Read Kaqchikel Núm 15 Bible Online

Núm 15 - Kaqchikel bible

Núm 15

¹Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Jare' ri ruchojmilal richin ri sipanik y ri kamelabel ri niben toq rix ix okineq chik chupan ri ruwach'ulew ri xtinya' chiwe.

³Nik'en-pe jun chike ri nima'q o kokoj taq iwawej richin nijubulin chinuwech. Y re chikop re' xtik'atzin richin niporox chijun, richin jun kamelabel, chuqa' toq k'o jun ri nisuj chi niben chinuwech yin y toq nik'en-pe roma nalex-pe pan iwánima o toq niben jun nimaq'ij richin niya' nuq'ij.

⁴Y wi nik'en-pe jun nima-alaj chikop chike ri kokoj taq iwawej, k'o chi nisuj ka'i' libra k'ej chayun ri xolon rik'in jun litro aceite olivo.

⁵Chuqa' k'o chi nikaq'uj jun litro vino pa ruwi' ri kamelabel.

⁶Y toq ri kamelabel jun karne'l k'atzinel chi nisuj chuqa' kaji' libra k'ej chayun xolon rik'in más juba' jun litro aceite.

⁷Chuqa' nisuj más juba' jun litro vino, richin jun sipanik. Y re' jun sipanik ri kan nijubulin chinuwech yin.

⁸Jak'a toq nik'en-pe jun nima-alaj wákix richin niporox chijun o richin chi niq'alajin chi junan iwech wik'in o richin chi kan niben ri kan isujun chuwe yin;

⁹k'atzinel k'a chi nik'en-pe waqi' libra k'ej chayun nixol ka'i' litro aceite rik'in.

¹⁰Junan chuqa' rik'in ri', nik'en-pe ka'i' litro vino richin nikaq'uj pa ruwi' ri kamelabel ri niporox chijun. Y re' jun sipanik ri kan nijubulin chinuwech yin.

¹¹Y kere' rubanik toq xke'isuj ri nima'q y kokoj taq iwawej,

¹²y jare' ri k'o chi nrachibilaj chikijujunal ri chikop ri nisuj.

¹³Kan kere' k'o chi niben iwonojel rix winaqi' israelita.

¹⁴Chuqa' ri winaqi' ri xa man e iwinaq ta y kan niqa' chikiwech richin yek'oje' chi'ikojolil, toq nikajo' nikiya' jun sipanik, k'o chi nikiben achi'el ri niben rix.

¹⁵Y xaxe jun ruchojmilal ri xtuk'uan iwichin rix y ri winaqi' ri man e iwinaq ta. Re jun ruchojmilal re' richin q'asen y xtik'atzin chike konojel ri winaqi' ri chi wiq chi tanaj e peteneq; roma chinuwech yin xa ix junan rix y ri winaqi' ri man e iwinaq ta.

¹⁶Xaxe k'a jun ruchojmilal ri xtik'oje' pan iwi' rix y pa kiwi' rije', xcha' ri Jehová.

¹⁷Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Toq xkixok-apo chupan ri ruwach'ulew ri akuchi yixink'uaj-wi,

¹⁹y nitikeriba' nitej ri wey ri nuya' chupan ri ruwach'ulew ri', k'o chi nich'er kan juba' chuwe yin.

²⁰Toq nabey mul xtiben ri iway, k'o chi niwelesaj kan juba' ke'en y niben jun kaxlan-wey chire. Jare' ri niya' chuwe yin achi'el jun sipanik.

²¹Y re' k'o chi niben jantape' y keri' chuqa' ri iwijatzul.

²²Jare' ri ruchojmilal wi rix man inojin ta richin niq'ej ruwi' jun chike ri nupixa', ri nuya'on pa ruq'a' ri Moisés:

²³Y ri chojmilal re' iwichin rix y kichin ri iwijatzul chi wiq chi tanaj.

²⁴Y wi kan qitzij chi rix imestan ri pixa' ri' y kan chi'iwonojel rix man iwetaman ta chi mak ri xiben, kan k'o k'a chi nisuj jun nima-alaj achij wákix richin jun sipanik ri niporox chijun. Y re' kan xtijubulin k'a chinuwech. Y kan k'atzinel chi rik'in ri sipanik ri', niya' ri sipanik richin k'ej y ri vino achi'el nubij chupan ri ruchojmilal. Chuqa' k'o chi nisuj jun achij tzuntzun richin nikuyutej ri imak.

