Read Kaqchikel Am 7 Bible Online

Am 7 - Kaqchikel bible

Am 7

¹Ri Dios xuk'ut chinuwech pa jun achik' re xtintzijoj chiwe wakami: Rija' kan yerunaba' k'a sak' richin yebebos-pe pa taq tiko'n. Y re' xbanatej toq xelesex yan el ri nabey tiko'n ri richin ri rey, toq k'a man jani tapon ri q'ij richin nik'ol ri ch'aqa' chik tiko'n.

²Y chupan ri achik' ri', xintz'et k'a chi ri sak' xkik'is ronojel tiko'n. Y jari' toq yin xisik'in y xinbij: Jehová, takuyu' ri qamak. ¿Achi'el kami toq xtiqakoch' roj ri oj israelita, roma roj xa kan yalan oj juba' ok?, xicha'.

³K'ari' ri Jehová xujoyowaj qawech y xubij chi man xtik'uluwachitej ta.

⁴Ri Dios xuk'ut chinuwech jun chik achi'el achik' y xintz'et k'a chi xuteq-pe ruk'ayewal rik'in q'aq' pa qawi'. Y kan xuchaqirisaj ri nimalej palou ri k'o chuxe' ri ruwach'ulew y xuchop yan nuporoj ri qasanbel ulew.*f2*

⁵Jari' toq yin xisik'in y xinbij chire: ¡Jehová ri atk'o pa ruwi' ronojel, tabana' utzil man tateq-pe ri q'aq' pa qawi'! ¿Achi'el kami toq xtiqakoch' roj ri oj israelita, roma roj xa kan yalan oj juba' ok?, xicha'.

⁶K'ari' ri Jehová xujoyowaj qawech y xubij chi man xtik'uluwachitej ta.

⁷Ri Jehová xuk'ut chik chinuwech jun achi'el achik'. Y xintz'et chi rija' pa'el pa ruwi' jun tz'aq, y ruchapon jun k'an ri k'o jun plomo chutza'n achi'el nukusaj jun aj-tz'aq.

⁸Y xuk'utuj chuwe: ¿Achike ri natz'et?, xcha'. Y yin xinbij chire: Nintz'et jun plomo ri nukusaj ri aj-tz'aq, xicha'. Y ri Jehová xubij chuwe: Rik'in re jun plomo re' yin yitikir nintz'et chi man choj ta kik'aslen ri awinaq israelita. Y roma ri' kan man jun bey chik xtinkuy ri kimak.

⁹Ri juyu' ri akuchi nikiya' kiq'ij ri ki-dios kan xtik'is jumul. Ri kachoch ri ki-dios kan xkewulatej kan. Y ri aj pa rachoch kan ri Jeroboam kan xkenkamisaj rik'in espada, xcha'.

¹⁰Ri Amasías jari' ri sacerdote chiri' pa Betel. Y rija' xuteq rubixik chire ri Jeroboam rey richin Israel, y xubij chi yin yibiyaj chikikojol ri qawinaq israelita richin yich'on itzel chirij ri rey. Y xubij chuqa' chi ri winaqi' kan xik'o yan kik'u'x richin yinkak'axaj,

¹¹roma ninbij chi ri Jeroboam nibekamisex rik'in espada, y konojel ri ruwinaq xke'uk'uex-el pa ximonri'il.

¹²K'ari' ri Amasías xubij chuwe: ¡Katel-el re wawe' rat q'alajirisey richin ri nibanatej! Wi nawajo' naq'axbej-awi' rik'in naq'alajirisaj re', kabiyin pan aruwach'ulew Judá, y katkitojo' rije'.

¹³Man jun chik taq'alajirisaj re wawe' pa Betel, roma re wawe' jare' ri akuchi nuya-wi ruq'ij ri ru-dios ri rey, xcha'.

¹⁴Jari' toq xinbij chire ri Amasías: Yin man in jun ta q'alajirisey ruch'abel ri Dios, ri ninben ta richin ninch'ek nu-méro. Rubanon kan xa in yuq'unel, y yenwux wíkix ri ek'o pa k'echelaj.

¹⁵Jak'a ri Jehová xirelesaj-pe chupan ri samaj ri', y xubij chuwe chi kibe y kibech'on pa rubi' rija' chiwe rix.

¹⁶Roma ri' tawak'axaj k'a ri ruch'abel ri Jehová. Rat Amasías xabij chuwe chi man jun tinq'alajirisaj chirij ri achike xtibek'uluwachitej wawe' pan Israel, ni man jun tinbij chiwij rix.

¹⁷Roma ronojel re', ri Jehová xuteq-pe re rutzijol re' chawe: Ri awixjayil xtuchop itzel k'aslen wawe' pa tinamit. Ri awalk'ual xkekamisex rik'in espada. Ri awulew xtitalux chikiwech ch'aqa' chik winaqi'. Rat xkaken chiri' pa ruwach'ulew Asiria. Y konojel ri awinaq israelita xke'uk'uex-el pa ximonri'il; xke'uk'uex-el nej chire ri kiruwach'ulew, nicha' ri Jehová, xcha' ri Amós.