Read Kaqchikel Miq 7 Bible Online

Miq 7 - Kaqchikel bible

Miq 7

¹Kan maneq chik winaqi' chuwach'ulew ri kan choj ta kik'aslen; maneq chik ri kuqul ta kik'u'x rik'in ri Dios. Kan toq'ex k'a nuwech yin roma yenkanoj y man yenwil ta. Yin in achi'el jun ri nukanoj uva toq xa xk'ol yan el ronojel. Yin kan xinrayij ta k'a xintej ri nabey taq ruwech ri wíkix, jak'a xa maneq. Konojel k'a ri winaqi' xa kan xaxe ri kamik nikajo' nikiben. Chi kach'alal-ki' nikiyala' tzaqibel pa taq kibey.

³Konojel ri winaqi' kan e nowineq k'a chubanik etzelal. Ri e tata'al man jun nikiben wi maneq naya' chike. Ri to'onela' xa nikik'ayij-ki'. Ri winaqi' ri k'o kuchuq'a' xa nikiben ri nikajo' rije'. Y konojel xa kiya'on chikiwech.

⁴Ri más juba' utz chikikojol rije' xa achi'el ri k'ix. Ri más juba' choj chike rije' xa achi'el jun cholaj k'ix. Roma ri' ri q'ij richin rutojbalil ri imak naqaj chik k'o-wi. Ri q'ij ri' kan bin-pe chiwe koma ri e ya'ol rutzijol. Toq xtapon, kan xtisach k'a ik'u'x chi'iwonojel.

⁵Man tikuquba' ik'u'x kik'in ri iwachpochel ni ri iwachibil. Ni kik'in ri iwixjayilal man tikuquba' ik'u'x. Kan man jun titzijoj chike.

⁶Roma xa ek'o k'ajoxela' ri nikiqasaj kiq'ij ri kitata'. Ek'o xtani' ri yeyakatej chikij ri kite'. Chuqa' ri ali' xa yeyakatej chikij ri kalite'. Kan ja ri e aj pan iwachoch, ri e etzelanel iwichin.

⁷Jak'a yin Miqueas kan ja ri Jehová ri xtintzu' jantape'. Kan xtinwoyobej k'a ronojel pa ruq'a' ri Dios ri xtikolon wichin, Y ri nu-Dios yin kan xkirak'axaj ri nink'utuj chire.

⁸Rix ri ix etzelanel qichin, man kixkikot chiqij, roma stape' xojtzaq, xa kan xqojyakatej chik. Stape' xojk'oje' pa q'equ'm, jak'a ri Jehová jari' ri saqil chiqe roj.

⁹Roma roj kan xojmakun chuwech ri Jehová, jak'a xtiqakoch' ri royowal. Rokik ri', rija' xutz'et ri xqaben, y ja k'a rija' xtibin chi maneq qamak. Chirij ri' ri Jehová kan xtuya' chik ri saqil chiqe, y xtiqatz'et chi rija' kan choj pa qawi'.

¹⁰Rix ri ix etzelanel qichin kan xtitz'et ri xtibanatej. Kan xkixk'ixbitej k'a janila, rix ri xixtze'en chiqij, ri kan nibila' chiqe chi akuchi k'o-wi ri Jehová ri qa-Dios. Wakami k'a xtiqatz'et ri xtiberuk'uluwachij ri iruwach'ulew. Rix kan xkixbexolq'otix achi'el ri ch'abeq ri k'o pa taq bey.

¹¹Rix aj-Jerusalem, kan peteneq k'a ri q'ij chi xtipaba' chik jun bey ri tz'aq ri rusutin-rij ri itinamit. Toq xtapon ri q'ij ri' ri ruk'ulba't ri iruwach'ulew kan xtinimer.

¹²K'a iwik'in k'a rix xkepe-wi konojel winaqi', nitiker-pe kik'in ri aj-Asiria y napon k'a kik'in ri aj-Egipto. Ri iruwach'ulew nitiker-el rik'in ri raqen-ya' Nilo y napon k'a rik'in ri raqen-ya' Éufrates; nitiker-pe rik'in ri ruchi' ri palou napon k'a juk'an chik ruchi', nitiker-pe rik'in ri jun nimalej juyu' k'a rik'in ri jun chik nimalej juyu'.

¹³Ri kiruwach'ulew kan xtitole' k'a kan roma ri kibanobal ri winaqi' ri ek'o chuwech.

¹⁴Jehová, tabana' utzil ke'ayuq'uj ri awinaq rik'in ri awutzil. Tayuq'uj re tzobaj karne'l re' re kan e awichin rat. Roma xa kiyon-ok ek'o pa k'echelaj ri e sutin-rij rik'in qasanbel taq ulew. Tabana' utzil ke'ayuqej chik ri awinaq, achi'el xaben ri ojer kan, toq xe'ayuq'uj chupan ri soq'olbel richin ri Basán y ri Galaad.

¹⁵Tabana' utzil tak'utu' chik chikiwech ri meyel taq banobel ri xe'aben achi'el xaben toq xe'awelesaj-pe pan Egipto.

¹⁶Richin keri' xtikitz'et k'a ri ch'aqa' chik ruwach'ulew y xa xkek'ixbitej rik'in ri uchuq'a' ri k'o pa kiq'a', y rik'in ri' xa xkememur y xketokonir ta.

¹⁷Re winaqi' re' kan xtikibeq' k'a ri poqolaj, achi'el nikiben ri kumatzi'. Jehová tabana' chi re winaqi' re' rik'in janila xibinri'il xkebe'el-pe ri akuchi ek'o-wi, y kan xkek'ark'ot ta k'a xke'apon chawech rat Jehová ri at qa-Dios.

¹⁸Kan man jun chik Dios k'o achi'el rat Jehová, roma rat kan nakuy k'a ri qamak, roj ri xojkolotej kan. Man naya' ri awoyowal pa qawi' richin jantape', roma rat kan at jun Dios joyowanel.

¹⁹Tabana' utzil tajoyowaj chik k'a qawech, y tamestaj ronojel ri qamak. Ronojel ri itzel taq qabanobal tak'aqa-el chupan ri palou.

²⁰Jehová, jantape' ta k'a xtaya' pa qawi' ri awajowabal ri xasuj chire ri Abraham y ri Jacob. Ronojel ri xasuj chike ri qati't-qamama' ojer kan, jari' ta k'a ri xtaya' pa qawi' roj wakami.