Read Kaqchikel Nah 1 Bible Online

Nah 1 - Kaqchikel bible

Nah 1

¹Chupan re wuj re' tz'ibatel-wi kan ri xtibebanatej rik'in ri tinamit Nínive achi'el xq'alajirisex chuwech ri Nahum ri aj pa ko'ol tinamit rubini'an Elcós.

²Ri Jehová kan jun Dios ri kan man niqa' ta chuwech chi niban itzel chike ri ruwinaq. Kan nuya' k'a rutojbalil-mak pa kiwi' rije'. Rija' kan nuya' k'a ruk'exel chike ri nikipaba-ki' chuwech. Kan noyower k'a kik'in ri e itzel taq winaqi'.

³Ri Jehová kan k'o chupan ri kaq'iq' rachibilan ri job y ri surkum, y ri nimalej taq sutz' chuwech rija' achi'el ri poqolaj ri nuyek ri raqen toq nibiyin. Ri Jehová kan janila ruchuq'a' y man chi'anin ta noyower, jak'a kan man xtuya' ta kan ri aj-mak choj keri'.

⁴Rija' yeruch'olij ri palou y nuben chike chi yechaqi'j-qa; chuqa' nuben chi ronojel ri raqen taq ya' yetzaj-qa. Jajun ri ruwach'ulew Basán y ri juyu' Carmelo xa man yewachin ta chik, y ri kotz'i'j richin ri juyu' Líbano chuqa' xa yemayamo-qa.

⁵Ri juyu' yebaybot chuwech rija', y ri ch'uti'n taq juyu' xa yek'is-qa. Ri ruwach'ulew kan nisilon chuwech rija', keri' chuqa' ronojel ri ek'o chuwech.

⁶¿Achike kami nitikir nikoch'on ri royowal rija'? ¿Achike ta k'a nitikir nikoch'on ri ruq'aq'al ri royowal? Roma ri royowal rija' kan nitix achi'el ri ch'ich' ri ya'erisan pa q'aq', y chuwech k'a rija' yepax ri nima'q taq abej.

⁷Ri Jehová kan janila utz; rija' kan jun tobel chupan ri q'ij toq k'o q'axomal. Kan yeruto' ri kikuquban kik'u'x rik'in.

⁸Jak'a ri e etzelanel richin kan xkeruk'is el, achi'el nuben jun nim raqen-ya' ri kan nibolqo't y nuk'uaj-el ronojel. Ri Jehová kan xkeruq'i' k'a ri e etzelanel richin chupan jun nimalej q'equ'm richin yeruk'is.

⁹¿Achike k'a nich'ob chirij ri Jehová? Rija' kan xtuya-wi-pe ri wululen y xtuben chi xtik'is ronojel. Man nik'atzin ta richin nukamuluj chik.

¹⁰Ri e etzelanel kan kisuq'un-ki' chupan jun k'ix ri man yetikir ta chik nikikol-ki'. Chuqa' kan achi'el nuben jun q'abarel. Kan xkek'is k'a achi'el ri chaqi'j k'im.

¹¹Jun k'a chike ri iwinaq rix aj-Nínive ri xunojij itzel chirij ri Jehová, y re wineq re' kan jun itzel ya'ol na'oj.

¹²Roma ri' kere' nubij ri Jehová chire ri rutinamit Judá: Stape' ri e etzelanel awichin k'o janila kuchuq'a' y janila e k'iy, man rik'in ri' yin kan xkenchoy-el achi'el yechoy-el ri q'ayis. y man jun bey chik xkebek'ulun-pe. Yin kan janila k'a at nuya'on-pe pa poqon; jak'a re wakami kan man xkatinya' ta chik pa q'axo'n, rat nutinamit Judá.

¹³Wakami k'a xkatinwelesaj chuxe' ri kuchuq'a' rije'. Chuqa' kan xkatotej pa kiq'a'.

¹⁴Jak'a pan iwi' rix aj-Nínive, ri Jehová kan ruya'on k'a rutzijol. Kan man jun iwijatzul xkek'oje' richin xkixnatex. Kewulex-el ri wachibel e banon rik'in che' y ri e ya'erisan pa q'aq'. Y keri' ri jay kichin ri dios ri' kan xketole' kan. Xtuben k'a chi chiri' xkixmuq-wi roma yalan itzel ik'aslen xiben chuwech rija'.

¹⁵Rix winaqi' aj-Judá titz'eta' ri achike k'amayon-pe ri utzilej rutzijol. Rija' kan peteneq k'a chuwa taq juyu'; kan peteneq k'a ri niq'alajirisan ri uxlanibel-k'u'x. Kan kixnimaq'ijun k'a rix aj-Judá; kan ke'iya' k'a ri isujun chire ri Jehová, roma man jun bey chik k'a xkepe chiwij ri e etzelanel iwichin. Rije' xa kan jumul k'a xkek'is-el.