Read Kaqchikel Miq 2 Bible Online

Miq 2 - Kaqchikel bible

Miq 2

¹Kan toq'ex k'a kiwech ri winaqi' ri nikich'ob achike etzelal nibekibana'. Rije' ja ri chi'aq'a' nikich'ob itzel taq banobel, y kan xaxe k'a niseqer-el kan jari' nibekibana' ri etzelal ri xkich'ob rij. Rije' kan yetikir k'a nikiben roma kan k'o uchuq'a' pa kiq'a'.

²Nikirayila' k'a rulew ri jun chik y nikiben kan kichin chire. Nikirayila' ruwech jay kichin ch'aqa' chik y nikimej kan. Rik'in tz'ukun-tzij nikeleq'aj kan ri rachoch ri jun chik wineq. Ronojel ri kichinan kan ri kiwinaq nikelesaj kan chike.

³Roma ri' ri Jehová ruch'obon chik chi, xtiberuya' jun ruk'ayewal pa kiwi' re winaqi' re', y kan man xketikir ta xtikikol-ki'. Y stape' rije' yebiyin rik'in nimirisanen, ri Dios xtuben k'a chike chi kan xtiqaqa kiq'ij, roma toq xtapon ri q'ij ri' kan richin ruk'ayewal y tijoj-poqonal.

⁴Chupan ri q'ij ri' kan xtiban k'a jun bix richin tze'en chikij. Y kere' k'a nubij: Kan xojwulex k'a jumul, y ronojel ri k'o qik'in xa xch'ar chikiwech ch'aqa' chik. Wakami ri Dios xrelesaj ri qulew roj, y xuya' kan pa ruq'a' ri etzelanel qichin.

⁵Keri' ronojel ri ulew ri kichinan kan, xtelesex chike richin jumul.

⁶Ri winaqi' richin ri tinamit nikibij chuwe yin Miqueas: Man chaq yojach'olij. Ri Dios man xqojruya' ta pa wululen.

⁷¿Nach'ob rat chi ri tinamit Israel qajineq etzelanik pa ruwi'? ¿Nach'ob chi ri Dios xik'o yan ruk'u'x qik'in? ¿Kan qitzij kami chi nuben ronojel re'? ¿Nach'ob chi ri Dios man utz ta yerutz'et ri yemakun?

⁸Rix kan ix yakatajineq k'a chikij ri nuwinaq achi'el jun etzelanel. Kan nimej kan ri kitziaq ri achi'a' ri e tzolejineq-pe pa labal.

⁹Rix kan ye'iwelesaj-el ri ixoqi' chupan ri kachoch ri akuchi janila yekikot-wi; y ri ruk'amon ta richin nikichinaj kan ri taq kal, rix niweleq'aj kan chike.

¹⁰Kixyakatej k'a y tichapa' bey roma rix man xtiwil ta chik uxlanibel-k'u'x chuwech re ruwach'ulew. Iwoma rix re ruwach'ulew re' man ch'ajch'oj ta chik, y roma ri' xtiwulex kan.

¹¹Rix xa niwajo' jun q'alajirisanel ri ruk'uan itzel bey, ri xaxe q'oloj ruk'amon-pe, ri nubij ta chiwe chi xtik'oje' iwik'in pa ruk'iyal vino y ya' ri niq'abarisan. Ri xtibin keri' chiwe, jari' k'a ri q'alajirisanel ri iwichin rix.

¹²Ri Jehová xubij: Xkenmol chik konojel ri winaqi' israelita; xkenmol k'a ri xek'oje' kan chire ri rijatzul kan ri Jacob. Xkenya' akuchi man jun xtinaqo kichin, achi'el nuben ri yuq'unel kik'in ri karne'l pa ki-coral. Chupan ri ruwach'ulew ri' xkek'oje' pa ruk'iyal winaqi', achi'el jun soq'olbel nojineq rik'in karne'l, xcha' ri Dios.

¹³Ri Miqueas xubij: Ri Jehová xtiwulan ri ruchi' ri tinamit ri akuchi ek'o-wi pa ximonri'il ri rutinamit rija', richin xkerelesaj-pe. Ja rija' ri ki-rey ri xtinabeyej-pe chikiwech; y rije' xtikitzeqelibej-pe.