Read Kaqchikel Núm 8 Bible Online

Núm 8 - Kaqchikel bible

Núm 8

¹Ri Jehová xuya' chik k'a re jun ruchojmilal re' chire ri Moisés richin nuq'axaj chire ri Aarón y xubij: Toq xkerutzij ri wuqu' candil, k'o chi yeruch'okoba' kan jebel pa ruwi' ri candelabro richin keri' nusaqirisaj jebel rupan ri wachoch, xcha' ri Dios.

³Y ri Aarón kan keri' xuben. Xerutzij k'a ri wuqu' candil y xeruch'okoba' jebel pa ruwi' ri candelabro richin keri' nusaqirisaj ri rupan ri rachoch ri Dios, achi'el xubij ri Jehová chire ri Moisés.

⁴Kere' rubanik banon chire ri candelabro y re' banon rik'in q'anapueq y toch'on rij rik'in bajibel, nitiker-el chuxe' napon k'a pa jotol-q'anej, akuchi ek'o-wi ri taq ruwachibel kotz'i'j ri kan achi'el rubanik ri ruk'utun ri Jehová chuwech ri Moisés.

⁵Ri Jehová xch'on chik jun bey rik'in ri Moisés y xubij chire:

⁶Ke'ach'ara-pe ri levita chikikojol ri rijatzul kan ri Israel y ke'ach'ajch'ojirisaj.

⁷Nachikaj ri ya' richin kuyubel-mak pa kiwi' rije' y tabij chike chi nikisokaj ri rusumal chijun ri kich'akul y chuqa' tikich'aja' ri kitziaq.

⁸Chirij re' nabek'ama-pe jun nima-alaj achij wákix y juba' chayun k'ej xolon aceite rik'in richin niporox chijun. Chuqa' nabek'ama-pe jun chik nima-alaj achij wákix richin kuyubel-mak.

⁹K'ari' naben chike ri levita richin yejel-pe chuwech re wachoch, y ye'amol-pe chuqa' konojel ri ch'aqa' chik awinaq.

¹⁰Toq rije' xkejel-pe chinuwech yin Jehová, ri ch'aqa' chik winaqi' xtikiya' kiq'a' pa kijolon ri e levita.

¹¹K'ari' ri Aarón xkerusuj k'a chuwe yin achi'el jun sipanik silon chinuwech richin chi nikiben ri nusamaj.

¹²K'ari' ri levita xtikiya' kiq'a' pa kiwi' ri ka'i' nima-alaji' achija' taq wákix, ri jun xtisuj richin kuyubel-mak y ri jun chik xtiporox chijun chinuwech yin Jehová, richin keri' nink'en chik kiwech rije'.

¹³Rat Moisés xke'aya-apo ri levita chikiwech ri Aarón y ri e ruk'ajol y k'ari' xke'asuj k'a achi'el jun jebelej sipanik chuwe yin.

¹⁴Y keri' xke'ach'er-pe ri levita chikikojol ri awinaq richin chi ye'ok wichin yin.

¹⁵Y toq e ach'ajch'ojirisan chik y xe'ajech yan chuwe yin achi'el jun sipanik silon chinuwech yin, jari' toq ri levita xke'ok-apo pa wachoch richin molojri'il richin yesamej.

¹⁶Roma ri levita kan chijun ri kik'aslen e wichin yin, roma ja rije' ye'ok pa kik'exel ri nabey taq al alaboni' ri ye'alex chi'ikojol.

¹⁷Roma kan e wichin yin konojel ri nabey taq al alaboni' ri iwichin rix, y ri nabey taq achija' chike ri chikopi'. Rije' xencha' yin toq xinya' ruk'ayewal pa kiwi' ri nabey taq al ri chiri' pan Egipto.

¹⁸Yin xencha' ri levita pa kik'exel konojel ri nabey taq alaboni' richin ri tinamit Israel.

¹⁹Yin xencha-pe ri levita chi'ikojol. K'ari' xinjech pa kiq'a' ri Aarón y ri e ruk'ajol. Ri levita ja rije' ri yesamej chiri' pa kik'exel ri ch'aqa' chik awinaq, richin rije' yesuju ri kamelabel richin chi yin nink'en chik kiwech ri awinaq. Richin keri' man jun xtik'uluwachij toq yixjel-apo rik'in ri wachoch, xcha' ri Dios.

²⁰Ri Moisés y ri Aarón y konojel ri winaqi' richin ri tinamit Israel xkiben ri xubij ri Jehová chire ri Moisés, ri kan k'o chi nikiben ri levita.

²¹Rije' xkich'ajch'ojirisaj-ki' y xkich'ej ri kitziaq; y k'ari' ri Aarón xerusuj chuwech ri Jehová achi'el toq nisuj jun sipanik silon chuwech rija', richin utz yerutz'et.

²²Y xeri' ri levita xkichop k'a ri kisamaj ri k'o chi nikiben chupan ri rachoch ri Dios y ja ri Aarón y ri e ruk'ajol jari' ri yebin ri samaj. Ri Aarón y ri e ruk'ajol kan xkiben achi'el ri rubin ri Jehová chire ri Moisés.

²³Ri Jehová xch'on chik k'a rik'in ri Moisés, y xubij:

²⁴Jare' ri niqaqa pa kiwi' ri levita: Ri k'o juwineq wo'o' kijuna' pa jotol, jari' ri yesamej chupan ri wachoch.

²⁵Jak'a toq ye'apon pa kawineq lajuj kijuna' xaxe chik k'a juba' yeto'on-apo. Y rije' man e richin ta chik kow samaj. Keri' xtaben chike ri levita, xcha' ri Jehová.