Read Kaqchikel Am 8 Bible Online

Am 8 - Kaqchikel bible

Am 8

¹Ri Jehová Dios xuk'ut chinuwech pa jun achi'el achik'. Y xubij chuwe: ¿Achike ri natz'et?, xcha'. Y yin xinbij chire: Nintz'et chi k'o k'a jun chakech nojineq rik'in ruwech che' ri kan jebel e cheq', e cheq' chik, xicha'.

²Y ri Dios xuk'utuj chuwe ri achike nintz'et. Y yin xinbij chire chi nintz'et jun chakech ruwech che' ri jebel e cheq', e cheq' chik. Y ri Dios xubij chuwe: Achi'el re ruwech che' re', ri utz chik richin yewux y nimol kichi', keri' chuqa' ri winaqi' israelita ruk'amon chik chi yemol y ye'uk'uex-el. Y roma ri' yin kan man jun bey chik xtinkuy ri kimak.

³Chupan ri q'ij ri' ri bix ri nibixex chupan ri rachoch ri ki-dios xa xtok jun bix richin bis. Janila e k'iy winaqi' ri xkeken, y xkepunupuxin kan ri kich'akul chupan ri ruwach'ulew, xcha' ri Jehová.

⁴Tiwak'axaj k'a rix winaqi' ri yixtz'ilo kichin ri maneq ok kiq'ij, y xa kan niben chike ri man jun ok k'o kik'in chi yek'oje' kan más pa meba'il.

⁵Rix nibij: ¿Janipe' k'a nik'is richin ninimaq'ijux ri k'ak'a' ik', richin niqak'ayij ri qa-trigo? ¿Janipe' k'a nik'is ri q'ij richin uxlanen, richin niqak'ayij ri jalajoj ruwech ixin? Tiqakusaj pajbel ri man e tz'aqet ta. Tiqajotoba' rajel ronojel. Tiqakusaj etabel ri man e tz'aqet ta.

⁶Kan xtiqak'ayij ri rij ri trigo. Rik'in ri' keqaloq'o' ri man jun k'o kik'in. Keqajala' rije' rik'in jun k'ulaj xajab, yixcha'.

⁷Ri Jehová, ri qa-Dios roj israelita, xuya' rutzij pa rubi' rija', chi man jun bey xtumestaj ri itzel taq ibanobal ri xe'iben.

⁸Kan xtisilon ri iruwach'ulew roma ronojel re'. Chi'iwonojel rix kan xkixoq'. Ri iruwach'ulew xtijote' y xtiqaqa achi'el nuben ri raqen-ya' Nilo.

⁹Ri Jehová ri k'o pa ruwi' ronojel kere' nubij: Chupan ri q'ij ri' xtinben chi niq'equmer ri q'ij chupan ri nik'aj-q'ij; Toq nik'aton ri q'ij, jari' toq xtinben chi niq'equmatej chijun ri ruwach'ulew.

¹⁰Chuqa' xtinben chi ri nimaq'ij xa xtibe'ok richin oq'ej roma ri kaminaqi', Chuqa' ri bix xaxe chik richin q'axo'n. Xtinben chiwe chi xtikusaj itziaq richin bis y kan xtisokaj-el ri rusumal-iwi' richin retal q'axo'n. Xkixoq' k'a achi'el toq noq'ex jun juney ak'ual toq niken. Y kan ronojel xtik'is rik'in q'axo'n.

¹¹Ri Jehová ri k'o pa ruwi' ronojel kere' nubij: Xtipe k'a ri q'ij toq janila xkixwayjan, jak'a man xkixwayjan ta roma niwajo' yixwa-yixuk'ya'. Xa xkixwayjan roma niwajo' chi k'o ta ri nitzijon chiwe ri nuch'abel, yin Jehová.

¹²Ri winaqi' kan xtisach k'a kik'u'x; Kan xtikikanoj k'a ri nuch'abel. Stape' xke'el-el chupan ri Tzayi-Choy, y xke'apon chupan ri palou ri k'o pa qajbel-q'ij; y stape' xke'el-el pa xokon y xke'apon pa xaman, jak'a kan man xtikil ta chik ri nuch'abel.

¹³Ri jebelej taq xtani' y ri alaboni' ri janila kuchuq'a' xkemayamo-qa. Chupan ri q'ij ri' xkemayamo-qa roma chaqi'j-chi'ij.

¹⁴Chi'iwonojel xkixtzaq y man xkixyakatej ta chik: Rix ri nijikiba' itzij chuwech ri wachibel ri k'o pa Samaria, rix ri niya' itzij pa rubi' ri dios ri k'o pa Dan, ri niya' itzij pa rubi' ri dios ri k'o pa Beerseba. Xkixtzaq y man jun bey chik xkixyakatej, xcha'.