Read Kaqchikel Os 3 Bible Online

Os 3 - Kaqchikel bible

Os 3

¹Ri Jehová xch'on chik k'a jun bey wik'in yin Oseas y xubij chuwe: Wakami kan tawajo' chik jun bey jun ixoq itzel ruk'aslen ri ajowan koma ch'aqa' chik achi'a'. Kan tawajo' k'a achi'el ri wajowabal yin Jehová, kik'in ri tinamit Israel. stape' ri winaqi' ri' xa kan xekitzeqelibej ch'aqa' chik dios. Y kan niqa' chikiwech ri kaxlan-wey ri banon rik'in uva ri sujun chik chikiwech ri Baal, xcha' chuwe.

²Keri' yin kan xinloq' k'a ri ixoq ri' richin chi xok wichin. K'o chi xinya' pa ruk'exel rija' wolajuj raqen saqipueq y 330 litro cebada.

³Y xinbij k'a chire: Wakami kan yatok k'a wichin y man richin ta ok ka'i-oxi' q'ij. Kan man xtak'uaj ta chik ri itzel k'aslen. Man xkabe ta chik rik'in jun chik achin. Yin chuqa' kan xtinchajij-wi' chi kan xaxe in awichin rat, xicha' chire.

⁴Keri' chuqa' ri tinamit Israel, kan k'iy k'a q'ij xkek'oje' chi maneq ki-rey. Man xkek'oje' ta chik k'a tata'al chikikojol, Man xtikisuj ta chik kamelabel q'ij-q'ij, ni ri paban taq abej, ni ri efod, ni ri ch'aqa' chik ki-dios man xkek'oje' ta chik kik'in.

⁵Chirij ri' xketzolej chik pe ri israelita, kan xtikikanoj chik k'a ri Jehová ri ki-Dios. Xtikikanoj k'a ri ki-rey chikikojol ri e rijatzul kan ri David. Chupan ri ruk'isibel taq q'ij kan xtikik'en rukiy ri Jehová. Kan xkekikot k'a rik'in ronojel ri rubanon rija' kik'in.