Read Kaqchikel Núm 10 Bible Online

Núm 10 - Kaqchikel bible

Núm 10

¹Ri Jehová xch'on chik rik'in ri Moisés y xubij chire:

²Tabana' k'a ka'i' trompeta rik'in saqipueq y rik'in bajibel nachojmirisaj-wi. Y re' xtik'atzin richin xke'amol ri awinaq ri chiri' ri akuchi ixk'o-wi-qa y chuqa' richin toq nichop chik el bey.

³Toq chi e ka'i' trompeta yexupux, konojel k'a ri awinaq k'o chi nikimol-apo-ki' chawech rat, ri chiri' chuchi' ri wachoch richin molojri'il.

⁴Jak'a toq xaxe jun chike ri trompeta nixupux, nikimol k'a ki' xaxe ri e aj-raqen kichin ri tzobaj ri richin ri tinamit.

⁵Toq kinaban chik ki' richin nikichop chik el kibey, jari' toq xkeq'ajan chuqa' chi e ka'i' trompeta. Toq xkexupux pa nabey mul, jari' toq xtikichop-el bey ri winaqi' ri ek'o chiri' pa relebel-q'ij chire ri wachoch.

⁶Y toq xkexupux chik pa ruka'n mul, jari' toq xtikichop-el bey ri winaqi' ri ek'o pa xokon chire ri wachoch. Ja retal ri' richin chi nikichop-el bey.

⁷Jak'a toq xaxe richin chi niban molojri'il, jun wi chik k'a rubanik richin yexupux ri trompeta.

⁸Ja ri e ruk'ajol ri Aarón, ri e sacerdote ri xkexupun ri trompeta. Re' kan xtok k'a jun pixa' richin jantape' chiwe rix y chike ri iwijatzul ri yepe chi wiq chi tanaj.

⁹Toq ixk'o chik chupan ri iruwach'ulew y ri etzelanel iwichin xkixkichop chi oyowal y rix yixel-el richin nibebana' oyowal kik'in, xtixupuj k'a ri ka'i' trompeta richin chi niya' rutzijol. Y keri' yin Jehová, ri i-Dios, xkixoqaqa k'a chinuk'u'x y kan xkixinkol pa kiq'a' rije'.

¹⁰Y chuqa' chupan ri q'ij toq ninimaq'ijuj toq nalex ri ik' y toq ye'iben ri ch'aqa' chik kiwech inimaq'ij, jari' toq kan ruk'amon chi ye'ixupuj ri ka'i' trompeta, rokik nisuj ri chikop ri niporox chijun y toq nisuj ri sipanik ri niq'alajirisan chi junan iwech wik'in. Jari' ri xtibanon chi yixoqaqa chinuk'u'x. Ja yin Jehová, ri i-Dios, ri yibin, xcha'.

¹¹Y toq xapon k'a ri q'ij juwineq chire ri ruka'n ik' chire ri ruka'n juna', ri ke'el-pe rije' ri pa ruwach'ulew Egipto, jari' toq xyakatej-el ri sutz' pa ruwi' ri rachoch ri Dios.

¹²Jari' toq ri israelita xkichop-el binen, richin xe'el-el ri chiri' pa tz'iran ruwach'ulew Sinaí. Ri sutz' kan nipataj k'a ri beneq chikiwech ri winaqi' y xbepa'e', k'a toq xe'apon na ri pa tz'iran ruwach'ulew rubini'an Parán.

¹³Keri' k'a ri xkiben toq pa nabey mul xkichop-el ri kibey, kan xkiben k'a achi'el ri rutzij ri Jehová, ri rubin chire ri Moisés.

¹⁴Konojel k'a ri xebe nabey, ja ri winaqi' ri yetzeqeliben ri tzieq ri ruk'exewach ri tzobaj richin ri Judá y ri aj-raqen pa kiwi' rije', ja ri Nahasón, ri ruk'ajol ri Aminadab.

¹⁵Y ri aj-raqen pa kiwi' ri tzobaj winaqi' ri richin ri Isacar, ja ri Natanael, ri ruk'ajol ri Suar.

¹⁶Y ri aj-raqen pa kiwi' ri tzobaj winaqi' ri richin ri Zabulón, ja ri Eliab, ri ruk'ajol ri Helón.

¹⁷Y toq ri e kijatzul ri Guersón y ri Merarí kisolon chik ri rachoch ri Dios, nikik'uaj k'a el ronojel y nikichop-el binen roma kan jari' ri kisamaj.

¹⁸Chikij k'a rije' xebe konojel ri winaqi' ri yetzeqeliben ri tzieq ruk'exewach ri tzobaj richin ri Rubén y ri aj-raqen pa kiwi' rije', ja ri Elisur, ri ruk'ajol ri Sedeúr.

