Read Kaqchikel Jon 4 Bible Online

Jon 4 - Kaqchikel bible

Jon 4

¹Y toq ri Jehová man xuteq ta pe ri ruk'ayewal pa kiwi' ri aj-Nínive, jari' toq ri Jonás xpe janila royowal.

²Y xch'on rik'in ri Jehová y xubij: ¡Kan xinbij na wi yin toq k'a ink'o na pa nuruwach'ulew, chi kere' naben! Y roma ri' xinanimej richin ta xibe pa Tarsis. Keri' xinben roma wetaman chi at jun Dios koch'onel y joyowanel. Y roma ri awajowabal, kan stape' nabij chi naya' ta jun ruk'ayewal, xa najel chik ri ach'obonik.

³Wakami k'a Jehová nink'utuj utzil chawe, chi tawelesaj k'a el ri nuk'aslen chuwech re ruwach'ulew, roma más utz wi yiken ke chuwech ri in k'es, xcha' ri Jonás.

⁴Jak'a ri Jehová xubij chire: ¿Kan ruk'amon kami chi nipe awoyowal roma re'?, xcha'.

⁵Y ri Jonás xel k'a el chupan ri Nínive, y k'ari' xbe pa relebel-q'ij chuwech q'anej ri tinamit. Y chiri' xuben jun ti rumo'k, y xbetz'uye' k'a pe chupan richin nutzu-pe ri achike xtuk'uluwachij ri tinamit.

⁶Y ri Jehová xuben chi xk'iy k'a pe jun ti che' achi'el ri ricino richin chi xumujaj y xch'uch'u' juba' chire ri k'aten. Y ri Jonás janila xkikot roma re jun ti che' re'.

⁷Jak'a toq xseqer ri ruka'n q'ij ri Jehová xuteq k'a pe jun jut richin xutej ri ruxe' ri ti che' ri', y keri' xken-qa ri ti che'.

⁸Y toq xmeq'e' k'a pe ri q'ij, ri Dios xuteq k'a pe jun k'aten kaq'iq' pa relebel-q'ij. Y ri Jonás kan nik'at chuwech ri q'ij y xlawalo-qa roma ri k'aten ri'. Jari' toq xurayij ri rukamik y xubij: Más ta utz yiken ke chuwech ri in k'es, xcha'.

⁹Jak'a ri Dios xubij chire ri Jonás: ¿Kan ruk'amon kami chi nipe awoyowal roma re ti che' xken-qa?, xcha'. Y ri Jonás xubij: Ja', kan ruk'amon chi nipe woyowal, roma ri' ninrayij yiken, xcha'.

¹⁰Y ri Jehová xubij chire: Rat xpe awoyowal roma xken re ti che' re', ri xa man ja ta rat xatiko-qa, ni man ja ta rat ri xak'iytisan richin, roma xa pa junaq'a' xk'iy-pe, y chupan ri ruka'n aq'a' xken.

¹¹¿Achike ta k'a roma yin man ta ninjoyowaj kiwech ri ek'o pa Nínive ri nimalej tinamit ri akuchi ek'o-wi más juba' chire ri 120,000 ak'uala' ri man jani ketaman ta ri utz y ri man utz ta? Y chuqa' ninjoyowaj kiwech ri janila chi chikopi' ri e awajin chiri'.