Read Kaqchikel Núm 30 Bible Online

Núm 30 - Kaqchikel bible

Núm 30

¹Ri Moisés xch'on kik'in ri e aj-raqen pa kiwi' ri jujun tzobaj richin ri Israel y xubij chike: Kere' xubij-pe ri Jehová:

²Toq k'o jun achin ri nujikiba' rutzij chuwech ri Jehová k'o chi nuben y man tujel ri ruch'obonik.

³Y toq jun xten k'a k'o na kik'in ri rute-rutata' y k'o nusuj chire ri Jehová o xabachike ri nusuj chi nuben,

⁴wi ri rutata' nunabej chi rija' k'o rusujun chire ri Jehová, y ri rutata' xa kan man jun xtubij chire re xten re', k'o chi nuben ri rusujun.

⁵Jak'a wi ri rutata' xunabej y xa man xqa' ta chuwech ri ruch'obonik ri rumi'al, ri xten ri' kan man xtuben ta k'a ri rusujun. Y ri Jehová man xtuch'ojij ta k'a chire ri xten ri' roma xa ja ri rutata' ri man xajowan ta.

⁶Jak'a wi nujikiba' rutzij y k'ari' nik'ule' ta el,

⁷y wi ri rachijil xtunabej ri rusujun ri k'o chi nuben y wi xtiqa' chuwech, re ixoq re' kan tubana' k'a ronojel ri k'o chi nuben rik'in ronojel ránima.

⁸Jak'a wi ri rachijil xa man xqa' ta chuwech ri rubin rija', man k'a tuben, y ri Jehová man xtuch'ojij ta chire.

⁹Ronojel k'a ri rusujun richin nuben jun malka'n o ri rujachon ri' rik'in ri rachijil, kan k'o chi tubana'.

¹⁰Wi k'o ta jun ixoq k'ulan, ri k'o ta nusuj-apo y kan nuben chi nuya' rutzij,

¹¹y toq nunabej ri rachijil, y wi xqa' chuwech y man xuch'ojij ta chire, ri rusujun k'o chi nuben rik'in ronojel ránima.

¹²Jak'a wi ri rachijil man xqa' ta chuwech, ri ixoq kan man tuben k'a y ri Jehová kan man xtuch'ojij ta chire.

¹³Ronojel ri rusujun y ri ya'on tzij ri rubanon rik'in ronojel ránima, ja ri rachijil ri xtibin wi nuben o man nuben ta.

¹⁴Y wi ri rachijil man jun xtubij chire y keri' niq'ax ri q'ij, nel chi tzij chi kan xqa' chuwech ri rusujun ri rixjayil, roma man jun ch'abel xubij.

¹⁵Jak'a wi xa man nuya' ta chik q'ij chire toq xq'ax yan k'iy q'ij, ja ri achijlonel xtejqalen ri sujunik ri', y man ja ta chik ri rixjayil, keri' nubij ri Jehová, xcha' ri Moisés.

¹⁶Jare' ri ruchojmilal ri xuya' ri Jehová chire ri Moisés pa kiwi' ri k'ulaj taq winaqi' y pa ruwi' ri xten toq k'a k'o na kik'in ri rute-rutata'.