²⁵Y jari' k'a toq ri sacerdote xtusuj ri kamelabel, richin keri' nikuyutej imak y yin kan xtink'en chik iwech. Re' xtibanatej toq xtik'en-pe re jalajoj ruwech kamelabel re'.

²⁶Re jun chojmilal re' kan xtiqaqa pan iwi' y pa kiwi' ri man e iwinaq ta. Keri' xtikuyutej ri imak roma man iwetaman ta chi xiq'ej ruwi' ri nupixa'.

²⁷Y wi ta xaxe jun chiwe rix ri niq'ajo ruwi' ri nupixa', k'o chi nuk'en-pe jun alaj ixoq tzuntzun ri k'o jun rujuna', richin jun kamelabel richin xtikuyutej ri rumak.

²⁸K'ari' ri sacerdote xtusuj ri kamelabel richin nikuyutej rumak ri wineq ri', roma ri wineq ri' kan man ruch'obon ta chi nimakun y xtzaq pa mak. Y richin keri' yin nijunamatej nuwech rik'in.

²⁹Y re jun chojmilal re' iwichin rix y kichin ri man iwinaq ta roma man ich'obon ta richin yixmakun y xixtzaq pa mak.

³⁰Y wi k'o ta jun wineq ri kan rik'in rija' nalex-wi-pe chi nimakun, ri wineq ri' stape' ta jun chiwe rix o jun chike ri man e iwinaq ta, k'o chi nikamisex-el, roma xa xuben chuwe yin Jehová chi xa xuqasaj nuq'ij.

³¹Roma ri wineq ri' xa xrixowaj ri nuch'abel yin Jehová y xuq'ej ruwi' ri nupixa', roma ri' rija' kan man xtikolotej ta chuwech ri kamik; y ja ri rumak ri xtuk'uan-el richin, xcha'.

³²Toq ri winaqi' israelita ek'o k'a chiri' pa tz'iran ruwach'ulew, xbekila' k'a pe jun achin ri kiwinaq rije' ri nuben rusi' chupan ri q'ij richin uxlanen.

³³Y ri achin ri', xkik'en k'a pe chuwech ri Moisés y chuwech ri Aarón y chikiwech ri ch'aqa' chik kiwinaq.

³⁴Y ri xek'amon-pe ri achin ri' kan ek'o k'a achi'a' ri xekiya' kan richin xkichajij, roma man jani q'alaj ta achike ri xtiban rik'in.

³⁵Y ri Jehová xch'on k'a pe rik'in ri Moisés y xubij chire: Ri achin ri xilitej-pe ri nuben rusi' chupan ri q'ij richin uxlanen, tikamisex k'a chi abej koma ri winaqi' israelita, chuchi-el ri akuchi ixk'o-wi-qa, xcha' ri Jehová.

³⁶Y kan achi'el k'a xubij ri Jehová chire ri Moisés, kan keri' xkiben. Xkelesaj k'a el ri achin ri' chuchi' ri akuchi ek'o-wi-qa y konojel ri winaqi' xkik'eq chi abej y keri' xken.

³⁷Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Rix y ri iwijatzul ri xkepe chiwech-apo, kan xtiben k'a taq k'olok'eq chutza'n-qa ri itziaq richin retz'aba'l chijun qa ri ruchi', y ri kijitz'ibal ri taq etz'aba'l ri', raxroj k'a nitzu'un.

³⁹Ri retz'aba'l ri ruchi' ri itziaq ri' kan xtik'atzin k'a chiwe richin toq nitzu-qa, noqaqa chi'ik'u'x ronojel ri nupixa' ri nuya'on chiwe yin y xkixok k'a nimey taq tzij y man xtiben ta ri itzel taq rayinik ni man xtitzu' ta chik ruwech.

⁴⁰Y keri' noqaqa ta chi'ik'u'x ri nupixa', y niben ta ronojel ri nubij. Chuqa' kan xtijech ta iwi' chuwe yin Jehová, ri i-Dios.

⁴¹Ja yin Jehová ri xinelesan-pe iwichin pa ruwach'ulew Egipto richin xinok i-Dios. Ja yin k'a Jehová, ri i-Dios wakami, xcha'.