Read Kaqchikel Núm 31 Bible Online

Núm 31 - Kaqchikel bible

Núm 31

¹Ri Jehová xch'on chik rik'in ri Moisés y xubij chire:

²Rokik k'a at k'es na rat, tabana' ruk'exel chike ri aj-Madián, pa kibi' ri awinaq israelita, xcha'.

³K'ari' ri Moisés xch'on kik'in ri ruwinaq y xubij chike: Ri Jehová nubij chi tibana' ichojmil roma jujun chiwe rix xkixbe pa labal kik'in ri aj-Madián, roma rija' nrajo' chi tibana' ruk'exel chike.

⁴Xke'acha' k'a el e 1,000 achi'a' pa jujun tzobaj richin ri tinamit Israel, richin chi xkebe pan oyowal, xcha'.

⁵Kere' k'a xban-el chike ri achi'a' ri' e 1,000 pa jujun tzobaj. Y ri kajlabal konojel e 12,000,

⁶k'ari' ri Moisés xeruteq-el chupan ri labal kachibilan ri Finees, ri ruk'ajol ri sacerdote Eleazar. Y rija' xuk'uaj-el jujun chike ri samajibel richin ri rachoch ri Dios y chuqa' ri trompeta.

⁷Y xkiben oyowal kik'in ri aj-Madián, achi'el xubij ri Jehová chire ri Moisés, y xekikamisaj k'a kan konojel ri achi'a' ri ek'o chiri'.

⁸Y chikikojol k'a ri' xekikamisaj kan e wo'o' rey richin ri Madián: Ri Eví, ri Réquem, ri Sur, ri Hur y ri Reba. Chuqa' xkikamisaj kan chi espada ri Balaam, ruk'ajol ri Beor.

⁹Y ri israelita xekik'uaj k'a el ri ixoqi' aj-Madián y chuqa' ri ak'uala', y konojel ri kawej, y xkijokola-el ronojel ri kibeyomel;

¹⁰y xkiyala' kan ruq'aq'al ri kitinamit, ri kokoj tinamit y ri kachoch.

¹¹Y ronojel ri k'o rejqalen xkimej kan chuwi-kiq'a' ri etzelanel kichin y xekik'en-pe ri winaqi' y ri kawej.

¹²Xekik'en-pe chikiwech ri Moisés y ri sacerdote Eleazar y chuqa' chikiwech ri kiwinaq israelita ri akuchi ek'o-wi-qa pa taq'aj richin ri Moab ri k'o chuchi' ri raqen-ya' Jordán ri k'o chuwech-apo ri Jericó.

¹³Y xel k'a pe ri Moisés, ri sacerdote Eleazar y konojel ri e aj-raqen pa kiwi' ri tinamit Israel, richin xekik'ul k'a chirij-el ri akuchi ek'o-wi-qa.

¹⁴Y toq rije' xe'apon, ri Moisés xyakatej janila royowal chikij ri e aj-raqen pa kiwi' ri aj-labal ri xetzolej-pe.

¹⁵K'ari' xubij chike: ¿Achike roma man xe'ikamisaj ta kan konojel ixoqi'?

¹⁶Roma rije' xa xkitzeqelibej ri itzel pixabanik ri xuya' ri Balaam richin xe'ok jun tzaqibel kichin ri achi'a' israelita, toq xa xkijel kan ri kibey chiri' pa Baal-peor. Y roma ri' ri Jehová ojer kan xuya-pe ruk'ayewal pa kiwi' ri qati't-qamama'.

¹⁷Wakami k'a ke'ikamisaj konojel ri taq alaboni' chikikojol ri ak'uala'. Chuqa' ke'ikamisaj konojel ri ixoqi'.

¹⁸Jak'a konojel ri xtani' ri ek'o chikikojol ri ixoqi', rije' man ye'ikamisaj ta, xa kan ke'ok iwixjayilal rix.

¹⁹Xabachike k'a chiwe rix wi xukamisaj ta jun wineq o xuchop ta jun kamineq, ruk'amon tel-el re akuchi ojk'o-wi-qa, y pa rox q'ij nuch'ajch'ojirisaj-ri'. Keri' pa ruwuq q'ij xkixtzolin-pe ri akuchi ojk'o-wi-qa.

²⁰Keri' chuqa' tich'ajch'ojirisaj ronojel ri itziaq ri xik'uaj-el pan oyowal: Ronojel ri e banon rik'in tz'um, ronojel ri e banon rik'in rusale'y tzuntzun, y ronojel ri e banon rik'in che', xcha' ri Moisés.

²¹K'ari' ri sacerdote Eleazar xubij chike ri aj-labal ri e tzolejineq-pe pan oyowal: Ri Jehová xubij chire ri Moisés chi jare' ri ruchojmilal richin nich'ajch'ojirisaj ri xe'ik'en-pe.

²²Ronojel k'a ri e banon rik'in q'anapueq, saqipueq, q'enq'oj-pueq y jalajoj kiwech pueq.

