Read Kaqchikel Núm 16 Bible Online

Núm 16 - Kaqchikel bible

Núm 16

¹K'o k'a jun achin richin ri tzobaj richin ri Leví, rubini'an Coré, ruk'ajol ri Ishar ri rijatzul ri Quehat. Y ri Coré ri' ek'o k'a e oxi' chik rachibil ri e richin ri tzobaj richin ri Rubén, ri kibini'an Datán, Abiram ri e ruk'ajol ri Eliab, y chuqa' ri On ri ruk'ajol ri Pélet.

²Rije' xjunamatej k'a kiwech kik'in e 250 achi'a' ri e kiwinaq, achi'a' ri kan e aj-na'oj y e cha'on richin ye'ok aj-raqen. Y konojel rije' xeyakatej k'a chikij ri Moisés y ri Aarón.

³Y xbekimolo' k'a ki' kik'in, y xkibij chike: ¿Achike roma toq rix janila nim iq'ij ibanon-q'anej, toq xa konojel ri winaqi' man yixkikoch' ta chik? Qonojel roj kan oj ch'aron richin ri Jehová y rija' kan k'o chuqa' qik'in roj y man nik'atzin ta richin nik'oje' ta chik jun pa qawi', xecha'.

⁴Toq ri Moisés xrak'axaj ronojel ri xkibij ri winaqi' ri', rija' xxuke-qa y xuqasaj-qa-ri' k'a pan ulew.

⁵Y k'ari' xubij chire ri Coré y chike konojel ri e tzeqelibeyon richin: Ri chua'q nimaq'a' yan ri Jehová xtuq'alajirisaj ri achike ri kan qitzij ruch'aron richin nok sacerdote. Rija' kan xtroyoj k'a apo chunaqaj ri rachoch. Y ri xtucha' y xtroyoj ri Jehová, kan xtuben k'a chire chi xtijel-apo rik'in, xcha'.

⁶Y ri Moisés xubij chuqa' chike ri Coré y ri e tzeqelibeyon richin: K'atzinel k'a chi rix, ri chua'q chi'ijujunal nik'en-pe porobel-pom. Y nimaq'a' yan xtiya' racheq-q'aq' chupan ri porobel ri' y niya' chuqa' pom pa ruwi' ri racheq-q'aq' richin chi niya' chuwech ri Jehová. Y chiri' xtiq'alajin ri achin ri kan ch'aron chik richin ri Jehová. Roma rix ri ix rijatzul kan ri Leví kan nik'o k'a ruwi' ri niben, xcha' ri Moisés.

⁷

⁸Y chirij re' ri Moisés xubij chik jun bey chire ri Coré: Rix ri ix rijatzul kan ri Leví kiniwak'axaj k'a re wakami.

⁹Ri Jehová kan ix rucha'on k'a pe rix chikikojol ri qawinaq, y kan chunaqaj rija' ix ruya'on-wi richin yixsamej chupan ri rachoch, y kan ix rucha'on richin nisamajij ri tinamit. ¿Kan man jun k'a rejqalen chiwech rix re samaj re ruya'on ri Jehová chiwe?

¹⁰Ri Jehová kan at ruya'on k'a rat Coré y konojel ri winaqi' levita ri e tzeqelibeyon awichin, richin ix ruya'on-apo chunaqaj rija'. ¿Y wakami rix kan nich'ojij chik richin chi yixok nimalej sacerdote?

¹¹Rat y ri e tzeqelibeyon awichin, xa man chirij ta ri Aarón xixyakatej-wi, achi'el ri xich'ob-qa rix. ¿Achike ta k'a rumak rija' richin yixch'ojin chire rija'? Jak'a rix kan chire ri Jehová xixch'ojin-wi, xcha'.

¹²Y k'ari' ri Moisés xuteq koyoxik ri Datán y ri Abiram, jak'a rije' xkibij-pe: Ni, roj man yojapon ta.

¹³Roma man xaxe ta xojawelesaj-pe ri pa ruwach'ulew ri akuchi jebel xojwa' y wakami nawajo' yojakamisaj kan chi wayjal chupan re tz'iran ruwach'ulew re'. Y man xaxe ta ri', roma kan nawajo' chi yak'oje' pa qawi', richin yapa'e' chiqij rik'in ri aq'atbel-tzij.

¹⁴Y toq rat xojawelesaj-pe ri chiri' pa ruwach'ulew Egipto, kan richin k'a chi yojak'uaj chupan ri ruwach'ulew ri akuchi nuya' ronojel ruwech tiko'n; y k'a re wakami, man jun ulew, ni ta ulew ri tikon uva chuwech ri qichinan ta ri kan asujun chiqe; rat nawajo' natz'apej qawech. Ni, roj man yojapon ta, xecha-pe.

¹⁵Y ri Moisés xyakatej janila royowal y roma ri' xubij chire ri Jehová: Man tak'ul ri kisipanik. Rat kan jebel awetaman chi yin man jun bey numajon ta jun ti bur chuwi-kiq'a' y man jun chik ri nubanon ta chike, xcha' chire.

