Read Kaqchikel Núm 6 Bible Online

Núm 6 - Kaqchikel bible

Núm 6

¹Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Wi k'o ta jun achin o jun ixoq ri nrajo' nuya' rutzij richin nuch'er-ri' richin yirusamajij,

³kan k'o chi man xtuqum ta vino, ni man jun ri ch'amirisan, chuqa' ni ta ri ruya'al uva. Chuqa' man tutej uva, ni ri uva chaqirisan chik.

⁴Rokik rujachon-ri' chuwe yin, man tuqum ni man tutej ronojel ri nel-pe chire ri juwi-uva, ni ri ija'tz, ni ri rij.

⁵Ronojel ri q'ij ri rujachon-ri' chuwe yin, man nusokaj ta ri rusumal-ruwi', jak'a nuya' q'ij richin nik'iy-qa, roma rija' kan rujachon-ri' chuwe yin. Kan k'o chi nibiyin pa ruchojmilal chinuwech k'a toq nik'is na ri q'ij ri rubin.

⁶Chupan ronojel ri q'ij toq rujachon-ri' chuwe yin, k'o chi man nijel ta apo chunaqaj jun kamineq,

⁷stape' kan ja ri rute' o ri rutata' o jun rana' o jun rach'alal ri niken. Wi nijel-apo, nok man ch'ajch'oj ta roma ri kamineq. Ri retal chi kan rujachon-ri' chinuwech yin ja ri nima'q rusumal-ruwi',

⁸y chupan ronojel ri q'ij ri rujachon-ri' chuwe yin, k'o chi tik'oje' ch'ajch'oj.

⁹Wi k'o ta jun niken chaq k'ate' chunaqaj rija', kan nuben chire ri rusumal-ruwi' chi man ch'ajch'oj ta chik chinuwech yin. Y rija' chuqa' man ch'ajch'oj ta, roma ri rusumal-ruwi' jari' ri retal chi rujachon-ri' chuwe yin. K'o k'a chi nroyobej wuqu' q'ij richin nich'ajch'ojir. K'ari' chupan ri ruk'isibel q'ij nusokaj-el ri rusumal-ruwi'.

¹⁰Y ri jun chik q'ij yeruk'en-pe chuchi' ri wachoch richin molojri'il ka'i' paloma kokoj o ka'i' e nima'q y yerujech chire ri sacerdote.

¹¹Ri sacerdote nusuj jun chike ri ka'i' aj-xik' taq chikopi' richin nikuyutej rumak y ri jun chik niporox chijun richin nijunamatej ruwech wik'in, roma ri kamineq. Ja q'ij ri' toq rija' xtujech chik pe ri rusumal-ruwi' richin retal chi rija' rujachon-ri' chuwe yin.

¹²Y k'o chi nuchop chik jun bey ri janipe' q'ij ri rusujun chi nujech-ri' chuwe yin y chuqa' k'o chi nuk'en-pe jun alaj karne'l richin chi nok kamelabel richin nikuyutej rumak. Ri q'ij ri rubanon chik pe richin rujachon-ri' chuwe yin man jun xuq'ajuj roma xa xok man ch'ajch'oj ta.

¹³Toq jun wineq rutz'aqatisan chik ronojel ri q'ij richin rujachon-ri' chuwe yin, ri sacerdote xtuk'en k'a pe ri wineq ri' k'a chuchi' ri wachoch richin molojri'il.

¹⁴Ri wineq ri' k'o chi nuk'en-pe sipanik chuwe yin Jehová. Xtuk'en-pe oxi' chikopi': Jun ti alaj karne'l jun rujuna' ri kan tz'aqet, richin jun sipanik ri niporox chijun, jun alaj ixoq karne'l ri kan tz'aqet, richin jun kamelabel richin kuyubel-mak, y ri rox jun achij karne'l ri kan tz'aqet, richin nok sipanik richin nuq'alajirisaj chi junan ruwech wik'in.

¹⁵Pa ruwi' chik ri' k'o chi nuk'en-pe jun chakech kaxlan-wey ri maneq ch'amilej-q'or rik'in, ri banon rik'in k'ej chayun ri xolon aceite rik'in y chuqa' kaxlan-wey ri tz'ajin yuquyik rubanik y chuqa' maneq ch'amilej-q'or rik'in y su'un aceite chirij. Chuqa' nuk'en-pe ri sipanik richin ri jalajoj ruwech ixin y ri sipanik richin ri vino.

¹⁶K'ari' ri sacerdote nusuj chinuwech ri kamelabel richin kuyubel-mak y chuqa' ri sipanik ri niporox chijun.

¹⁷Chirij re' nusuj-apo ri achij karne'l ri niq'alajirisan chi ri wineq ri' junan ruwech wik'in. Chuqa' ri sacerdote nusuj-apo ri chakech ri k'o kaxlan-wey chupan y ri sipanik richin jalajoj ruwech ixin y chuqa' ri vino.

¹⁸Y k'ari' ri wineq ri' nusokaj-el ri rusumal-ruwi' ri chiri' akuchi niban-wi oken chupan ri wachoch y nuk'uaj-apo ri rusumal-ruwi' ri rujachon chuwe yin, k'a chupan ri q'aq' ri k'o chuxe' ri sipanik ri nuq'alajirisaj chi junan ruwech wik'in.

¹⁹K'ari' ri sacerdote niberuk'ama-pe ri ruche'el-rij ri karne'l toq niroqo chik y jun chike ri jalajoj ruwech kaxlan-wey ri k'o chupan ri chakech y nuya' pa ruq'a' ri wineq ri'.

²⁰K'ari' ri wineq ri' nuya' chik chire ri sacerdote y ri sacerdote nusiloj chinuwech yin. Y ronojel ri sipanik ri' nok richin ri sacerdote y chuqa' ri ruwa-ruk'u'x y ri ra' ri chikop ri nuyek chikaj chinuwech yin. K'ari' ri wineq ri' kan utz chik nuqum vino.

²¹Jare' ri ruchojmilal pa ruwi' jun wineq ri rujachon-ri' chuwe yin y ri sipanik ri k'o chi nusuj chuwe, pa ruwi' ri ch'aqa' chik sipanik ri kan nitikir nuya' ri wineq ri'. Jak'a ri wineq ri rujachon-ri' chuwe yin, kan k'o chi nuben achi'el nubij chupan ri pixa'.

²²Ri Jehová xuya' chik k'a re jun ruchojmilal re' chire ri Moisés richin nuq'axaj chike ri Aarón y ri e ruk'ajol richin nikiya' urtisanik pa kiwi' ri winaqi'. Jare' ri urtisanik:

²⁴Ja ri Jehová xturtisan y xtichajin iwichin.

²⁵Kan xtiq'alajin ta ri rutzil ri Jehová pan iwi' y xtujoyowaj ta iwech.

²⁶Kan xkixrutzu' ta k'a pe ri Jehová y xtuya' ta uxlanibel-k'u'x chiwe.

²⁷Y ri Dios xubij chik: Keri' rije' xtikinataj ri nubi' pa ruwi' ri nutinamit Israel y yin kan xtinya' ri urtisanik pa kiwi', xcha'.