Read Kaqchikel Núm 4 Bible Online

Núm 4 - Kaqchikel bible

Núm 4

¹Ri Jehová xch'on chik rik'in ri Moisés y rik'in ri Aarón, y xubij chike:

²Ke'iwajlaj k'a konojel ri achi'a' aj pa rachoch ri Quehat ri rijatzul kan ri Leví.

³Ke'iwajlaj k'a konojel ri k'o juwineq lajuj kijuna' k'a kawineq lajuj, richin nikiben ri samaj chupan ri wachoch richin molojri'il.

⁴Ri kisamaj rije' chupan ri wachoch ri richin molojri'il, ja ri nikitz'et ri samajibel ri ek'o chupan.

⁵Jak'a toq nuchop chik el bey ri tinamit Israel xa ja ri Aarón y ri e ruk'ajol ri yeqasan-el ri tzieq ri achoq ik'in ch'aron-wi rupan ri wachoch y jari' ri nikiya-el chirij ri káxa ri richin ri nujikibel-tzij.

⁶Y k'ari' nikiya' chik el jun sale'y chirij ri kan jebejoj ok rubanik y pa ruwi' chik ri' nikirik' chik el jun raxroj tzieq y k'ari' nikiju-el ri che' pa taq ruxikin richin chi utz nuk'uex.

⁷Richin chi nuk'uex ri mesa ri nik'oje' ri kaxlan-wey pa ruwi' ri nisuj chuwe yin, nabey nirik' jun tzieq pa ruwi' y k'ari' nikiya-el ri leq, ri pajbel, ri bojo'y, ri xára y ri kaxlan-wey ri kan jantape' k'o pa ruwi' ri mesa ri'.

⁸K'ari' nikiya' chik el jun keq tzieq y xaxe ri' nikitz'apej-el rik'in jun sale'y ri jebejoj rubanik. K'ari' nikiju-el ri che' pa taq ruxikin richin chi utz nuk'uex.

⁹Rik'in jun raxroj tzieq nikitz'apej-el-rij ri candelabro, ri taq candil ri yetz'uye' pa ruwi', ri chojmirisabel ri taq kiq'aq'al, ri k'ulbel-chaj y ri yakbel aceite.

¹⁰Y ronojel re samajibel re', nikipis chuqa' el chupan jun sale'y ri jebejoj rubanik y nikiya' chuwech jun nim ruwech tz'alem richin chi utz nuk'uex-el.

¹¹Y richin nuk'uex-el ri porobel-pom ri banon rik'in q'anapueq, nikiya' k'a el jun raxroj tzieq pa ruwi' y chirij chik ri' nikiya' chik el jun sale'y jebejoj rubanik. Y k'ari' nikiju-el ri che' pa taq ruxikin richin chi utz nuk'uex-el.

¹²Y richin chi nuk'uex-el ri samajibel ri yek'atzin chupan ri wachoch yin, k'o chi yepis chupan jun raxroj tzieq y k'ari' nipis-el rik'in jun sale'y ri jebejoj rubanik y nikiya-el chuwech jun nim ruwech tz'alem richin chi utz nuk'uex-el.

¹³Richin chi nuk'uex-el ri porobel richin ri kamelabel, rije' nikelesaj k'a kan ri chaj chupan y k'ari' nikitz'apej-el-rij rik'in jun raxroj tzieq.

¹⁴Y pa ruwi' ri' yekiya-el ronojel ri samajibel richin ri porobel ri': Ri ruk'ojelibal ri racheq-q'aq', ri jik'bel-ti'ij, ri tenaza chojmirisabel q'aq' y ri nima'q taq leq. Ronojel re' nikitz'apej-el rij rik'in jun sale'y ri jebejoj rubanik. K'ari' nikiju-el ri che' pa taq ruxikin richin chi utz nuk'uex-el.

¹⁵Y toq ri Aarón y ri e ruk'ajol e k'achojineq chik richin nikipis-rij ronojel ri richin ri wachoch y ronojel ri taq samajibel ri ye'ukusex chuqa' chupan ri wachoch; y toq ri tinamit jari' ek'o chik richin ye'el-el chiri' richin chi yebe juk'an chik, jari' toq yepe ri e rijatzul kan ri Quehat y yekik'uaj-el ronojel ri e pisil chik. Jak'a man jun bey tikichop jun chike ronojel ri samajibel ri', richin keri' man yeken ta. Jare' ri kisamaj ri e rijatzul kan ri Quehat chupan ri wachoch richin molojri'il.

¹⁶Jak'a ri aceite kichin ri candil, ri jubulej pom y ri sipanik richin trigo ri jantape' nisuj chuwe y chuqa' ri aceite ri nik'atzin richin nicha'ox jun nusamajel o jun samajel richin pa wachoch yin; ri' nik'oje' pa ruq'a' ri Eleazar ri ruk'ajol ri nimalej sacerdote Aarón, xcha' ri Jehová.

¹⁷Ri Jehová xch'on chik jun bey rik'in ri Moisés y rik'in ri Aarón y xubij chike:

¹⁸Richin chi man yeken ta rije' toq yejel-apo chikinaqaj ri samajibel, kan kere' k'a tikibana': Ri Aarón y ri e ruk'ajol xke'apon nabey chupan ri wachoch y k'ari' xke'ok-apo ri e rijatzul kan ri Quehat. Y ri Aarón y ri e ruk'ajol xtikibij ri kisamaj chikijujunal rije' y xtikibij chike ri achike chi ejqa'n ri k'o chi yekik'uaj-el. Jak'a man ke'ok-apo chutz'etik ronojel ri samajibel toq najin rupisik richin chi man yeken. Keri', man k'a tiya' q'ij richin chi yek'is-el chikikojol ri levita konojel ri aj pa rachoch kan ri Quehat, xcha' ri Jehová.