²³y ronojel ri nukoch' niq'ax pa q'aq', k'o chi nik'owisaj pa q'aq' y k'ari' nich'ej rik'in chik ya'. Jak'a ri ch'aqa' chik ri xa man yekoch'on ta ri yeq'ax pa q'aq', xaxe k'a rik'in ya' xtich'ajch'ojirisaj-wi.

²⁴Y chirij ri ruwuq q'ij, k'ari' xtich'ej ri itziaq y keri' kan ix ch'ajch'oj chik. K'ari' ruk'amon chik yixok chupan ri akuchi ojk'o-wi-qa, xubij ri Jehová, xcha' ri Eleazar.

²⁵Y ri Jehová xch'on chik rik'in ri Moisés, y xubij chire:

²⁶Rik'in ruto'onik ri sacerdote Eleazar y ri e aj-raqen ri ek'o pa ruwi' ri tinamit, ke'iwajlaj ri winaqi' y ri kawej ri xkik'en-pe pa ruwach'ulew Madián.

²⁷Y xtich'er k'a pa nik'aj. Nik'aj xtich'er kan richin xtiya' chike ri aj-labal ri xebe pan oyowal, y nik'aj chik xtich'er kan richin xtiya' chike ri ch'aqa' chik iwinaq.

²⁸Chirij re' tich'ara' kan juba' richin xtiya' chuwe yin Jehová. Chire ri xtikichinaj kan ri aj-labal, xtik'en k'a kan jun chire ri e 500 chike ri winaqi' y ri nima'q y kokoj taq kawej.

²⁹Re juba' re' xtaya' chire ri sacerdote Eleazar, kan achi'el xa ta chuwe yin naya-wi.

³⁰Y ri nik'aj chik kichin ri awinaq, k'o chi tich'ara' kan juba' richin xtiya' chike ri e levita ri yechajin ri wachoch banon rik'in tzieq. Xtik'en k'a kan jun chire ri e kawineq lajuj chike ri winaqi' y ri nima'q y kokoj taq kawej, xcha'.

³¹Kan keri' xkiben ri Moisés y ri sacerdote Eleazar achi'el ri xubij ri Jehová chike.

³²Ri xkik'en-pe ri aj-labal chuwi-kiq'a' ri etzelanel kichin e 675,000 karne'l y tzuntzun,

³³e 72,000 wákix

³⁴y e 61,000 bur.

³⁵Y jak'a ri xtani', konojel rije' e 32,000.

³⁶Ri nik'aj xya'ox chike ri achi'a' ri xebe pan oyowal, y ri kajlabal e 337,500 karne'l y tzuntzun, e 36,000 wákix, e 30,500 bur y 16,000 xtani'. Y ri xeya'ox chire ri Jehová e 675 karne'l y tzuntzun, oxk'al kablajuj wákix, oxk'al jun bur y e juwineq kablajuj xtani'.

³⁷

³⁸

³⁹

⁴⁰

⁴¹K'ari' ri Moisés xujech re sipanik re' chire ri Jehová, y kan xjach pa ruq'a' ri Eleazar, achi'el rubin kan ri Jehová chire.

⁴²Ri nik'aj xya'ox chire ri tinamit, y ri kajlabal e 337,500 karne'l y tzuntzun, e 36,000 wákix, e 30,500 bur y 16,000 xtani'. Y ri xeya'ox chike ri e levita ri yechajin ri rachoch ri Dios e 675 karne'l y tzuntzun, oxk'al kablajuj wákix, oxk'al jun bur y e juwineq kablajuj xtani'. Y ronojel re' xban achi'el ri xubij ri Jehová.

⁴³

⁴⁴

⁴⁵

⁴⁶

⁴⁷

⁴⁸Chirij re' ri e aj-raqen pa kiwi' ri aj-labal, xepe k'a rik'in ri Moisés,

⁴⁹y xkibij chire: Qajaw, xeqajlaj ri aj-labal ri ek'o pa qaq'a' y qonojel k'a ojk'o y man jun xken kan chiqe.

⁵⁰Wakami k'a jare' qak'amon-pe chiqajujunal jun sipanik chire ri Jehová. Ja ri jalajoj ruwech taq wiqobel e banon rik'in q'anapueq. Y wakami niqasuj chire ri Jehová richin matioxinik, xecha'.

⁵¹K'ari' ri Moisés y ri sacerdote Eleazar xekik'ul k'a kan ri jalajoj ruwech wiqobel banon rik'in q'anapueq.

⁵²Ri ralal ri q'anapueq ri xkisuj-apo ri e aj-raqen pa kiwi' ri aj-labal, más juba' kaji' quintal.

⁵³Re sipanik re' man ja ta ri aj-labal ri xeya'on-apo, stape' rije' kan k'o xkimej-pe chuwi-kiq'a' ri etzelanel kichin.

⁵⁴Keri' ri Moisés y ri sacerdote Eleazar xkik'ul kan ri q'anapueq chuwi-kiq'a' ri e aj-raqen pa kiwi' ri aj-labal; ronojel k'a re' xkik'uaj pa rachoch ri Dios, richin jun natabel kichin ri winaqi' israelita chuwech ri Jehová.