Read Kaqchikel Miq 5 Bible Online

Miq 5 - Kaqchikel bible

Miq 5

¹Kixyakatej k'a rix aj-labal aj-Jerusalem, roma sutin chik iwij koma ri e etzelanel iwichin. Re winaqi' re' kan xtikijich'aj rupalej ri i-rey rik'in jun xik'a'y.

²Jak'a xtipe pe jun q'atoy-tzij pa tinamit Belén ri chuqa' nibix Efrata chire. Stape' ri tinamit ri' maneq rejqalen chikiwech konojel ri tinamit richin Judá, kan kik'in rije' xtel-wi-pe re q'atoy-tzij re'. Y rija' kan samajineq-wi-pe pa nabey.

³Y re' k'a man jani tibanatej, roma ri Dios xkerumalij k'a kan ri qawinaq israelita, k'a xtapon na ri q'ij toq xtalex ri rey ri'. Chupan ri q'ij ri' xketzolej-pe pa taq ruwach'ulew konojel ri qawinaq.

⁴Y rija' kan xkeruyuq'uj rije' rik'in ri runimirinen y ri uchuq'a' richin ri Jehová ri qa-Dios. Y rije' kan kuqul k'a kik'u'x xkek'ase', roma ri rey ri' kan xtinimirisex k'a ruq'ij chuwech chijun ruwach'ulew.

⁵Ja rija' k'a xtik'amo-pe uxlanibel-k'u'x chupan ri q'ij ri'. Toq ri aj-Asiria xke'ok-pe chupan ri qaruwach'ulew richin xkekich'ek ri qawinaq, y xke'ok chupan ri jay richin q'atbel-tzij, jari' toq roj kan xkeqateq k'a chikij ri aj-Asiria e k'iy aj-raqen.

⁶Re aj-raqen re' kan xtikiq'et-tzij pa ruwi' ri tinamit Asiria rik'in uchuq'a'. Keri' chuqa' xtikiben chire chijun ri ruwach'ulew Asiria.*f1* Keri' re achi'a' re' kan xqojkikol k'a chikiwech ri e etzelanel qichin, toq xkeyakatej-pe chiqij y xke'ok-pe chupan re qaruwach'ulew.

⁷Ri qawinaq israelita xtikitaluj-ki' chuwech ri ruwach'ulew, jak'a xtapon chik k'a ri q'ij toq xkek'iyer. Y ri Dios xtibanon ronojel re' achi'el nuteq-pe ri raxq'ab y ri job, y man wineq ta ri nibanon.

⁸Keri' chuqa' ri xkekolotej kan chire ri qawinaq, ri kitalun-ki', xkeyakatej chikij ri e etzelanel kichin achi'el jun koj ri niyakatej chikij ri chikopi' ri ek'o pa k'echelaj. Xkekik'is achi'el jun koj ri yeruwech' ri q'ataj karne'l, y kan yeruk'is konojel. Y kan man jun xtitikir xtuto-ri' chuwech.

⁹Keri' k'a xkech'akon ri qawinaq chikij ri e etzelanel kichin. Kan konojel k'a ri xkeyakatej chikij, xkek'is.

¹⁰Ri Jehová nubij chi toq xtapon k'a ri q'ij ri', rija' xkerukamisaj ri kiej kichin ri qawinaq israelita, y kan xkeruwulaj k'a ronojel ri ki-carruaje e richin labal.

¹¹Kan xkeruwulaj k'a ronojel ri qatinamit y ronojel ri jay ri e tz'apen chi tz'aq.

¹²Keri' chuqa' xkerukamisaj ri e banoy itz, y kan man jun aj-q'ij ri xtik'oje' chikikojol.

¹³Xkeruwulaj k'a el chikiwech ronojel ri wachibel y ri paban taq abej. Y chuqa' man jun bey chik k'a xkexuke' chikiwech ri wachibel ri xa ja ri kiq'a' ri banayon.

¹⁴Xtrelesaj k'a el chikiwech ri paban-che' richin ri dios Asera, y kan xkeruwulaj k'a ronojel ri qatinamit.

¹⁵Chuqa' rik'in k'a royowal xtuya' rutojbalil-mak pa kiwi' ri winaqi' kichin ch'aqa' chik ruwach'ulew ri man xkinimaj ta rutzij.