Read Kaqchikel Am 1 Bible Online

Am 1 - Kaqchikel bible

Am 1

¹Yin nubini'an Amós, jun chike ri yuq'unela' ri ek'o pa tinamit Tecoa. Ri Jehová xch'on k'a wik'in pa ruwi' ri xtuk'uluwachij ri ruwach'ulew Israel ri k'o pa xaman. Re ch'abel re' xbix chuwe toq niq'aton-tzij ri Ozías pa ruwi' ri ruwach'ulew Judá, y toq ri Jeroboam ruk'ajol ri Joás niq'aton-tzij pa ruwi' ri ruwach'ulew Israel. K'o yan k'a ka'i' juna' tibix chuwe toq xuben ri nimalej silonel. Y kere' k'a ri rutzijol ri xuya' ri Dios chuwe:

²Ri Jehová nisik'in pa ruwi' ri juyu' Sión; kan nak'axatej-el k'a pa Jerusalem achi'el niq'ajan ri koqolajay. Ri soq'olbel kan nichaqi'j-qa; keri' chuqa' nichaqi'j-qa ri ruwi' ri juyu' Carmelo.

³Kere' nubij ri Jehová pa kiwi' ri aj-Damasco: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' kan ik'owineq chik k'a ruwi' ri tijoj-poqonal ri xkiben chike ri aj-Galaad, roma xkiben chike achi'el xa ta nich'ay ri trigo rik'in q'eqapueq.

⁴Roma ri' xtinya' ruq'aq'al ri rachoch ri rey Hazael, y ri q'aq' ri' xtuk'is k'a chuqa' ri jay richin tobel ri richin ri rey Ben-hadad.

⁵Kan rik'in ri nimalej wuchuq'a' xtinjoq' ruchi' ri tz'aq richin ri Damasco. Kan xtinkamisaj ri rey richin ri Bicat-avén. Chuqa' xtink'is ri niq'aton-tzij pa ruwi' ri Bet-edén. Ri aj-Siria xke'uk'uex-el pa ximonri'il pa ruwach'ulew Quir. Yin Jehová ri yibin.

⁶Kere' nubij ri Jehová pa kiwi' ri aj-Filistea: Ri kimak kan xik'o yan chik ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije', kan konojel winaqi' xekik'uaj-el pa ximonri'il. Kan konojel k'a xebekik'ayij chike ri aj-Edom.

⁷Roma ri' xtinya' ruq'aq'al ri tz'aq ri sutiyon-rij ri tinamit Gaza, y ri q'aq' ri' chuqa' xtuk'is ri jay richin tobel richin ri rey.

⁸Kan xtinkamisaj ri rey richin ri Asdod. Chuqa' xtink'is ri niq'aton-tzij pa ruwi' ri Ascalón Rik'in ronojel wuchuq'a' xtinya' tijoj-poqonal pa kiwi' ri aj-Ecrón k'a toq xkenk'is konojel ri aj-Filistea. Yin Jehová ri yibin.

⁹Kere' nubij ri Jehová pa kiwi' ri aj-Tiro: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije', kan konojel ri winaqi' xekik'uaj-el pa ximonri'il. Kan konojel k'a xebekik'ayij chike ri aj-Edom, stape' junan kiwech kik'in ri israelita.

¹⁰Roma ri' xtinya' ruq'aq'al ri tz'aq ri sutiyon-rij ri tinamit Tiro y ri q'aq' ri' xtuk'is ri jay richin tobel ri richin ri rey.

¹¹Kere' nubij ri Jehová pa kiwi' ri aj-Edom: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' xekitzeqelibej ri kiwinaq israelita richin xekikamisaj. Y kan man xkijoyowaj ta kiwech. Ri ch'upun-k'u'x ri xk'oje' kik'in kan janila nim. Kan man xkiq'et ta ruwi' ri koyowal.

¹²Roma ri' xtinya' ruq'aq'al ri tinamit Temán y ri q'aq' ri' xtuk'is ri jay richin tobel richin ri rey richin Bosrá.

¹³Kere' nubij ri Jehová pa kiwi' ri aj-Amón: Ri kimak kan xik'o yan ruwi' ri yekiben. Roma ri' kan xtinya' k'a jun nimalej ruk'ayewal pa kiwi'. Rije' xkiqupij kipan ri ixoqi' ri koyoben alanik ri chiri' pa ruwach'ulew Galaad. Ronojel re' xkiben xaxe richin chi ninimer ri kulew.

¹⁴Roma ri' xtinya' ruq'aq'al ri tz'aq richin ri tinamit Rabá y ri q'aq' ri' xtuk'is ri jay richin tobel richin ri rey. Ri e etzelanel kichin kan xkepe k'a rik'in raqoj-chi'ij richin oyowal. Rik'in uchuq'a' xkepe chikij achi'el nuben ri surkum.

¹⁵K'ari' ri ki-rey xtuk'uex-el pa ximonri'il. Ri aj-raqen xke'uk'uex-el junan rik'in rija'. Yin Jehová ri yibin.