Read Kaqchikel Joel 3 Bible Online

Joel 3 - Kaqchikel bible

Joel 3

¹Toq xtapon ri q'ij ri' yin xkixinwurtisaj chik rix aj-Judá; y rix aj-Jerusalem kan xkixkikot rik'in ri urtisanik ri xtinya-pe.

²Ri chiri' pa taq'aj kojol juyu' richin kan ri Josafat, yin xkenmol k'a konojel tzobaj winaqi' richin ri ruwach'ulew. Y chiri' xtinq'et-wi tzij pa kiwi' rije', roma janila itzel xkiben chire ri nutinamit; kan xekik'uaj-el ri israelita, xekitaluj chikikojol winaqi' richin ch'aqa' chik ruwach'ulew, y ri kulew kan xkitaluj chikiwech rije'.

³Y kan xekiya' pan etz'anen ri nuwinaq richin xekik'uaj; chuqa' kan xekik'ayij-el ri taq ak'uala' chi alaboni' chi xtani'. Y ri méro xkikusaj richin xek'oje' kik'in ixoqi' ri man utz ta kik'aslen, richin chuqa' xkiloq' vino chire richin xkiqum.

⁴Wakami rix ri aj-Tiro, ri aj-Sidón y chijun ruwach'ulew Filistea, ¿achike k'a niwajo' chuwe yin? ¿Niwajo' niben ruk'exel chuwe yin? Wi niwajo' niben ruk'exel chuwe yin, yin chuqa' xtinya' ruk'exel pan iwi' rix.

⁵Roma rix kan xiweleq'aj-el ri nusaqipuaq, ri nuq'anapuaq y ronojel ruwech beyomel ri kan e jebejoj ok richin xe'ik'uaj pa kachoch ri i-dios.

⁶Kan xe'ik'ayij-el nej ri nuwinaq aj-Judá y ri aj-Jerusalem; kan xe'ik'ayij-el chike ri aj-Grecia richin xe'iwelesaj-el chupan ri kiruwach'ulew.

⁷Titz'etana-pe' yin kan xkenbenk'ama-pe ri akuchi xe'ik'ayij-wi-el y k'ari' xtintzolij ruk'exel chiwe rix.

⁸Y kan xkenk'ayij k'a ri iwalk'ual chike ri aj-Judá, y rije' xkekik'ayij chik chike ri winaqi' sabeo, ri ek'o janila nej. Yin Jehová ri yibin.

⁹Titzijoj re' chike konojel winaqi' richin ronojel re ruwach'ulew. Tiya' rutzijol chi k'o jun labal. Ke'iwoyoj-pe ri achi'a' ri maneq xibinri'il chikiwech: Kixanpe rix achi'a' ri kan ix richin labal.

¹⁰Chi'iwonojel tibana' ikamisabal chire ri isamajibal. Tibij chi k'o iwuchuq'a', stape' xa maneq uchuq'a' iwik'in.

¹¹Kan chi'anin tikimolo-pe-ki' konojel winaqi' richin re ruwach'ulew; timolo-pe-iwi' rix ri ixk'o-pe naqaj, y kan ja ri Jehová ri xtibanon labal.

¹²Ri Jehová nubij: Kixk'astej k'a winaqi' richin re ruwach'ulew; y kixjote-pe pa taq'aj kojol juyu' ri richin kan ri Josafat. Roma chiri' xkitz'uye-wi yin richin ninq'et-tzij pan iwi' rix. Xtinq'et-tzij pa kiwi' konojel ajawaren ri ek'o chikinaqaj.

¹³Kan kekamisex, y ketzaq achi'el nitzaq ri trigo toq q'en chik y niq'at. Kan ke'ipitz'a' k'a achi'el nipitz' ri uva, roma ri kimak kan janila k'iy, achi'el ruk'iyal ri vino.

¹⁴Ri chiri' janila chi winaqi' ek'o richin ninq'et-tzij pa kiwi' roma xa naqaj chik k'o-wi-pe ri q'ij wichin yin.

¹⁵Ri q'ij y ri ik' xkeq'equmatej, y ri ch'umila' kan man xkeyik'lun ta chik.

¹⁶Jari' toq yin xtinreq nuchi' pa juyu' Sión, xkich'on kan achi'el koqolajay pa Jerusalem. Ri kaj y ri ruwach'ulew kan xkek'ark'ot k'a, jak'a yin kan xkento' ri nutinamit Israel.

¹⁷Y xtiwetamaj chi ja yin Jehová ri i-Dios y yin xkik'oje' chiri' pa juyu' Sión. Y ri tinamit Jerusalem kan ch'aron wichin yin. Y man jun bey chik xtich'akatej koma ch'aqa' chik winaqi' ri man e aj chiri' ta.

¹⁸Chupan apo ri q'ij ri', ri uva kan xtiwachin kojol q'ayis, y ri kokoj y nima'q taq awej xkeyuq'ux kojol taq juyu', y xtikiya' jebelej leche. Ri taq siwan ri ek'o pa Judá kan xke'ok ch'uti'n raqen ya'. Y chuchi' ri wachoch xtalex-el jun raqen-ya' ri napon k'a pa taq'aj richin Sitim.

¹⁹Jak'a ri ruwach'ulew Egipto kan xtitole' kan, y ri Edom kan xtibe'ok jun tz'iran ruwach'ulew; roma kan xekikamisaj ri aj-Judá, y chupan ri kiruwach'ulew xbiyin kikik'el ri xa man jun kimak.

²⁰Ja yin Jehová xkikamisan kichin ri xebanon etzelal, y kan man xtinkuy ta ri kimak. Jak'a ri aj-Judá kan jantape' k'a xkek'oje' chiri' y ri aj-Jerusalem, chi wiq chi tanaj xtikiben chiri'. Y yin Jehová xkik'oje' jantape' chiri' pa Sión, nicha' ri Jehová, xicha' yin Joel.