Read Kaqchikel Núm 5 Bible Online

Núm 5 - Kaqchikel bible

Núm 5

¹Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Konojel ri winaqi' ri k'o yabil chikij ri nutaluj-ri' o k'o ri yabil chike ri nipujan-pe, keri' chuqa' ri man e ch'ajch'oj ta roma xkichop jun kamineq, keri' chi achi'a' chi ixoqi' k'o chi xke'iwelesaj-pe chi'ikojol, richin man nok man ch'ajch'oj ta ri akuchi ixk'o-wi-qa y ri akuchi ink'o-wi yin chi'ikojol, xcha' ri Jehová.

⁴Y ri israelita kan xekelesaj k'a el ri akuchi ek'o-wi-qa konojel ri winaqi' ri keri' kibanon, achi'el rubin ri Jehová chire ri Moisés.

⁵Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij:

⁶Toq jun wineq nuben xabachike ch'a'oj chire jun chik wineq, rija' kan aj-mak-wi chinuwech yin.

⁷Ri wineq ri xbanon ri ch'a'oj k'o chi nuq'alajirisaj chi ja rija' ri xmakun y nutoj ri ch'a'oj ri xuben. Y pa ruwi' re' k'o chi nuya' ri jun chire ri ro' chire ri achoq chire xuben-wi ri ch'a'oj.

⁸Jak'a wi ri wineq ri achoq chire xban-wi ri ch'a'oj xa xken y man jun ach'alalri'il ri achoq chire ta niya-wi ri ruk'exel, ronojel re' xtok wichin yin y pa ruwi' re' k'o chi nuya-pe ri karne'l richin nink'en chik ruwech. Ronojel re' nukusaj-qa ri sacerdote.

⁹Ronojel ri sipanik ri nikijech ri awinaq chire ri sacerdote, kan xtok richin rija'.

¹⁰Keri' ronojel ri xtijach chuwe yin, nuk'uex rik'in ri sacerdote y kan xtok richin rija', xcha' ri Jehová.

¹¹Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Wi k'o ta jun achin nuch'ob chi ri rixjayil xuchop-el itzel k'aslen y xa rewan chuwech rija',

¹³y chi kan nik'oje' rik'in jun chik achin pan ewel, jak'a man naben ta ri nuben ri ixoq roma man jun tz'eteyon y man ilitajineq ta chupan ri itzel banobel ri'.

¹⁴Wi ta ri achijlonel re' natixan ta chirij ri rixjayil y nuch'ob chi xa rukanon chik jun achin y xa man q'alaj ta chuwech wi qitzij o man qitzij ta,

¹⁵re achin re' xtuk'en-pe ri rixjayil chuwech ri sacerdote y chuqa' xtuk'en-pe ka'i' libra k'ej richin cebada, roma ri rixjayil, jak'a pa ruwi' re k'ej re', man niya'ox ta aceite ni pom, roma jun kamelabel richin atixanik, richin chi niq'alajin jun mak.

¹⁶K'ari' ri sacerdote nuben chi ri ixoq nijel-pe chinuwech yin Jehová.

¹⁷Y xeri' ri sacerdote nuk'en-pe jun ti xára y nuya' juba' ya' chupan ri k'o chiri' pa wachoch. K'ari' nuk'en-qa juba' ulew chiri' pa wachoch y nuxol chupan ri ya' ri'.

¹⁸Xeri' ri sacerdote nrelesaj-el ri tzieq ri k'o pa rujolon ri ixoq. K'ari' nuya' ri cebada pa ruq'a', ri k'atzinel richin natabel richin chi niq'alajin jun mak roma ri atixanik. Jak'a ri sacerdote ruk'uan pa ruq'a' ri xára ri k'o ri ya' chupan ri nik'amon-pe ri etzelanik pa ruwi' ri aj-mak.

¹⁹K'ari' ri sacerdote xtuben chire ri ixoq richin nujikiba-rutzij y rija' nubij chire ri ixoq ri': Wi man at makuwineq ta rik'in jun chik achin y kan aya'on rejqalen ri awachijil, kan xkatotej kan toq xtaqum re ya' re' ri nik'amon-pe itzel pan awi'.

²⁰Jak'a wi xa ak'uan itzel bey y ak'amon ruwech jun chik achin y abanon chire ri ak'aslen chi man ch'ajch'oj ta,

²¹re ya' re xtaqum-qa xtuben k'a chawe chi xtiqaqa ri etzelanik pan awi'. Kan man chik xkatikir ta xkatalan, xtisipoj y xtiq'ey ri apan. Ronojel re' xtuben ri Jehová chawe richin nok jun k'ambel-na'oj chike ri ch'aqa' chik winaqi', xticha' ri sacerdote. Y ri sacerdote xtubij re ch'abel re' richin chi ri ixoq xtuq'alajirisaj ri rumak, wi qitzij o man qitzij ta. Jari' toq ri ixoq xtubij chi kan keri' xtibanatej.

²³Y xeri' ri sacerdote xtutz'ibaj ri etzelanik chuwech jun tz'um y k'ari' xtuch'ej-qa chupan ri k'ayilej-ya' ri k'o chupan ri ti xára,

²⁴k'ari' ri sacerdote xtuben chire ri ixoq chi xtuqum ri k'ayilej-ya' ri xtik'amon-pe etzelanik pa ruwi', ri kan xtuk'en k'a pe ri q'axo'n chire.

²⁵Jari' toq ri sacerdote xtuk'en-el pa ruq'a' ri ixoq ri cebada ri kik'amon-pe y xtusiloj chinuwech yin. K'ari' nuya' pa ruwi' ri porobel richin ri kamelabel,

²⁶y nuporoj jun moq'. K'ari' ri sacerdote nuben chi ri ixoq nuqum-qa ri k'ayilej-ya'.

²⁷Wi re ixoq re' man ch'ajch'oj ta ruk'aslen roma ruk'amon ruwech jun chik achin y xa xuq'ol ri rachijil, re k'ayilej-ya' nuben chire chi nuk'en-pe ri q'axo'n chire; xtisipoj y kan xtiq'ey ri rupan. Keri' xtiq'alajin chikiwech ri winaqi' chi rija' xqaqa etzelanik pa ruwi'.

²⁸Jak'a wi ri ixoq kan ch'ajch'oj y xa kan choj ri ruk'aslen chuwech ri rachijil, rija' kan xtitotej y kan xtik'oje' chik ral. Keri' xubij ri Jehová chire ri Moisés chi tubij chike ri ruwinaq.

²⁹Ja pixa' re' ri nikusex pa ruwi' ri atixanik toq k'o jun ixjayilonel nuchop-el itzel bey y man ch'ajch'oj ta ri ruk'aslen,

³⁰o toq ri achijlonel nratixaj ri rixjayil; re achin re' k'o chi nuk'uaj ri rixjayil chuwech ri Jehová, y ri sacerdote kan xtuben ronojel ri nubij ri pixa' ri k'o chi niban chire ri ixoq.

³¹Wi keri', ri achijlonel kan xtitotej k'a chuwech ri atixanik y xa kan xaxe ri ixoq ri xtejqalen ri rumak.