¹⁶Y ri Moisés xch'on chik rik'in ri Coré y xubij chire: Rat y konojel ri winaqi' ri e tzeqelibeyon awichin, xkixoqaqa k'a chuwech ri Jehová ri chua'q; y ri Aarón kan xtoqaqa chuqa' re wawe'.

¹⁷Chi'ijujunal k'a rix xtik'atzin jun iporobal rachibilan pom y k'ari' no'ik'utu-iwi'; 250 porobel-pom ri xtik'en-pe. Y chuqa' ri Aarón kan xtuk'en k'a pe ri ruporobal-pom, richin noruk'utu-ri' chuwech ri Jehová, xcha'.

¹⁸Y keri' nimaq'a' yan chikijujunal k'a rije' xkik'en-pe ri kiporobal-pom y k'ari' xkiya' racheq-q'aq' y pom chupan, y junan xebepa'e-apo kik'in ri Moisés y ri Aarón ri chiri' chuchi' ri rachoch ri Dios.

¹⁹Y toq ri Coré e rumolon chik k'a ri e 250 rachibil y e pa'el chik chiri', jari' toq xorepero' ri rusaqil ri ruk'ojlemal ri Jehová chikiwech konojel rije'.

²⁰Y ri Jehová kan jari' xubij chike ri Moisés y ri Aarón:

²¹Tijech'ej-el-iwi' chikikojol ri iwinaq, roma yin kan ja re wakami yan xkenk'is jumul, xcha'.

²²Jak'a ri Moisés y ri Aarón, kexukuk xeqaqa pan ulew chuwech ri Jehová richin yech'on rik'in y xkibij chire: Qa-Dios roj, rat ri at rajaw ri qak'aslen qonojel, ¿kan pa kiwi' kami konojel ri awinaq israelita nawelesaj-wi ri awoyowal, toq xa jun ok chike ri achi'a' ri xmakun chawech?, xecha'.

²³Y xeri' ri Jehová xch'on chik rik'in ri Moisés y xubij chire:

²⁴Kach'on kik'in konojel ri awinaq y tabij chike chi tikijech'ej-el-ki' chire ri kachoch ri Coré, ri Datán y ri Abiram, xcha'.

²⁵Y ri Moisés kan jari' xyakatej-el y xbe k'a akuchi ek'o-wi ri Datán y ri Abiram. Jak'a man ruyon ta xbe, xa kan xebe k'a ri achi'a' ri k'o kiq'ij chirij.

²⁶K'ari' rija' xuya' chik rutzijol chike ri winaqi', chirij ri xtibanatej y xubij k'a chike: Tijech'ej-el-iwi' chire ri kachoch ri itzel taq winaqi' ri' y man jun tichop ri xa kichin rije', richin keri' man yixken ta chuqa' rix junan kik'in rije', roma ri kimak, xcha'.

²⁷Y ri winaqi' kan jari' xkijech'ej-el-ki' chire ri kachoch ri Coré, ri Datán y ri Abiram. Y ri Datán y ri Abiram xebe'el-pe y xepa'e' ri chuchi' taq kachoch kachibilan ri kixjayilal, konojel ri kalk'ual, ri nitiker-pe rik'in ri nimalaxel k'a rik'in ri ch'i'p.

²⁸Y xeri' ri Moisés k'a xch'on na chik kik'in ri winaqi' y xubij k'a chike: Xaxe re kere' xtiwetamaj chi kan ja ri Jehová in taqayon-pe, richin ninben ronojel ri nitz'et; y xa man nuna'oj ta yin ninkusaj richin nintz'uk richin ninben-q'anej kere'.

²⁹Wi xa ta re achi'a' re' yeken achi'el yeken konojel winaqi', niq'alajin chi man ja ta ri Jehová ri in taqayon-pe.

³⁰Jak'a wi ri Jehová kan xtuben jun banobel ri man jun bey k'uluwachitajineq y ri ruwach'ulew nijaqatej richin yerubeq' ri winaqi' ri xemakun kachibilan ronojel ri k'o kik'in y kan k'a e k'es na k'a toq xkebeqaqa chuxe' re ruwach'ulew, wi keri' kan xtiwetamaj k'a ri' chi re achi'a' re', jari' ri xeyako royowal ri Jehová, xcha'.

³¹Y kan xaxe k'a xtane-qa chi ch'owen ri Moisés, kan jari' toq xch'aratej ri ruwach'ulew chikixe' ri winaqi' ri',

³²y ri ruwach'ulew kan xch'aratej k'a y xerubeq' ri Coré y konojel ri aj pa rachoch y ronojel ri beyomel ri k'o kik'in.

³³Kan e k'es k'a xebe-qa chuxe' ri ulew, kachibilan ronojel ri k'o kik'in; y k'ari' ri ruwach'ulew xutz'apej chik ri' y keri' toq xe'el-el chikikojol ri kiwinaq.

