Read Kaqchikel Am 9 Bible Online

Am 9 - Kaqchikel bible

Am 9

¹Yin xinben chik jun achi'el achik', y xintz'et ri Jehová pa'el chunaqaj ri porobel, y xubij chuwe: Ke'asiloj ri ruwi' pilar richin xkekorotej ronojel che'; richin nitzaq-qa ronojel pa kiwi' ri winaqi'. Y ri xkekolotej kan, ja yin xkikamisan kichin rik'in espada. Kan man jun xtitikir xtiberewaj-ri', ni man jun xtukol kan ri'.

²Stape' xtikewaj kan ki' chuxe' re ruwach'ulew yin kan xkenwelesaj-pe k'a chiri'. Chuqa' stape' xkejote-q'anej nej chire ri kaj yin kan k'a chiri' xkenbenqasaj-wi-pe.

³Chuqa' stape' xtikewaj-ki' pa ruwi' ri juyu' Carmelo kan k'a chiri' xkenwil-wi-pe. Stape' nibekewaj-ki' chinuwech chupan ri palou, yin xtinteq ri chikop aj pa ya' chikij richin xkeruk'is.

⁴Wi xke'uk'uex-el pa ximonri'il koma ri e etzelanel kichin, xtinben chi xkekamisex rik'in espada. Xtinben ronojel re' roma xinch'ob yan chi xtinya' ruk'ayewal pa kiwi'. y man xtinya' ta urtisanik pa kiwi'. xcha' ri Dios.

⁵Ri Jehová ri Dios ri k'o ronojel uchuq'a' pa ruq'a', nuchop-qa juba' ri ruwach'ulew y ri ulew kan niya'er-qa. Kan jari' toq konojel ri winaqi' nikichop oq'ej. Chupan ri q'ij ri' ri ruwach'ulew kan nijote' y niqaqa achi'el nuben ri raqen-ya' Nilo.

⁶Ri Jehová chila' chikaj xuben-wi ri rachoch, y ri ruxe' ri rachoch k'o-pe chuwech ri ruwach'ulew. Rija' kan yerumol ri ya' richin ri palou, y k'ari' nuya'aj chijun ri ruwach'ulew. Jehová jari' ri rubi' rija'.

⁷Ri Jehová nubij: Chinuwech yin, rix israelita xa ix junan kik'in ri winaqi' etíope. Yin xixinwelesaj-pe pa ruwach'ulew Egipto. Chuqa' xenwelesaj-pe pa ruwach'ulew Creta ri aj-Filistea. Y chupan ri ruwach'ulew Quir xenwelesaj-pe ri winaqi' Sirio.

⁸Yin Jehová xintz'et yan k'a chi rix kan ix janila aj-maki'. Roma ri' kan xkixinwelesaj-el chuwech re ruwach'ulew. Jak'a man xkixink'is ta el jumul.

⁹Yin kan xtinben chiwe rix israelita achi'el xa ta xkixinchayuj kan, achi'el toq nichayux ri trigo. Rix ri yixtzeqeliben wichin kan xkixtalutej k'a el pa taq ruwach'ulew. Jak'a ri man xkinkitzeqelibej ta xa xke'ok achi'el q'ayis ri nichayutej kan.

¹⁰Chi'iwonojel rix ri ix aj-maki' xkixken rik'in espada; stape' nibij chi re' man xtibanatej ta, stape' nibij chi ri ruk'ayewal man xtiqaqa ta chiwij.

¹¹Chupan ri q'ij ri' yin xtinyek chik q'anej jun bey ri rajawaren ri David, achi'el niyak-q'anej jun jay wulatejineq. achi'el toq ninojisex chik ruwech ri tz'aq; achi'el toq niyak chik q'anej ri wulatejineq kan. Y kan xtinben chik chire achi'el ri rubanon ojer kan.

¹²Rix kan xtok k'a iwichin ri ruwach'ulew Edom, y konojel ri ch'aqa' chik ruwach'ulew ri kan e wichin yin. Yin Jehová kan ninya' nutzij chi kan xtibanatej.

¹³Xtapon k'a ri q'ij toq xtiwachin janila trigo; kan k'a man jani tik'ol ronojel tiko'n, kan ja yan ri' nijosq'ix chik jun bey ri ulew. Chuqa' xtapon k'a ri q'ij toq xtiwachin janila uva; kan k'a man jani tik'is ri ruyitz'ik ri uva, kan ja yan ri' nitik chik qa ch'aqa'. Y kan pa ruk'iyal k'a vino ri xtik'oje', kan xtuben k'a achi'el jun raqen ya' ri nibiyin pa juyu'.

¹⁴Kan keri' k'a xtibanatej chi xkixinwelesaj-pe pa ximonri'il rix israelita. Xtipabex chik q'anej jun bey ri itinamit ri e wulatejineq kan, richin xkixk'oje' chik jun bey chiri'. Rix xtitik chik qa i-uva y xtiqum chik ri vino. Chuqa' xtitik qa jalajoj ruwech che' y kan ja rix xkixtijo.

¹⁵Kan jebel xkixinya' chik chupan ri iruwach'ulew achi'el jun che' ri jebel tikil. Y man jun chik xtelesan-el iwichin, akuchi xkixinya-wi. Yin Jehová ri i-Dios ri yibin.