Read Kaqchikel Núm 11 Bible Online

Núm 11 - Kaqchikel bible

Núm 11

¹K'o k'a jun q'ij, roma ri ruk'ayewal ri nikiq'axaj ri winaqi', rije' xeyakatej k'a y xexebeloj chirij ri Jehová. Y rija' kan xerak'axaj-pe y roma ri' xyakatej janila royowal y xuteq-pe q'aq' pa kiwi'; y ri q'aq' ri' kan xuk'is k'a ri q'ayis ri k'o chikichi' ri akuchi ek'o-wi-qa.

²Roma ri' ri winaqi' xkik'utuj to'onik chire ri Moisés y rija' kan jari' xch'on rik'in ri Jehová. Y kan jari' toq ri q'aq' xk'is-el.

³Y ri chiri' ri akuchi ek'o-wi-qa xubini'aj Taberá,*f2* roma ri Jehová xuteq-pe q'aq' pa kiwi'.

⁴Y chikikojol k'a ri israelita e beneq chuqa' winaqi' ri xa man e kiwinaq ta y xaxe wa'in ri nikich'ob y ja rije' ri xe'uk'uan kichin ri israelita y xkichop oq'ej y nikibila' k'a: ¡K'ate' ta k'o jun ri niya'on juba' ti'ij chiqe richin niqatej!

⁵Noqaqa chiqak'u'x toq xqatej ker ri chila' pan Egipto, ri choj keri' xya'ox chiqe y chuqa' toq xqatej ri pepino, ri melón, ri xunaket, ri achi'el xunaket y ri anx.

⁶Wakami xa man nuya' ta chik qawayjal, roma kan man jun chik ri k'o ta richin niqatej, xa kan xaxe chik ri aj-chikajil-wey ri niqatej q'ij-q'ij, xecha'.

⁷Ri aj-chikajil-wey ri' achi'el k'a nitzu'un ri ija'tz ri richin ri culantro, k'aqo'j k'a nitzu'un y nich'ich'an achi'el nich'ich'an ri q'ol.

⁸Y ri aj-chikajil-wey niqaqa k'a pe ri chaq'a' toq ri raxq'ab niqaqa-pe pa ruwi' ri akuchi ek'o-wi-qa. Y ri winaqi' ye'el k'a chumolik. K'ari' nikike'ej o nikiweq-ruwi'. Xeri' nikipon o nikiroqowisaj pa jun bojo'y; y ri ruki'il achi'el ri wotz'otz' banon rik'in ri aceite k'ak'a'.

¹⁰Y ri Moisés xrak'axaj k'a chi chikijujunal ri winaqi' yexebeloj y ye'oq' chuchi' ri kachoch ri banon rik'in tzieq; y roma ri' ri Jehová kan janila xpe royowal. Keri' chuqa' ri Moisés kan itzel xuna' roma keri' xkiben ri winaqi'.

¹¹K'ari' ri Moisés xubij k'a chire ri Jehová: ¿Achike k'a roma toq ataqon-pe re ruk'ayewal re' pa nuwi' yin ri asamajel? ¿Kan xik'o yan ak'u'x wik'in, roma ri' aya'on chuwij re jun nimalej ejqa'n richin re tinamit re'?

¹²¿Ja kami yin ri xinalk'ualan kichin konojel re winaqi' re'? ¿Ja kami yin xibanon chi rije' xe'alex chuwech re ruwach'ulew? ¿Nabij chuwe richin yench'elej-el, achi'el niban kik'in ri ne'y ri k'a yetz'uman na? ¿Y k'o chi yenk'uaj k'a chupan ri ruwach'ulew ri akuchi asujun chike ri qati't-qamama'?

¹³¿Akuchi ta k'a ninbenk'ama-pe ti'ij, yin, richin ninya' chike re winaqi' re', roma janila ye'oq' chinuwech y nikik'utuj ti'ij?

¹⁴Nuyon yin man yitikir ta nink'uaj re jun tinamit re', roma chuwe yin re jun samaj re' kan janila ralal.

¹⁵Wi chaq chupan samaj kere' yinaya-wi, más utz tawelesaj ri nuk'aslen. Wi rat kan qitzij yinawajo', tabana' kere', richin chi man nintej ta chik poqon, xcha'.

¹⁶Y ri Jehová xuk'uluba' k'a pe ri ruch'abel ri Moisés y xubij k'a chire: Ke'amolo-pe e oxk'al lajuj achi'a' chike ri aj-raqen richin ri tinamit ri kan k'o kiq'ij y kan e samajela' richin ri tinamit. Ke'ak'ama-pe chuchi' ri wachoch richin molojri'il.

¹⁷Yin xkiqaqa-pe y chiri' xkich'on awik'in y yin xtinwelesaj juba' chire ri ejqa'n ri nuya'on pan awi' rat y re' xtinya' pa kiwi' rije' richin yatkito' chuk'uaxik ri ralal ri samaj, y man ayon ta chik rat ri xkatuk'uan.

¹⁸Y chike ri awinaq tabij chi tikich'ajch'ojirisaj-ki' richin chua'q, roma jari' toq xtitej ti'ij. Roma yin kan xinwak'axaj ri koq'ej y xinwak'axaj chuqa' toq xech'ojin richin chi k'o ta niya'on juba' ti'ij chike y chuqa' xkibij chi kan jebel kibanon ri pan Egipto. Wakami k'a, yin ninbenya-pe ti'ij chike richin nikitej.

