Judá xtinjoyowaj kiwech, ja yin ri in ki-Dios ri xkikolon kichin. Kan xkenkol k'a y man rik'in ta rute-ch'ab ni espada, ni man rik'in ta labal, ni man rik'in ta kiej y ni man kik'in ta achi'a' ri yech'oke' chirij kiej, xcha' chuwe.

⁸Toq ri wixjayil xrelesaj rutz'um ri ak'ual ri rubini'an: Man Jun Xtijoyowan ruwech, xyawej chik k'a kan jun bey y xk'oje' jun chik ti ral ala'.

⁹Y ri Dios xubij chik k'a chuwe: Ri ti ak'ajol xtubini'aj: Ri Man Nutinamit Ta,*f2* roma wakami rix xa man ix nutinamit ta chik y yin man in i-Dios ta chik, xcha'.

¹⁰K'o k'a jun q'ij ri israelita xkebek'iyer janila, kan xtibekibana' k'a achi'el ri sanayi' ri k'o chuchi' ri palou ri kan man jun nitikir netan ni najlan richin. Pa ruk'exel xtinbij chike chi man e nutinamit ta chik, kan xtinbenbij k'a chike: Rix kan ix walk'ual yin ri in k'aslik Dios, xkicha' chike.

¹¹Xtapon k'a ri q'ij xtikimol-ki' ri aj-Judá y ri aj-Israel xtikikanoj k'a xaxe jun aj-raqen richin nik'oje' pa kiwi' chi ka'i' ajawaren. Konojel k'a ri winaqi' ri e talutajineq xketzolej chik pa Jerusalem. Toq xtiban chik ri molojri'il pa Jezreel kan xtibanatej k'a jun nimalej ch'akonik chupan ri q'ij ri'.