Read Kaqchikel Nah 2 Bible Online

Nah 2 - Kaqchikel bible

Nah 2

¹Xyakatej yan k'a pe chiwij ri wulanel, rix aj-Nínive. Ke'iya' chajinela' pa ruwi' ri tz'aq richin ri tinamit. Tichajij jebel ri bey, tixima' chi utzil ri ximibel-ipan. ke'imolo' ri aj-labal.

²Roma ri Jehová nuya' chik ri ruwaq'ijaj y ri uchuq'a' chire ri ruwach'ulew Israel y ri Judá, richin chi yek'oje' chik jun bey achi'el rubanon-pe, toq ri e etzelanel kichin man jani tikelesaj chuwi-kiq'a' ronojel ri k'o rejqalen.

³Ri kitobal ri aj-labal keq nitzu'un, keri' chuqa' ri kitziaq. Ri aj-labal kichojmirisan chik ki', ri ki-carruaje kan e achi'el q'aq'. Ri kiej kan nikajo' yan yebe pa labal.

⁴Ri carruaje kan ye'anin rik'in janila uchuq'a' pa taq bey, chuqa' pa taq nima'q ruwech bey richin molojri'il. Ri kibanik kan achi'el ri q'aq', ri yebiyin kan achi'el ri koyopa'.

⁵Ri aj-labal ye'oyox, y rije' kan nikinimila-ki' richin nikajo' ye'apon yan chuchi' ri tz'aq, richin chi nikichojmirisaj ri tobel richin ri nimalej che' ri nikusex richin niteq'ux ri ruchi' ri tz'aq.

⁶Nikijeq-el ri raqen-ya' ri k'o chuchi' ri tinamit; ri winaqi' ri ek'o chupan ri jay richin ri q'atbel-tzij nikixibij-ki'.

⁷Ri reina y ri raj-ik' ye'uk'uex-el pa ximonri'il, yebison achi'el ri taq paloma; ye'oq' y nikitinila' ruwa-kik'u'x.

⁸Ri aj-Nínive ye'animej, achi'el ri choy ri man tikirel ta richin niq'at. ¡Man kixanimej! ¡Kixtzolin-pe! nibix chike, jak'a rije' xa man yetzolin ta.

⁹¡Ri e etzelanel kichin nikibij: ¡Qak'uaj-el ri saqipueq y ri q'anapueq! ¡Ri rubeyomel ri Nínive kan man yojtikir ta niqak'is-el!

¹⁰Man jun chik k'o kan chupan; kan xk'is, kan xmalin y kan xok kan tz'iran. Kan janila xibinri'il k'o chiri'; konojel winaqi' yebaybot, y maneq chik kuchuq'a'. Y janila kikajman roma xibinri'il.

¹¹¿Akuchi kami ixk'o-wi rix aj-Nínive, ri ix achi'el koj? ¿Akuchi kami k'o-wi kan ri isok akuchi xik'iytisaj-wi ri taq alaji' koj? ¿Y akuchi kami k'o-wi ri isok ri xixk'oje' chupan ojer, chi achij, chi ixoq y chi alaji' y kan man xixibij ta iwi'?

¹²Rix aj-Nínive, ri kan ix achi'el koj ri ojer kan; ri kan ye'ikamisaj ch'aqa' chik chikopi' richin ye'iya' chike ri alaji', richin ye'iya' chike ri ixoqi' taq koj. Y ri isok kan inojisan chi chikopi' ri e kaminaqi' chik.

¹³Ri Jehová k'iytisanel richin ronojel nubij: Jare' ink'o richin yixink'is. Xkenporoj k'a ri i-carruaje y xkebuqulin pa sib, Kan xkenk'is k'a ri iwalk'ual. Kan man xtinya' ta kan richin ja rix ta yixch'akon. Y kan man jun bey chik k'a xtak'axatej kich'abel ri yech'on pan iwi' rix.