Read Kaqchikel Abd 1 Bible Online

Abd 1 - Kaqchikel bible

Abd 1

¹Yin Abdías xink'ul k'a jun rutzijol rik'in ri Jehová Dios pa ruwi' ri ruwach'ulew Edom. Kere' nubij: Xak'axatej jun rutzijol richin ri Dios; jun uk'uey rutzijol xtaq-el kik'in ri ajawaren, y nubij: Qojyakatej chikij ri aj-Edom richin niqaben labal kik'in, nicha'.

²Jare' k'a ri nubij ri Dios pa ruwi' ri ruwach'ulew Edom: Xtinben chiwe chi maneq iwuchuq'a' chikikojol ri ch'aqa' chik ruwach'ulew; Kan xkixetzelex koma ch'aqa' chik winaqi'.

³Rix ixk'o chukojol nima'q taq abej, ixk'o pa ruwi' taq juyu'; y roma ri' iq'olon-iwi' y chuqa' inimirisan-iwi', y nibij-qa pan iwánima: ¿Achike ta k'a xtitikir xtich'akon chiqij roj?, yixcha-qa.

⁴Jak'a yin ninbij chi stape' ta yixxik'an achi'el ri kot, y chikikojol ta ri ch'umil niben-wi ri isok, yin chuqa' chiri' xkinapon-wi, richin k'a chiri' xkixinqasaj-pe k'a pan ulew.

⁵Wi ta ri eleq'oma' yepe chaq'a' richin ye'eleq'an iwik'in, kan xaxe k'a ri nikajo' rije' ri xtikik'uaj. Chuqa' wi ta yepe iwik'in ri yewuxun uva richin nikeleq'aj, xa kan k'a k'o xtikiya' kan. Jak'a ri e etzelanel iwichin, kan xtikik'uaj-el ronojel.

⁶Ronojel ri k'o iwik'in xtikik'uaj-el. Kan xtikeleq'aj k'a el ronojel ri ibeyomel.

⁷Konojel ri man e iwinaq ta ri xjunamatej-kiwech iwik'in, xa xkixkiq'ol y xkixkelesaj chupan ri iwulew. Stape' xkiben tununri'il iwik'in, xa xkeyakatej-pe richin xkixketzelaj kan. Y stape' xkitijla' ri ikaxlan-way, xa xtikiya' pikbel pan ibey. Y rix man jun xtiq'ax chiwech.

⁸Chupan ri q'ij ri' yin xkenk'is konojel ri etamanela' aj-Edom. Xtinwelesaj ri na'oj chike ri ek'o pa juyu' richin ri Esaú.

⁹Ri aj-labal aj-Temán xkebaybot k'a roma xibinri'il chinuwech yin, y chupan ri juyu' richin ri Esaú man jun chik xtik'oje' kan rik'in ruk'aslen.

¹⁰Ronojel re' xtibanatej roma xe'iwetzelaj y xe'ikamisaj ri iwach'alal e rijatzul kan ri Jacob. Roma ri' xkixk'ixbitej y xkixk'is jumul.

¹¹Chupan ri q'ij toq ri Jerusalem xch'akatej koma ri e etzelanel kichin, rix xa man xe'ito' ta, ri winaqi' ri' xkik'uaj-el ronojel ri k'o kik'in ri aj-Jerusalem. Toq xbanatej ch'akonik pa ruwi' ri Jerusalem, rix chuqa' xa kan xiben achi'el xkiben rije'.

¹²Man ruk'amon ta chi rix xe'iwetzelaj ri iwach'alal toq xech'akatej. Man ruk'amon ta chi xixkikot toq xitz'et chi xwulex ri Judá. Man ruk'amon ta chuqa' xixyojoben chikij toq xek'oje' pa bis.

¹³Man ruk'amon ta richin xixeleq'an chupan ri kachoch chupan ri q'ij richin ri ruk'ayewal. Man ruk'amon ta chi xe'iwetzelaj chupan ri q'ij toq xech'akatej. Man ruk'amon ta chi xik'en-pe ri k'o rejqalen chuwi-kiq'a' chupan ri q'ij richin ri kitzaqik.

¹⁴Man ruk'amon ta chuqa' chi xixpa'e' tzan taq jay richin xe'ikamisaj ri xkito-ki'. Man ruk'amon ta xe'ijech ri winaqi' israelita ri xe'animej chupan ri q'ij richin ri ruk'ayewal.

¹⁵Achi'el ri xiben rix aj-Edom, keri' chuqa' xtiban chiwe rix, ri itzel ibanobal xtitzolix k'a ruk'exel chiwe. roma ri' naqaj chik k'o-wi ri q'ij richin ri Jehová; q'ij richin oyowal pa kiwi' konojel ajawaren.

¹⁶Achi'el ri aj-Judá xkitej poqon chupan ri ruk'ayewal, keri' xtikitej poqon ri ch'aqa' chik winaqi' richin ri ruwach'ulew; kan xtikitej poqon richin xkek'is jumul.

¹⁷Jak'a chupan ri juyu' Sión ek'o ri xkekolotej kan, y ri juyu' ri' kan xtok xaxe richin ri Dios. Ri e rijatzul kan ri Jacob xtikichinaj chik jun bey ri kulew.

¹⁸Ri e rijatzul kan ri Jacob xke'ok achi'el q'aq', y ri e rijatzul kan ri Esaú xa xke'ok achi'el k'im. Ri e rijatzul kan ri José xke'ok achi'el ruxaq q'aq'; xkekik'et y xkekik'is ri aj-Edom. Man jun chik xtikolotej kan chike ri rijatzul kan ri Esaú: Keri' nubij ri Jehová.

¹⁹Ri israelita ri ek'o pa xokon xtikich'ek ri ruwach'ulew Edom richin xkek'oje' chiri', y ri ek'o chuwa taq juyu', xtikichinaj ri ruwach'ulew Filistea, y ri ulew richin ri Efraín y ri Samaria. Chuqa' ri e rijatzul ri Benjamín xtikich'ek ri ruwach'ulew Galaad.

²⁰Ri aj-Samaria ri ek'o pa ximonri'il, xtikichop-qa ri kiruwach'ulew ri aj-Canaán; xtikichinaj ri k'o k'a pa xaman y napon k'a pa tinamit Sarepta. Y ri aj-Jerusalem ri ek'o pa ximonri'il chupan ri tinamit Sefarad xtikichop-qa ri tinamit ri ek'o pa xokon chire ri Judá.

²¹Y rije' xkejote' k'a el pa ruwi' ri juyu' Sión richin xtikiq'et-tzij pa kiwi' ri winaqi' e richin ri Esaú. Y ri q'atbel-tzij ri' xtok richin ri Jehová.