Read Kaqchikel Joel 1 Bible Online

Joel 1 - Kaqchikel bible

Joel 1

¹Ri ruch'abel ri Jehová xpe wik'in yin Joel, ri in ruk'ajol kan ri Petuel. Y jare' ri rutzijol ri xuya' chuwe:

²Tiwak'axaj k'a rix achi'a' ri k'o iq'ij, chuqa' tiwak'axaj rix chi'iwonojel ri ixk'o chupan re ruwach'ulew Judá. ¿K'o kami k'uluwachitajineq chupan re q'ij re'? ¿K'o kami k'uluwachitajineq pa kiq'ijul ri qate-qatata'?

³Chirij re' xtitzijoj k'a chike ri iwalk'ual, ri iwalk'ual chike ri kalk'ual rije', ri kalk'ual rije' chike ri jun chik sol winaqi'.

⁴Ri xkiya' kan ri jut, xkitej-el ri kokoj taq sak'; ri xkiya' kan ri kokoj taq sak', xkitej-el ri nima'q taq sak'; y ri xkiya' kan ri nima'q taq sak' xkitej-el ri janila chi sak'.

⁵Roma ri', kixyakatej rix q'abarela', y kixoq'. Tiraqa' ichi' roma bis chi'iwonojel ri yixqumu vino, roma ri ruya'al uva kan xelesex-el chiwe.

⁶Xepe ri janila chi sak'; xepe achi'el jun tinamit winaqi' ri janila kuchuq'a', y man tikirel ta richin xe'ajlex. Ri key kan e ch'ut e ch'ut achi'el key ri koj.

⁷Kan xkik'is k'a ri tiko'n richin uva; chuqa' kan xkik'is ri che' richin wíkix. Kan xkik'is k'a ronojel ri rij taq che' k'a xbeq'alajin na pe ri seq chire ri ruq'a'.

⁸Roma ri' kixjoq' k'a, achi'el noq' jun xten; jun xten ri kan rukusan jun tzieq richin bis, achi'el nroq'ej rukamik ri ala' ri nibek'ule' yan rik'in.

⁹Chuqa' ke'oq' ri sacerdote richin ri Jehová, roma man jun chik sipanik napon pa rachoch ri Dios. Maneq chik sipanik richin jalajoj ruwech ixin, ni ta ri vino.

¹⁰Ri ruwach'ulew xa kan xtole' kan; ri ulew k'o pa bis roma ri trigo xk'is-el ruwech, chuqa' ri tzeqaj uva kan xechaqi'j-qa, keri' chuqa' ri olivo xemayamo-qa.

¹¹Kan janila k'a kixbison rix tikonela', tiraqa' ichi' roma bis rix tikoy taq uva; roma ri trigo y ri cebada xa xk'is-el kiwech.

¹²Ri juwi-uva y ri che' richin wíkix xechaqi'j-qa; keri' chuqa' ri granada y ri palma; ri che' richin ri manzana keri' chuqa' xkiben, y ronojel kiwech che' ri ek'o pa juyu'. Roma ri' xk'is-el ronojel kikoten kik'in ri winaqi'.

¹³Tikusaj itziaq richin bis rix sacerdote; tiraqa' ichi' roma bis rix ri ix richin ri qa-Dios. Kixbison chi junaq'a' rix ri yixsamej rik'in ri porobel, roma pa rachoch ri qa-Dios maneq chik sipanik napon; achi'el ri vino y ri jalajoj ruwech ixin.

¹⁴Ke'iwoyoj konojel ri winaqi' ri ek'o chuwech re ruwach'ulew re'; tibij chike richin man yewa' ta. Ke'imolo' ri e rijita'q taq achi'a' ri k'o kiq'ij; tiya' rutzijol chi k'o jun molojri'il chupan ri rachoch ri Jehová ri qa-Dios, tik'utuj chire richin yojruto'.

¹⁵Toq'ex qawech roma peteneq q'ij richin ruk'ayewal, roma ri q'ij richin ri Jehová xa naqaj chik k'o-wi-pe. Ri Jehová ri k'o nimalej uchuq'a' pa ruq'a' kan xtuk'is k'a ronojel.

¹⁶Roma kan xqatz'et rik'in runaq' taq qawech toq xelesex ri qaway. Ronojel ri kikoten ri k'o chupan ri rachoch ri qa-Dios kan xk'is.

¹⁷Ri ija'tz xa kan xeken kojol boloj. Ri yakonabel xa xewuluwu-qa roma maneq trigo, roma ri raqen trigo xa xchaqi'j-qa.

¹⁸Janila ye'oq' ri q'ataj taq bóyix; nikikanoj ri kiq'os, y xa man nikil ta, roma maneq chik kiq'os. Chuqa' ri tzobaj taq karne'l xa yeken yan qa.

¹⁹Kan chawe k'a rat Jehová ri jantape' niqak'utuj, roma ri q'aq' kan xuk'is ri q'os ri ek'o pa taq soq'olbel; chuqa' xeruk'et ri che' ri ek'o pa juyu'.

²⁰Chuqa' ri chikopi' ri ek'o pa k'echelaj ye'oq' chawech rat, roma xechaqi'j-qa ri ch'uti'n raqen taq ya', y ri q'aq' xuk'is ri q'os ri ek'o pa taq'aj.