¹⁹Man xaxe ta k'a jun ok q'ij toq xtinya-pe ri ti'ij, ni ta richin ka'i' q'ij, ni ta richin wo'o' q'ij, ni ta richin lajuj q'ij, y ni ta xaxe richin juwineq q'ij;

²⁰xa kan richin jun ik', kan xtikitej k'a ti'ij k'a toq xtikiben na xib y kan jumul k'a xtikixowaj, roma man xkiya' ta wejqalen yin Jehová ri ink'o chi'ikojol, y xa xe'oq' janila chinuwech y xkibij chi achike roma xe'el-pe pa ruwach'ulew Egipto. Keri' tabij chike, xcha' ri Jehová.

²¹Jak'a ri Moisés xubij: Xaxe ri achi'a' e richin re tinamit re' ri e peteneq chikaqen ri e wachibilan-pe e 600,000 y rat nabij chi xtaya' ti'ij chiqe qonojel richin jun ik'.

²²¿Kan yojruben kami wi yekamisex konojel ri kokoj y nima'q taq qawej? o ¿Yojruben kami wi niqamol ta kichi' konojel ri ker ri ek'o chupan ri palou?, xcha' ri Moisés.

²³K'ari' ri Jehová xubij chire: ¿Nach'ob rat chi yin man yitikir ta yixintzuq rik'in ti'ij richin jun ik'? Wakami k'a xtabetz'eta' wi qitzij o xa man qitzij ta ri xinbij, xcha' ri Jehová.

²⁴K'ari' ri Moisés xel k'a el y xch'on kik'in ri winaqi' y xutzijoj chike ri xubij kan ri Jehová chire. Chuqa' xerucha' kan e oxk'al lajuj achi'a' ri k'o kiq'ij chikikojol ri winaqi' y xuben chike chi nikisutij-rij ri rachoch ri Dios.

²⁵Y toq ri Jehová xqaqa-pe, kan chupan k'a ri sutz' peteneq-wi y xch'on rik'in ri Moisés. Xeri' ri Jehová xuya' chuqa' chike ri e oxk'al lajuj achi'a' ri Espíritu achi'el ri ruya'on chire ri Moisés. Jari' toq ri achi'a' ri' xebech'on-pe achi'el yech'on ri e q'alajirisey ruch'abel ri Dios. Jak'a xaxe jun bey ri keri' xkiben.

²⁶Y xbanatej k'a chi ek'o e ka'i' achi'a' ri kibini'an Eldad y Medad, ri xek'oje' kan ri akuchi ek'o-wi-qa y man xe'apon ta chupan ri molojri'il. Y rije' kan xqaqa chuqa' ri Espíritu pa kiwi' y xkichop k'a yech'on achi'el yech'on ri e oxk'al waqxaqi' achi'a'. Y rije' ek'o k'a chikikojol ri xecha'ox roma ri Moisés.

²⁷Y k'o k'a jun ala' ri junanin xapon rik'in ri Moisés richin xberuya' rutzijol chire, chi ri Eldad y ri Medad kichapon ruq'alajirisaxik ri ruch'abel ri Dios ri chiri' ri akuchi ek'o-wi-qa.

²⁸Y ri Josué ri ruk'ajol ri Nun, kan k'a ala' na k'a toq ruchapon-pe nuto' ri Moisés; y xch'on k'a rik'in y xubij chire: ¡Moisés wajaw yin, ke'aq'ata' ri achi'a' ri' richin chi man nikiben ta chik keri'!, xcha'.

²⁹Jak'a ri Moisés xubij chire: ¿Achike roma niq'axon awánima roma re'? ¿Nach'ob rat chi xaxe yin ri yibanon re samaj re'? Jebel ta ri' wi ta ri Dios nuya' ta pe ri ru-Espíritu pa kiwi' konojel ri qawinaq chi nikiq'alajirisaj ri ruch'abel achi'el rije', xcha'.

³⁰K'ari' ri Moisés y ri e oxk'al lajuj achi'a' xetzolej pa taq kachoch ri akuchi ek'o-wi-qa.

³¹Chirij re' ri Jehová xuteq k'a pe jun nimalej kaq'iq' y xuben chi xeruk'en-pe saqkorowach pa ruwi' ri Kaqa-Palou. Y xeberuya' kan k'a ri akuchi ek'o-wi-qa ri winaqi'. Y wo'o' q'a'aj xrajo' chi man xeqaqa pan ulew y chijun rij ri akuchi ek'o-wi-qa, xkiq'atapuj k'a 40,000 jaj.

³²Y chijun ri q'ij ri', ri xokoq'a-qa y ri jun chik q'ij jari' xkisamajij, xa kan xaxe chapoj saqkorowach xkiben. Y ri wineq ri ti juba' ok xumol, kan xumol k'a kawineq lajuj chakech nima'q y re' xekichaqirisaj chuchi-el ri akuchi ek'o-wi-qa.

³³Jak'a ri winaqi' ri janila kirayin-pe ti'ij, k'a la'eq ri' nikiya' ri nabey kach' chire ri ti'ij ri', jari' toq ri Jehová kan ja yan ri' xyakatej royowal chikij y xuya-pe jun nimalej yabil pa kiwi' richin chi xeken. Xuben k'a chi janila k'iy winaqi' xeken chupan ri q'ij ri'.

³⁴Y roma keri' xbanatej ri chiri', roma ri' Quibrot-Hataavá xkibij chire, roma chiri' xekimuq-wi kan ri winaqi' ri xa kan xaxe wa'in xkimey.

³⁵Y toq rije' xe'el-el ri chiri' pa Quibrot-Hataavá, xkichop chik el ri kibey y k'a pa ruwach'ulew Haserot xebek'oje-wi.