Read Kaqchikel Jon 3 Bible Online

Jon 3 - Kaqchikel bible

Jon 3

¹Y ri Jehová xch'on chik jun bey rik'in ri Jonás y xubij chire chi

²tibiyin pa nimalej tinamit Nínive richin niberuq'alajirisaj ri bin chik chire.

³Y kan xbe k'a ri Jonás achi'el xbix chire roma ri Jehová. Y ri tinamit ri' janila nim; k'o chi yabiyin oxi' q'ij richin nak'is.

⁴Y toq ri Jonás xapon ri chiri', xuchop rubixik chi toq xtitz'aqet kawineq q'ij, ri Nínive xtibek'is. Kere' k'a nubila' beneq, chijun ri nabey q'ij keri' xuben.

⁵Toq ri winaqi' aj-Nínive xkak'axaj ri peteneq pa kiwi', xkinimaj k'a ri ruch'abel ri Dios, y xelesex rutzijol chi man yewa' ta y tikikusaj k'a qiriqoj taq tzieq. Keri' xkiben richin chi xkik'ut chi xkitzolij-ki' chikij chire ri kimak, y kan keri' k'a xkiben chi ch'uti'q, chi nima'q.

⁶Chuqa' xapon rutzijol rik'in ri rey richin ri tinamit ri', y rija' xyakatej chupan ri ruch'akat, y xrelesaj ri rutziaq ri rukusan. Y xukusaj ri tzieq qiriqoj, y k'ari' xtz'uye' pa chaj.

⁷Y ri rey y ri nima'q taq achi'a' xkiteq k'a rubixik chupan ri tinamit Nínive, y kere' k'a xkibij: Man jun chiqe roj ri xtiwa' y xtuk'ya' ta. Chuqa' ri qawej kan man xtiya'ox ta kiya', ni kiq'os.

⁸Xa kan qonojel k'a tiqakusaj tzieq richin bis, y qojch'on rik'in ri Dios. Chuqa' chiqajujunal tiqaya' kan ronojel ri itzel taq qabanobal.

⁹Rik'in juba' rik'in re' ri Dios xqojrukuy, y xtiqaqa ruwi' ri royowal pa qawi' y man xqojken ta, xecha'.

¹⁰Xutz'et k'a ri Dios chi xtzolej-pe kik'u'x ri aj-Nínive chire ri itzel taq kibanobal, y xebe chupan ri chojilej bey. Y roma ri' ri Dios xujoyowaj kiwech y man xuteq ta pe ri ruk'ayewal ri rubin.