Read Kaqchikel Núm 19 Bible Online

Núm 19 - Kaqchikel bible

Núm 19

¹Ri Jehová xuya' chik k'a re jun ruchojmilal re' chire ri Moisés y chire ri Aarón y xubij: Ri winaqi' k'o chi nokijacha' chiwe jun ixoq wákix kaqkoj rij, ri kan tz'aqet y ch'ajch'oj y man jani tiya'ox che' richin samaj chirij ruwi'.

³Y re ixoq wákix re', nijech chire ri sacerdote Eleazar. Y rija' nuk'uaj-el k'a chuchi' ri akuchi ixk'o-wi-qa; y ri wákix ri' kan chuwech k'a ri Eleazar xtikamisex-qa.

⁴K'ari' rija' xtuju' jun chike ri ruwi-ruq'a' chupan ri kik' y xtuchikaj-apo pa ruchojmil ri akuchi k'o-wi ri ruwech ri wachoch. Wuqu' k'a bey xtuben keri'.

⁵Y rokik k'a k'o na ri Eleazar chiri', niporox kan chijun ri wákix: Niporox ri rutz'umal, ri ruch'akul, ri rukik'el y chuqa' ri rupan.

⁶Rokik nik'at ri chikop ri', ri Eleazar niberuk'ama-pe tiox-che', ri q'ayis hisopo, y tzieq keq nitzu'un, ri banon rik'in rusumal karne'l y nuya' pa ruwi' ri chikop ri'.

⁷Y chirij k'a ronojel ri' ri Eleazar xtuch'ej ronojel ri rutziaq y xtatin y k'ari' utz nok-apo chupan ri akuchi ek'o-wi-qa ri israelita. Y rija' man ch'ajch'oj ta k'a toq xtok na ri aq'a'.

⁸Keri' chuqa' xtuben ri achin ri xporon ri wákix. Xtuch'ej ri rutziaq y xtatin; y rija' chuqa' man ch'ajch'oj ta k'a toq xtok na ri aq'a'.

⁹K'ari' jun chik achin ri kan ch'ajch'oj, niberujoko-pe ri ruchajul ri wákix y niberuya' kan k'a chuchi-el ri akuchi ek'o-wi-qa, ri akuchi kan ch'ajch'oj-wi. Xtuyek k'a richin nik'atzin chike ri ch'aqa' chik iwinaq, richin chi nikiya' chupan ri ya' richin ri ch'ajch'ojirisanik y richin chuqa' nikikusaj richin kuyubel-mak.

¹⁰Ri nijokon k'a ri ruchajul ri wákix kan nuch'ej chuqa' ri rutziaq. Y rija' kan man ch'ajch'oj ta k'a toq xtok na ri aq'a'. Y re jun pixa' re' kan nok k'a kichin ri iwinaq israelita, y chuqa' kan nok kichin ri winaqi' ri man e iwinaq ta, ri ek'o chi'ikojol.

¹¹Xabachike chike ri iwinaq ri nuchop jun ch'akulaj richin jun kamineq, xtok man ch'ajch'oj ta y keri' xtik'oje' kan richin wuqu' q'ij.

¹²Roma ri' ri wineq ri' nik'atzin nuch'ajch'ojirisaj-ri' ri pa rox q'ij y ri pa ruwuq q'ij, rik'in ri ya' ri richin ch'ajch'ojirisanik. Y keri' kan xtich'ajch'ojir kan. Jak'a wi man xtuch'ajch'ojirisaj ta ri' ri pa rox q'ij y ri pa ruwuq q'ij, kan man xtich'ajch'ojir ta.

¹³Y wi ri wineq ri nuchop jun ch'akulaj richin jun kamineq xa man nrajo' ta nuch'ajch'ojirisaj-ri', kan nuben chuqa' chi man ch'ajch'oj ta chire ri wachoch richin molojri'il. Ri wineq ri' xtiwelesaj k'a el chi'ikojol, roma man xchikex ta ri ya' ri richin ch'ajch'ojirisanik chirij y kan xtrejqalej k'a ri rumak.

¹⁴Jare' ri ruchojmilal ri niban toq k'o jun wineq niken pa rachoch. Konojel ri ek'o rik'in y konojel ri xke'ok-apo pa jay, kan xke'ok man ch'ajch'oj ta richin wuqu' q'ij.

¹⁵Y chuqa' ronojel ri k'ojelibel ri ek'o chiri' ri jaqel kiwi', ri xa kan maneq kitz'apebal ri kan jebel nujabuj kan ruwi', chuqa' kan xke'ok man ch'ajch'oj ta.

¹⁶Y wi ta jun wineq ri beneq pa juyu' y chaq k'ate' niberuchapa-pe jun ch'akulaj richin jun wineq ri kamisan kan, o richin jun wineq ri choj xken o chaq k'ate' niberuchapa-pe rubaqil jun kamineq o jun muqbel, ri wineq ri' xtok man ch'ajch'oj ta richin wuqu' q'ij.

¹⁷Ri nik'atzin k'a chire ri wineq ri man ch'ajch'oj ta, juba' ruchajul kan ri chikop ri xporox. Jari' ri niya'ox pa jun k'ojelibel, y nuq'ej ya' chuwech ri k'a juba' niwelesaj-pe pa pozo.

¹⁸K'ari' nipe k'a jun achin ri ch'ajch'oj y nuchop jun boraj q'ayis hisopo y nuju' chupan ri ya' ri'. Xeri' nuchikaj pa kiwi' ri winaqi' ri xek'oje' rik'in ri kamineq y pa ruwi' ri jay akuchi xk'oje-wi ri kamineq y chuqa' pa ruwi' ronojel ri k'o chupan ri jay ri'. Nuchikaj chuqa' chirij ri wineq ri xchapo rubaqil jun kamineq, chuqa' chirij ri xchapo ri kamisan kan, ri xchapo ri kamineq ri xa choj xken y ri pa ruwi' chuqa' ri xchapo jun muqbel.

¹⁹Ri ch'ajch'oj achin xtuchikaj k'a ri ya' ri' chirij ri man ch'ajch'oj ta pa rox q'ij y pa ruwuq q'ij. Toq ruch'ajch'ojirisan chik, ri wineq ri' nuch'ej ri rutziaq, natin-el y ja ri aq'a' ri' xtich'ajch'ojir.

²⁰Jak'a wi k'o jun wineq ri man ch'ajch'oj ta y kan man nrajo' ta nuch'ajch'ojirisaj-ri' y man xchikex ta chuqa' ri ya' pa ruwi', ri wineq ri', kan xtiwelesaj k'a el chi'ikojol, roma kan nuben chire ri wachoch chi man ch'ajch'oj ta.

²¹Re' kan xtok k'a jun ruchojmilal richin jantape' chiwe rix. Y ri nichikan ri ya' richin ch'ajch'ojirisanik k'o chi nuch'ej chuqa' ri rutziaq. Y xabachike ri xtichapo ri ya' ri' kan xtok man ch'ajch'oj ta k'a toq xtok na qa ri aq'a'.

²²Ronojel k'a ri xkeruchop ri wineq ri man ch'ajch'oj ta, chuqa' xtok man ch'ajch'oj ta. Y xabachike wineq ri xtichapo ronojel re' kan xtok man ch'ajch'oj ta k'a toq xtok na qa ri aq'a', xcha' ri Dios chike.