¹⁹

²⁰

²¹Ri Jehová xch'on chik k'a pe rik'in ri Moisés y xubij:

²²Ke'awajlaj k'a konojel ri achi'a' e rijatzul kan ri Guersón,

²³konojel ri k'o juwineq lajuj kijuna' k'a kawineq lajuj, richin nikiben ri kisamaj chupan ri wachoch richin molojri'il.

²⁴Ri kisamaj k'a rije' ja ri nikik'uaj ejqa'n richin ri wachoch.

²⁵Ja rije' k'a xke'uk'uan ri nima'q taq peraj tzieq ri richin ruxe' ri wachoch richin molojri'il, ri peraj tzieq ri nitz'apen ri ruwi', ri nima'q taq peraj tz'um ri nibe chuqa' pa ruwi' y ri peraj tzieq richin ri ruchi' ri wachoch.

²⁶Chuqa' ja rije' ri ye'uk'uan ri nima'q taq peraj tzieq ri nisutin-rij chijun ri ruwa-wachoch ri akuchi k'o-wi ri porobel richin ri kamelabel, chuqa' ri peraj tzieq ri k'o pan okibel richin ri ruwa-wachoch, ri kolo' y ronojel ri samajibel ri nik'atzin chire.

²⁷Ri Aarón y ri e ruk'ajol kan xtikitz'et k'a y kan xtikibij chike ri e rijatzul kan ri Guersón ri achike chi samaj y ri achike ri ejqa'n ri nik'atzin chi yekik'uaj.

²⁸Jare' ri kisamaj ri e rijatzul kan ri Guersón ri chiri' pa wachoch richin molojri'il. Rije' xkek'oje' k'a chuxe' ri rutzij ri Itamar ri ruk'ajol ri nimalej sacerdote Aarón.

²⁹Ke'awajlaj k'a konojel ri e rijatzul kan ri Merarí,

³⁰ri k'o juwineq lajuj kijuna' k'a kawineq lajuj, richin nikiben ri samaj chupan ri wachoch richin molojri'il.

³¹Jare' ri samaj ri k'o chi nikiben rije': Yekik'uaj ri marco banon rik'in tz'alem, ri baloj, ri xata't y ri kitz'uyubal ri xata't.

³²Y chuqa' rije' nikik'uaj ri xata't ri ye'ukusex richin nusutij-rij ri wachoch, ri kitz'uyubal ri xata't, ri che' simej kitza'n, ri kolo' y ronojel ri samajibel ri e k'atzinel. Kan k'o chi xtibij chike chikijujunal ri achike chi ejqa'n nikik'uaj toq k'o chi yixbe juk'an chik.

³³Jare' ri kisamaj ri e aj pa rachoch kan ri Merarí rik'in ri wachoch richin molojri'il. Rije' chuqa' xkek'oje' k'a chuxe' rutzij ri Itamar ri ruk'ajol ri nimalej sacerdote Aarón, xcha'.

³⁴Ri Moisés, ri Aarón y ri aj-raqen richin ri tinamit kan xekajlaj-wi k'a ri e rijatzul kan ri Quehat.

³⁵Xekajlaj k'a ri achi'a' ri k'o juwineq lajuj kijuna' k'a kawineq lajuj, richin nikiben ri samaj chupan ri rachoch ri Dios richin molojri'il.

³⁶Y ri kajlabal e 2,750.

³⁷Jare' ri kajlabal ri e rijatzul kan ri Quehat ri yesamej pa rachoch ri Dios toq ri Moisés y ri Aarón xkiben chi xekajlaj konojel achi'el rubin ri Jehová chire ri Moisés.

³⁸Keri' chuqa' xe'ajlex ri rijatzul kan ri Guersón.

³⁹Xekajlaj k'a ri achi'a' ri k'o juwineq lajuj kijuna' k'a kawineq lajuj, richin nikiben ri samaj chupan ri rachoch ri Dios.

⁴⁰Y ri kajlabal e 2,630.

⁴¹Jare' ri kajlabal ri e rijatzul kan ri Guersón ri yesamej chupan ri rachoch ri Dios toq xe'ajlex, achi'el xubij ri Jehová.

⁴²Keri' chuqa' xe'ajlex ri e rijatzul kan ri Merarí.

⁴³Xekajlaj k'a ri achi'a' ri k'o juwineq lajuj kijuna' k'a kawineq lajuj, richin nikiben ri samaj chupan ri rachoch ri Dios.

⁴⁴Y ri kajlabal e 3,200.

⁴⁵Jare' ri kajlabal ri e rijatzul kan ri Merarí ri yesamej pa rachoch ri Dios toq ri Moisés y ri Aarón xkiben chi xekajlaj konojel achi'el rubin ri Jehová.

⁴⁶Keri' ri Moisés, ri Aarón y ri e aj-raqen richin ri tinamit Israel xekajlaj konojel ri e rijatzul kan ri Leví.

⁴⁷Xekajlaj k'a ri achi'a' ri k'o juwineq lajuj kijuna' k'a kawineq lajuj, richin nikiben ri samaj toq nikik'uaj-el ri rachoch ri Dios richin yebe chik juk'an.

⁴⁸Y ri kajlabal konojel e 8,580.

⁴⁹Chikijujunal xya'ox kisamaj y ri ejqa'n ri nikik'uaj chikijujunal y keri' toq xe'ajlex achi'el xubij ri Jehová chire ri Moisés.