Read Kaqchikel Núm 28 Bible Online

Núm 28 - Kaqchikel bible

Núm 28

¹Y ri Jehová xch'on chik k'a rik'in ri Moisés y xubij chire:

²Tabij chike ri awinaq israelita chi man tikimestaj rubanik ri k'o chi nikisuj-pe chuwe pa ruq'ijul, ri kaxlan-wey y ri sipanik ri yeporox ri kan yejubulin chinuwech.

³Chuqa' xtabij chike chi ja sipanik re' ri xtikisuj chinuwech yin: Q'ij q'ij kan tikisuju' k'a ka'i' nima-alaj achij taq karne'l ri jun kijuna', ri kan e tz'aqet. Jari' k'a ri xtikiporoj chijun chinuwech.

⁴Jun k'a chike ri karne'l ri' nikisuj ri nimaq'a', y ri jun chik nikisuj ri tiqaq'ij.

⁵Y re' junan yesuj rik'in ri sipanik richin ri jalajoj ruwech ixin. K'o chi xtikisuj chuwe, ka'i' libra k'ej chayun xolon rik'in jun litro aceite richin olivo ri kan jebel ch'ajch'oj.

⁶Re' kan jantape' k'a xtiporoj chinuwech, achi'el xsuj ri chiri' pa ruwi' ri juyu' Sinaí richin xjubulin chinuwech yin Jehová.

⁷Y chuqa' k'o chi nisuj ri sipanik ri richin vino. Kan niq'ej k'a chirij ri kamelabel y jun litro k'a ri niq'ej pa ruwi' jujun nima-alaj achij karne'l. Ronojel re' kan ja ri pa wachoch yin niban-wi; re' kan richin k'a chi niya'ox nuq'ij yin Jehová.

⁸Ri ruka'n karne'l ri nisuj ri tiqaq'ij, kan rik'in k'a chuqa' k'ej y vino nisuj; kan junan rubanik rik'in ri nisuj ri nimaq'a'. Re jun sipanik re' kan niporox chijun richin nijubulin chinuwech y richin chi niya'ox nuq'ij yin Jehová.

⁹Chupan ri q'ij richin uxlanenri'il kan ruk'amon nikik'uaj-apo ka'i' nima-alaj achij karne'l ri k'o jun kijuna' y ri kan e tz'aqet. Y ka'i' libra k'ej chayun xolon aceite rik'in, kere' rubanik ri sipanik, kan rachibilan chuqa' ri vino.

¹⁰Jare' ri sipanik ri yeporox chijun ri yesuj ri q'ij richin uxlanenri'il, rachibilan chuqa' ri sipanik ri nisuj q'ij-q'ij.

¹¹Ri nabey q'ij chire ri ik' xtikisuj chinuwech yin, ka'i' nima-alaj achij wákix, jun achij karne'l y wuqu' achij karne'l ri jujun kijuna' y konojel re' kan e tz'aqet.

¹²Chikijujunal ri wákix rachibilan waqi' libra k'ej chayun xolon rik'in aceite. Chikijujunal ri achij karne'l rachibilan kaji' libra k'ej chayun xolon rik'in aceite.

¹³Chirij ri jujun nima-alaj achij karne'l niya' ka'i' libra k'ej chayun xolon rik'in aceite. Y re' niporox chijun richin jun sipanik ri nijubulin chinuwech yin Jehová.

¹⁴Ri sipanik richin ri vino, ka'i' litro ri niya'ox chirij ri jujun nima-alaj achij wákix y jun litro rik'in nik'aj chirij ri jun achij karne'l, y jun litro chirij jujun karne'l ri k'o jun kijuna'. Ja sipanik re' ri k'o chi yeporox chijun chinuwech yin ronojel ik' chire ri juna'.

¹⁵Y toq isujun chik re taq chikopi' re' rachibilan ri vino, k'o chi nisuj-apo chinuwech yin richin kuyubel-mak, jun achij tzuntzun.

¹⁶Chupan ri q'ij kajlajuj richin ri nabey ik' chire ri juna', jari' toq ninimaq'ijuj ri aq'a' toq yin choj xinik'o-el pan iwi' richin xixinkol-pe.

¹⁷Y chupan chik ri jun q'ij jari' toq nitikeriba' yixnimaq'ijun wuqu' q'ij nitej kaxlan-wey ri maneq ch'amilej-q'or rik'in.

¹⁸Ri nabey q'ij chire ri wuqu' q'ij niben jun molojri'il, y re' jun q'ij ri kan man jun kowilej samaj ri xtiben.

¹⁹K'o chi nisuj chikopi' richin yeporox chijun ri kan nijubulin chinuwech. Ka'i' nima-alaji' achija' taq wákix, jun achij karne'l y wuqu' achija' karne'l ri jujun kijuna' y konojel re' kan e tz'aqet.

²⁰Chuqa' nisuj richin sipanik k'ej chayun xolon rik'in aceite, nisuj k'a waqi' libra k'ej chayun rachibilan ri wákix, y kaji' libra k'ej rachibilan ri achij karne'l,

²¹ka'i' libra k'ej rik'in ri jujun nima-alaj achij karne'l.

²²Y chuqa' nisuj jun achij tzuntzun richin kuyubel-mak richin nijunamatej iwech wik'in.

²³Y ronojel re sipanik re' kachibilan ri chikopi' ri ye'isuj q'ij-q'ij ronojel nimaq'a'.

²⁴Keri' niben chi wuqu' q'ij chire ri nimaq'ij, richin nijubulin chinuwech ri sipanik ri yeporox chijun. Y ronojel ri sipanik ri' kachibilan ri chikopi' ri ye'isuj q'ij-q'ij ronojel nimaq'a' kachibilan ri vino.

²⁵Pa ruwuq q'ij k'o chi niben ri imolojri'il richin niya' nuq'ij, y ri q'ij ri' man jun kowilej samaj ri xtiben.

²⁶Chuqa' yixnimaq'ijun toq napon ri nimaq'ij richin Pentecostés, toq nisuj ri nabey jalajoj ruwech ixin. Y chupan ri q'ij ri' k'o chi nimol-iwi' richin niya' nuq'ij y man jun kowilej samaj niben.

²⁷Xtisuj k'a sipanik ri yeporox chijun, richin nijubulin chinuwech yin Jehová. Xtisuj k'a ka'i' nima-alaji' achija' taq wákix, jun achij karne'l y e wuqu' alaji' achija' karne'l ri jun kijuna'.

²⁸Ri wákix rachibilan waqi' libra k'ej ri xolon rik'in aceite. Y rik'in ri achij karne'l, k'o chi niya' kaji' libra k'ej chayun ri xolon rik'in aceite.

²⁹Y chikij ri jujun ri nima-alaj achij karne'l, k'o chi niya' kaka' libra k'ej chayun ri xolon aceite rik'in.

³⁰Chuqa' k'o chi nisuj jun achij tzuntzun richin nikuyutej imak y keri' nijunamatej iwech wik'in.

³¹Y ronojel re sipanik re' rachibilan ri vino y ri chikopi' ri ye'isuj q'ij-q'ij ronojel nimaq'a' kachibilan ri jalajoj ruwech ixin. Y konojel k'a ri taq chikopi' k'o chi kan e tz'aqet.