Read Kaqchikel Núm 12 Bible Online

Núm 12 - Kaqchikel bible

Núm 12

¹Ri María y ri Aarón xkichop k'a itzel yech'on chirij ri Moisés, stape' rija' jun achin ri kan yalan ruqasan-ri' chuwech ri Dios, y man achi'el ta konojel ri ch'aqa' chik achi'a' ri ek'o chuwech re ruwach'ulew. Itzel k'a yech'on chirij roma rija' xa rik'in jun ixoq aj-Etiopía k'ulan-wi. Y rije' nikibila' k'a chikiwech: ¿Xaxe kami rik'in ri Moisés nich'on-wi ri Jehová? ¿Man ch'owineq ta kami chuqa' qik'in roj?, xecha'. Y ronojel ri' xrak'axaj-pe ri Jehová.

⁴Y ri Jehová kan jari' toq xch'on-pe y xubij chike ri Moisés, ri Aarón y ri María chi kebiyin ri pa rachoch ri richin molojri'il. Y rije' kan xebe na wi.

⁵Y jari' toq ri Jehová xqaqa-pe chupan jun achi'el sutz' y xok'oje-qa ri chiri' chuchi' ri rachoch, y kan jari' xeroyoj ri Aarón y ri María. Y chi e ka'i' rije' xebepa'e-apo chuwech.

⁶Y ri Jehová xubij k'a chike: Tiwak'axaj k'a ri ch'abel ri xtinbij chiwe. Wi ta k'o jun q'alajirisanel ri nuch'abel ri chi'ikojolil, yin yich'on ta rik'in pan achik' o yik'utumej ta chuwech.

⁷Jak'a rik'in ri nusamajel Moisés, man ninben ta keri', roma rija' kan nuben ronojel ri ninbij chire.

⁸Roma ri', rik'in rija' kan yojtzijon-wi chiqawech y niqatzu-qi'; y richin chi niq'ax chuwech ri ninbij chire, yin ninkusaj ri ch'abel ri niq'ax chuwech rija'. Y wi ri nusamajel Moisés kan in rutz'eton toq in tzijowineq rik'in, ¿achike k'a roma man jun rukiy chiwech y janila itzel yixch'on chirij rija'?, xcha'.

⁹Kan jari' toq ri Jehová xpe janila royowal chike rije', xeruya' kan ri chiri' y rija' kan jari' xbe.

¹⁰Ri achi'el sutz' kan jari' xyakatej-el y xuch'er-el-ri' chire ri rachoch rija'. Y jari' toq ri María xutzu-qa ri ruq'a' y xutz'et chi kan achi'el chik nitzu'un ri chuma-tew, keri' ri rubanon. Y toq ri Aarón xutz'et ri yabil ri k'o chirij ri rana',

¹¹jari' toq xubij chire ri Moisés: ¡Wajaw yin!, tabana' utzil man taya' rutojbalil pa qawi', roma xa pa qach'ujirik ri xqabij.

¹²Tabana' jun utzil man taya' q'ij chi ri María nik'oje' kan achi'el jun ak'ual ri kamineq chik toq nalex y ri rutz'umal kan q'ayineq chik, xcha'.

¹³Y ri Moisés rik'in ruchuq'a' xch'on-q'anej rik'in ri Jehová y xubij k'a chire: ¡Wajaw yin, tabana' utzil tak'achojirisaj ri wana'!, xcha'.

¹⁴Y ri Jehová xubij chire: Wi ta ri itata' xchuban chupalej ri María, k'o chi nel-el wuqu' q'ij chi'ikojol roma ri ruk'ix. Y roma ri' yin ninbij chi ri María nel-el ri chiri' chi'ikojol richin wuqu' q'ij y k'ari' titzolej chik jun bey iwik'in, xcha' ri Jehová.

¹⁵Y keri', ri María kan xelesex na wi el wuqu' q'ij ri chiri', ri akuchi ek'o-wi-qa. Y k'a toq xtzolej na ri María,

¹⁶k'ari' ri winaqi' xe'el-el chiri' pan Haserot y xkichop k'a binen y xe'apon k'a pa tz'iran ruwach'ulew Parán y chiri' xek'oje-wi-qa.