¹⁹Y ri aj-raqen pa kiwi' ri tzobaj winaqi' ri richin ri Simeón, ja ri Selumiel, ri ruk'ajol ri Surisadai.

²⁰Y ri aj-raqen pa kiwi' ri tzobaj winaqi' ri richin ri Gad, ja ri Eliasaf, ri ruk'ajol ri Reuel.

²¹Y chikij rije' k'o chi yebe ri e rijatzul ri Quehat. Y ja rije' ye'uk'uan ronojel ri ye'ukusex chupan ri rachoch ri Dios. Y toq rije' ye'apon ri akuchi yek'oje-wi-qa, ri levita ri ye'uk'uan ri rachoch ri Dios k'o chi kipaban chik k'a q'anej ri jay ri'.

²²Chikij chik rije' xebe konojel ri winaqi' ri yetzeqeliben ri tzieq ri ruk'exewach ri tzobaj richin ri Efraín y ri aj-raqen pa kiwi' rije', ja ri Elisamá, ri ruk'ajol ri Amihud.

²³Y ri aj-raqen pa kiwi' ri tzobaj winaqi' ri richin ri Manasés, ja ri Gamaliel, ri ruk'ajol ri Pedasur.

²⁴Y ri aj-raqen pa kiwi' ri tzobaj winaqi' ri richin ri Benjamín, ja ri Abidán, ri ruk'ajol ri Guidoní.

²⁵Y pa ruk'isibel xebe konojel ri winaqi' ri yetzeqeliben ri tzieq ri ruk'exewach ri tzobaj richin ri Dan y ri aj-raqen pa kiwi', ja ri Ahiézer, ri ruk'ajol ri Amisadai.

²⁶Y ri aj-raqen pa kiwi' ri tzobaj winaqi' ri richin ri Aser, ja ri Paguiel, ri ruk'ajol ri Ocrán.

²⁷Y ri aj-raqen pa kiwi' ri tzobaj winaqi' ri richin ri Neftalí, ja ri Ahirá, ri ruk'ajol ri Enán.

²⁸Kere' xkiben toq xe'el-el ri e rijatzul kan ri Israel, kan pa taq tzobaj k'a ri xe'el-el y cholan k'a ri e beneq.

²⁹Y ri Reuel ri rujinan ri Moisés k'o k'a jun ruk'ajol rubini'an Hobab. Y ri Moisés xch'on rik'in ri Hobab y xubij chire: Roj jare' yojbe chupan ri ruwach'ulew ri rusujun ri Jehová chiqe. Rija' kan rubin chiqe chi kan utz xtuben qik'in. Jo' k'a qik'in y roj chuqa' kan utz k'a xtiqaben awik'in, xcha' chire.

³⁰Jak'a ri Hobab xa xubij chire ri Moisés chi man nitikir ta nibe kik'in, roma xa nrajo' nitzolej pa ruruwach'ulew ri akuchi ek'o-wi ri rach'alal.

³¹Y ri Moisés xubij chire: Tabana' utzil man katzolej kan, roma xaxe rat ri at etamayon jebel ri bey re wawe' pa tz'iran ruwach'ulew. Awetaman jebel ri akuchi yojk'oje-wi-qa. Y kan ja rat k'a ri xkatok ri uk'uey qabey.

³²Y wi kan yabe qik'in, toq ri Jehová xtuya' ri rutzil pa qawi', roj kan xtiqaya' chuqa' chawe rat ri xtiqak'ul, xcha'.

³³Y keri' k'a rubanik toq rije' xkiya' kan ri juyu' richin ri Jehová y oxi' k'a q'ij ri xebiyin y kan ja ri káxa ri richin ri rujikibel-tzij ri Jehová ri ik'owineq chikiwech rije' y nuk'utula' k'a chikiwech ri akuchi utz chi ye'uxlan-wi.

³⁴Y ri sutz' richin ri Jehová kan beneq k'a pa kiwi' rije' ri paq'ij, toq kan kichapon k'a ri kibey.

³⁵Y toq ri káxa richin ri Jehová niyak-el richin yebe, jari' toq ri Moisés nubij chire ri Dios: Qojatzeqelibej k'a el qajaw, y ri etzelanel awichin yek'is ta, y kan ta ye'animej chawech ri ye'ixowan awichin.

³⁶Y toq nikipaba' k'a qa ri káxa richin chi ye'uxlan, ri Moisés nubij: Kak'oje' k'a qik'in qajaw, katok'oje' chiqakojol roj ri oj atinamit, ri man oj ajlatel ta, nicha'.