Read Kaqchikel Os 5 Bible Online

Os 5 - Kaqchikel bible

Os 5

¹Ri Jehová nubij: Rix sacerdote kan tiwak'axaj k'a ri xtinbij. Tinamit Israel, kan tiya' k'a ixikin chire ronojel re', rix ri ix aj pa rachoch ri rey kan tiwak'axaj k'a. Ronojel ri q'atoj-tzij ri xtiberuya' ri Dios, kan pan iwi' k'a rix xtiqaqa-wi ronojel. Rix xa kan xixok k'a jun pikbel chupan ri tinamit Mizpá, achi'el jun ya'l ri rik'il, keri' xiben pa ruwi' ri juyu' Tabor.

²Achi'el xa ta jun pozo ri xiben chire ri Sitim. Roma kere' xiben, kan xtinya' k'a rutojbalil-mak pan iwi'.

³Yin kan jebel k'a wetaman ruwech ri Israel, kan man ewatel ta chinuwech yin. Ri Israel xa kan xmakun k'a chinuwech, xa kan xutz'ilobisaj-ri'.

⁴Ri itzel taq kibanobal, man nuya' ta q'ij chike richin nitzolej-pe kik'u'x wik'in yin, ri ki-Dios. Xa kan xaxe k'a ch'obonik richin etzelal ri k'o chikikojol. Roma ri' xkimestaj nuwech yin Jehová.

⁵Ri runimirisanen ri tinamit Israel xa kan xtiq'alajirisex k'a chupalej. Ri Israel xa xtibetzaq k'a chupan ri rumak. Keri' chuqa' ri Judá xa kan xkerutzeqelibej, xa kan xtitzaq junan kik'in rije'.

⁶Chirij k'a ri' xkekik'uaj k'a ri kiwákix y ri kikarne'l, richin chi xkinkikanoj yin Jehová. Jak'a xa kan man xkinkil ta roma yin xa man xkik'oje' ta chik kik'in.

⁷Kan xemakun k'a chinuwech roma ek'o alk'ualaxela' kik'in ri xa jun chik kitata'. Roma ri' pa jun ik' xkebek'is konojel, rije' y ri kiruwach'ulew.

⁸Tixupux k'a ri xupubel pa Guibeá, tixupux k'a ri trompeta retal labal pa Ramá. Kan tiya' k'a ri retal rik'in raqoj-chi'ij pa Bet-aven. Kan kak'ark'ot k'a roma xibinri'il rat ruwach'ulew Benjamín.

⁹Kan ninya' k'a rutzijol chire ri Israel ri xtibebanatej. Ri ruwach'ulew Israel kan xtitole' k'a kan jumul, chupan ri q'ij richin ri tojbalil mak.

¹⁰Ri e aj-raqen richin ri ruwach'ulew Judá kan xkiben k'a achi'el nikiben ri eleq'oma' richin k'ulba't. Pa kiwi' rije' kan xtinchoxij k'a pe ri woyowal achi'el xa ta ya'.

¹¹Ri Israel kan poqonatajineq roma kan xya'ox rutojbalil-mak pa ruwi' ri kan ruk'amon richin nuk'ul. Roma kan xerutzeqelibej ri xa man jun kejqalen.

¹²Yin kan xtintz'ila' k'a ri ruwach'ulew Israel, chire ri Judá chuqa' kan xkinok k'a achi'el ri yabil ri nutej ri baq.

¹³Ri Israel kan xtuna' k'a rukiy ri ruk'ayewal, keri' chuqa' ri Judá kan xtuna' k'a rukiy ri ruyabilal. Xtibekik'utuj k'a to'onik pan Asiria, xtibekik'utuj k'a utzil chire ri nimalej rey. Jak'a rija' xa man xtitikir ta xkeraq'omaj y man xkeruto' ta.

¹⁴Yin kan xkiyakatej k'a chirij ri Israel, achi'el toq niyakatej royowal jun koj. Xkiyakatej chuqa' chikij ri aj-Judá achi'el nuben jun alaj koj. Kan jak'a yin xkiwulan kichin, chirij ri' kan xkitzolej k'a; xkenchop k'a y man jun xkekolon pa nuq'a'.

¹⁵Xkitzolej k'a y xkibe akuchi ink'o-wi. Xkik'oje' chiri' k'a toq xtitzolej-pe kik'u'x chire ri kimak. K'a toq ri winaqi' xtikiya' chik wejqalen yin. Chupan k'a ri tijoj-poqonal xkinkikanoj, xcha' ri Jehová.