³⁴Y toq xerubeq' k'a ri ruwach'ulew kan xesik'in k'a; y konojel k'a ri winaqi' ri ek'o-apo chikinaqaj, chuqa' xesik'in, xe'animej y nikibila' k'a: Re ruwach'ulew xa xqojrubeq' chuqa' roj, xecha'.

³⁵Y chaq k'ate' k'a xqaqa-pe q'aq' chila' chikaj rik'in ri Jehová y xeruk'is ri e 250 achi'a' ri xesuju pom.

³⁶Xeri', ri Jehová xch'on chik rik'in ri Moisés y xubij chire:

³⁷Tabij chire ri Eleazar ri ruk'ajol ri Aarón, chi kerumolo' ri porobel-pom ri xetzaqilan kan ri akuchi xk'uluwachitej-wi ri k'atik, roma re porobel re' xesuj yan chuwe yin. Jak'a ri racheq-q'aq' xa keberuyala' kan ke taq ri'.

³⁸Ronojel re porobel-pom re', kan xe'ok k'a kan richin pa nusamaj yin, roma xe'ukusex yan richin xsuj pom chuwe yin. Y chike ri porobel-pom ri' k'o chi xkebajix y niban nima'q ruwech pueq chire. Y rik'in ri' nipis-rij ri porobel-pom ri k'o pa wachoch. Y re' kan xtok k'a jun natabel chike ri awinaq roma ri xbanatej, xcha'.

³⁹Ri sacerdote Eleazar kan xuben k'a ri xbix chire, xumol ronojel ri porobel-pom ri e kik'amon-pe ri achi'a' ri xek'at. Xubajij y xuben nima'q pueq chire, richin xupis-rij ri porobel-pom ri k'o pa rachoch ri Jehová.

⁴⁰Richin keri' xok kan jun natabel chikiwech ri winaqi' israelita, chi xaxe ri e rijatzul ri Aarón ri utz nikisuj pom chuwech ri Jehová. Y wi k'o jun xabachike wineq ri nibanon keri', kan xtuk'uluwachij k'a achi'el ri xuk'uluwachij ri Coré y ri e tzeqelibey richin. Kan kere' k'a ri xubij ri Jehová chire re tinamit roma ri Moisés.

⁴¹Jak'a pa ruka'n q'ij chire ronojel ri', kan konojel ri winaqi' richin ri tinamit xexebeloj yan chik chikij ri Moisés y ri Aarón, y nikibila' k'a: Ja rix xixkamisan kichin ri winaqi' richin ri Jehová, yecha'.

⁴²Jak'a toq ri winaqi' xkimol-ki' richin yeyakatej chikij ri Moisés y ri Aarón, kan jari' xebe-apo chuchi' ri rachoch ri Jehová. Y kan jari' toq ri achi'el sutz' xumatzej rij ri jay ri' y xorepero' k'a ri rusaqil ri ruk'ojlemal ri Jehová.

⁴³Y toq ri Moisés y ri Aarón xe'apon chuchi' ri rachoch ri Dios,

⁴⁴jari' toq rija' xch'on-pe rik'in ri Moisés y xubij chire:

⁴⁵Kixel-el chikikojol re winaqi' re kimolon-ki' wawe', roma yin kan ja re wakami yan xkenk'is jumul, xcha' ri Dios chire. Jak'a rije' kan kexukuk k'a xeqaqa pan ulew chuwech ri Jehová.

⁴⁶K'ari' ri Moisés xubij chire ri Aarón: Tabek'ama-pe ri aporobal y taya-pe racheq-q'aq' chupan ri k'o pa ruwi' ri porobel, y chuqa' taya-pe pom pa ruwi'. K'ari' anineq katok chikikojol ri qawinaq richin chi ri Dios nuk'en chik kiwech, roma rija' yakatajineq royowal y ri kamik okineq chikikojol ri winaqi' y janila e k'iy yan keken, xcha-el chire ri Aarón.

⁴⁷Y keri' ri Aarón kan xuben k'a achi'el ri xubij ri Moisés chire. Xberuk'ama-pe ri ruporobal-pom y k'ari' junanin xok chikikojol ri winaqi'. Y ri kamik kan ruchapon chik k'a rubanik rusamaj chikikojol, jak'a ri Aarón xusuj ri pom y ri Dios xuk'en chik kiwech ri winaqi'.

⁴⁸Kan xaxe k'a xpa'e' ri Aarón chikikojol ri winaqi' ri e kaminaqi' chik y chikikojol ri k'a e k'es na, kan jari' toq ri kamik xpa'e'.

⁴⁹Konojel k'a ri winaqi' ri xeken e 14,700 y chikikojol rije' man xe'ajlex ta ri xeken roma ri yakatajinenri'il richin ri Coré.

⁵⁰Y toq xtane' yan ri kamik, ri Aarón xtzolej-apo rik'in ri Moisés ri chiri' chuchi' ri rachoch ri Dios.