Read Kaqchikel Miq 6 Bible Online

Miq 6 - Kaqchikel bible

Miq 6

¹Winaqi' israelita, tiwak'axaj ri ninbij yin Jehová: Titzijoj ri ibanobal chire ri juyu'. Y rix, juyu', tiwak'axaj ri nikibij.

²Rix juyu' ri ix ruch'okolibal ri ruwach'ulew, tiwak'axaj chuqa' ri nuch'ojinik chikij ri nutinamit Israel, roma xtinben jun ch'ojikil kik'in.

³Nutinamit yin, ¿achike k'a nubanon chiwe? ¿Achike k'a ri man utz ta nubanon iwik'in? Tibij k'a chuwe.

⁴Kan ja k'a yin ri xinelesan-pe iwichin pan Egipto y xixinkol-pe chupan ri kowilej taq samaj. Xenteq k'a ri Moisés, ri Aarón y ri María richin ja rije' re xeyuqen-pe iwichin.

⁵Nutinamit yin, toqaqa chi'ik'u'x ri xrajo' ta xuben chiwe ri Balac ri rey richin Moab, y ri xubij ri Balaam ri ruk'ajol ri Beor. Chuqa' toqaqa chi'ik'u'x ri xinben iwik'in toq xixq'ax-pe pa Sitim y xixapon pa Guilgal, richin niya' rejqalen ri ch'akonik ri xinya' chiwe yin, xcha' ri Jehová.

⁶¿Achike ta k'a xtink'uaj richin xkinapon chuwech ri Jehová? ¿Achike xtinsipaj chire toq xtinya' ruq'ij ri nimalej Dios? ¿Kan ruk'amon kami chi xkinapon chuwech rik'in poron chikop? ¿Xkenk'uaj ta k'a el alaji' wákix ri k'o jujun kijuna'?

⁷¿Kan xtiqa' kami chuwech ri Jehová xtinsuj chire 1,000 achija' taq karne'l? ¿Xtuk'awomaj kami ri Dios xtinya' ta chire ri aceite achi'el jun raqen-ya'? ¿Xtinsuj ta k'a ri nabey nuk'ajol chire richin nikuyutej numak? ¿Xtinya' ta jun chike ri walk'ual roma ri numak ri e nubanalon?

⁸Ri Jehová kan ruq'alajirisan chik k'a chiqe ri utz ri k'o chi niqaben. ¿Achike k'a nrajo' chiqe roj? Rija' nrajo' k'a chi roj xaxe ta ri ruchojmilal ri niqaben. Nrajo' chi niqajoyowaj ta kiwech ri ch'aqa' chik winaqi', y rik'in qasanri'il niqanimaj rutzij ri Dios.

⁹Rix winaqi' richin ri tinamit, tiwak'axaj ri xtinbij yin Jehová. Ri wineq aj-na'oj trak'axaj ri nuch'abel, roma yin yitikir ninya' tijoj-poqonal pan iwi'.

¹⁰Rix ri ix banoy etzelal k'o janila chi beyomel iwik'in, y man ich'akon ta rik'in ruchojmilal. Rix nikusaj jun k'ojelibel ri man tz'aqet ta richin yixk'ayin. Y re' kan man utz ta nintz'et yin.

¹¹Chuqa' ri etabel ri nikusaj, man e utz ta. Y kan ik'uan jajaloj ruwech marco ri man e tz'aqet ta.

¹²Rix beyoma' rik'in iwuchuq'a' nichop ri niwajo' rix. Rix xaxe tz'ukuj-tzij ri nibij, y kan xaxe k'a ri q'oloj ri niben.

¹³Roma ri' ja rutikeribel re' ri nuchapon ruya'ik pan iwi'; y kan xkixinwulaj k'a roma ri imak.

¹⁴Xkixwa'; jak'a xa kan man xtinoj ipan. Kan jantape' k'a xtik'oje' wayjal iwik'in. Xtik'ol k'a ri itiko'n, jak'a xa man xtok ta iwichin roma xa xtuk'uex-el chiwech. Y wi k'o ta juba' xtikolotej kan, yin kan xtinben k'a chi xa xtik'is chupan ri labal.

¹⁵Xtiben-qa ri itiko'n, jak'a xa man ja ta rix yixk'olo. Xtiyitz' k'a ri aceituna, jak'a xa man xtikusaj ta ri aceite. Xtiyitz' k'a ri uva, jak'a xa man xtiqum ta ri vino.

¹⁶Xtibanatej ronojel re' roma xitzeqelibej achi'el xuben kan ri pa ruq'atbal-tzij ri Omrí. y xa ibanon achi'el xkiben ri e aj pa rachoch kan ri Acab. Roma ri' xtitole' kan ri itinamit. Y ri winaqi' richin ri ch'aqa' chik ruwach'ulew xketze'en chiwij, y kan ja k'a rix xkixejqalen ri ruk'ixbilal.