Read Kaqchikel Os 4 Bible Online

Os 4 - Kaqchikel bible

Os 4

¹Chi'iwonojel rix winaqi' ri ix rijatzul kan ri Israel, kan tiwak'axaj k'a ri ruch'abel ri Jehová. Rija' kan nuch'ojij k'a chike ri winaqi', ri ek'o chupan re ruwach'ulew re'. Roma kan maneq k'a qitzij banonri'il kik'in; chuqa' maneq ri retamabal ri Dios kik'in.

²Ri Dios nubij: Xa kan ruyon k'a tz'ukuj taq tzij k'o chikikojol, xaxe yekamisan, ye'eleq', nikibanala' ixoqinik y ch'aqa' chik itzel taq banobel. Kan jantape' k'a chi kamik nibanatej chupan ri ruwach'ulew Israel.

³Roma ri' kan xtibek'oje' k'a bis chupan ri ruwach'ulew. Konojel ri k'o kik'aslen kan xtik'is k'a kuchuq'a'. Ri chikopi' ri e aj pa q'ayis y ri aj-xik' taq chikopi', kan xkeken chuqa'. Jajun ri ker ri ek'o pa ya' kan xkeken chuqa'.

⁴Jun wineq kan man xtich'ojin ta chire jun chik wineq. Re ch'ojinik re' kan chike k'a ri e sacerdote.

⁵Ri e sacerdote kan xketzaq k'a ri paq'ij, chikij rije' xketzaq k'a ri e q'alajirisanela', y ri ruwach'ulew kan xtink'is.

⁶Ri nutinamit maneq etamabel rik'in roma ri' xk'is, roma rix sacerdote ximalij kan ri etamabel; Yin chuqa' xa xtinwelesaj chiwe ri samaj richin sacerdote. Roma kan ximestaj kan ri pixa' ri xinya' chiwe. Yin chuqa' kan xkenmalij kan ri iwijatzul.

⁷Rokik más xek'iyer-q'anej ri sacerdote, keri' chuqa' más xk'iyer-q'anej ri mak chinuwech yin. Yin kan xtinben k'a chi pa ruk'exel ri ruwaq'ijaj ri kik'uan, xa kan xtikiya' k'a kik'ix.

⁸Rik'in k'a ri sipanik ri nuya' ri tinamit richin nikuyutej kimak, rik'in ri' e k'es-wi. Roma ri' rije' kan nikirayij chi ri nutinamit nimakun ta más.

⁹Kan xtinya' k'a rutojbalil-mak pa ruwi' ri nutinamit. Junan kik'in ri sacerdote, xtikik'ul k'a rutojbalil ri kibanobal.

¹⁰Roma xa xkimestaj chi k'o chi yinkisamajij, xkewa' k'a, jak'a xa man xtinoj ta kipan. Xkemakun kik'in ixoqi', jak'a xa man xkewinaqir ta. Ronojel re' xtipe pa kiwi' roma xa xinkimalij kan.

¹¹Ri itzel banobel y ri vino kan nuben chi ri nutinamit nisach ruk'u'x y man nuna' ta ri achike yeruben.

¹²Ri nutinamit ja chik ri e wachibel ri e banon rik'in che' ri yekik'ulubej-apo. Nikikusaj taq che' richin nikibananej chi ketaman ri peteneq chikiwech. Kan xch'akatej yan k'a roma ri itzel taq banobel. Ri nutinamit xa kan kitzeqeliben k'a ri itzel taq banobel. Xa xemakun k'a y xkich'er kan ki' wik'in.

¹³Xekamela'an pa ruwi' taq juyu', xekiporola' pom pa ruwi' taq tanatik. Keri' xkiben chuxe' taq che' ri janila kixaq. Roma ri' xemakun ri kimi'al. Ri kali' xemakun kik'in ch'aqa' chik achi'a'.

¹⁴Jak'a yin kan man xtinya' ta k'a rutojbalil-mak pa kiwi' ri kimi'al toq xkemakun. Ni pa kiwi' ri kali' toq xkek'oje' kik'in ch'aqa' chik achi'a'. Roma xa kan ja rix ri xkixbe kik'in ri ixoqi' ri itzel kik'aslen; y richin nisuj kamelabel chikiwech ri wachibel, kan xkixk'oje' k'a kik'in ixoqi' ri itzel kik'aslen. Keri' toq nitzaq jun tinamit ri maneq runa'oj.

¹⁵Wi rat Israel yamakun, kan tabana' k'a. Xa rik'in man ta nimakun ri Judá. Israel, man kixbe pa Guilgal, man kixjote-q'anej pa Bet-aven, y man tiya' itzij pan nubi' yin, Jehová.

¹⁶Ri ruwach'ulew Israel xa kan rupaban-ri' achi'el jun alaj wákix ri kan man jun nitikir rik'in. Keri' rubanon richin xuch'er kan ri' wik'in yin Jehová. Roma ri' kan xkenwisq'opej k'a kan y man xkenyuqej ta chik.

¹⁷Ri aj-Israel kan kijachon k'a ki' chuya'ik kiq'ij wachibel, kan tik'oje' na k'a keri'.

¹⁸Ri vino ri nikiqum xa kan xeruq'abarisaj, kan janila k'a chi mak yekiben. Ri e tata'al kan ruyon chik k'a ruk'ixbilal ri yekibanala'.

¹⁹Xtapon k'a ri q'ij toq xtipe achi'el jun surkum chikij y kan xkeruk'uaj. Xtoqaqa k'a chikik'u'x ri kamelabel ri yekisujula' y xa xkek'ixbitej roma ri', ncha' ri Dios.