Read Kaqchikel Sof 1 Bible Online

Sof 1 - Kaqchikel bible

Sof 1

¹Ri Jehová xch'on wik'in yin Sofonías, ri in ruk'ajol kan ri Cusí, in rumam kan ri Guedalías, in kixikin-kimam kan ri Amarías ri ruk'ajol kan ri Ezequías. Re' xbanatej toq ri Josiás ruk'ajol kan ri Amón niq'aton-tzij pa ruwi' ri ruwach'ulew Judá.

²Jare' k'a ri rutzijol ri xuya' ri Jehová chuwe: Xkenk'is-el konojel ri ek'o chuwech re ruwach'ulew. Yin Jehová ri yibin.

³Xkenk'is k'a el konojel winaqi' y ri jalajoj kiwech chikopi' ri e richin pa k'echelaj; xkenmes-el ri aj-xik' taq chikopi' y konojel ri ek'o chupan ri palou. Kan xkenmes k'a el chuwech ri ruwach'ulew konojel winaqi' ri e banoy etzelal. Yin Jehová ri yibin.

⁴Xtinteq-pe ruk'ayewal pa ruwi' ri tinamit Jerusalem y chijun ri ruwach'ulew Judá. Xkenk'is-el konojel ri ruwachibel ri Baal. Chuqa' xkenk'is ri e sacerdote ri nikisamajij;

⁵keri' chuqa' konojel ri nikiya' kiq'ij ri xmotza' pa ruwi' ri kachoch; chuqa' ri nikiya' nuq'ij yin rokik nikiya' ruq'ij ri ki-dios Milcom.

⁶Kan xkenk'is k'a el konojel ri nikich'er kan ki' wik'in yin Jehová, y chuqa' konojel ri man yinkikanoj ta y ri man yinkik'ulubej ta.

⁷Kan man jun k'a tiq'ajan chinuwech yin Jehová, roma ri q'ij richin woyowal kan naqaj chik k'o-wi. Yin kan e nuch'aron chik ri winaqi' aj-Judá ri e jampe' xkeken achi'el ri awej ri yeken richin kamelabel; y kan e nuchojmirisan chik ri xkebanon ri eleq' kik'in.

⁸Y toq xtapon ri q'ij richin ri kamelabel ri', yin kan xtinya' k'a ri rutojbalil-mak pa kiwi' ri e tata'al, y ri e ruk'ajol ri rey. Chuqa' xtinya' ruk'ayewal pa kiwi' ri winaqi' ri man e israelita ta.

⁹Xtinya' rutojbalil-mak pa kiwi' ri winaqi' ri nikiya' kiq'ij ch'aqa' chik dios; Chuqa' pa kiwi' ri winaqi' ri nikinojisaj rachoch ri kajaw rik'in ri keleq' y q'oloj.

¹⁰Chupan ri q'ij ri' xtibanatej jun raqoj-chi'ij richin q'axo'n, nitiker-el rik'in ri ruchi' ri tz'aq ri akuchi ye'el-ye'ok-wi ri e k'ayil taq ker, k'a rik'in ri ruka'n tanaj chire ri tinamit. Ri raqoj-chi'ij ri' kan xkerusiloj k'a ri nima'q taq juyu'.

¹¹Kixoq' rix winaqi' ri ixk'o pa xulan-qa chire ri tinamit, roma konojel ri k'ayinela' xkek'is jumul. Kan xkek'is k'a konojel ri yejalo ri méro chupan ri tinamit.

¹²Chupan ri q'ij ri' yin kan xkennik'oj ri winaqi' aj-Jerusalem; y kan xkenkanoj rik'in jun candil. Xkenya' pa tijoj-poqonal ri winaqi' ri xa kiyon rije' kikuquban-qa kik'u'x. Rije' nikich'ob-qa chi yin man jun utz ni man jun itzel xtinben chike.

¹³Roma ri' xa xtuk'uex k'a el ronojel ri kibeyomel, y ri kachoch kan xtitole' kan. Rije' xkekipabala-q'anej jay, jak'a xa man xkek'oje' ta chik chupan. Xkekitik-qa ki-uva, jak'a xa man xtikiqum ta chik ri vino, xcha' ri Dios.

¹⁴Kan naqaj chik k'o-wi ri q'ij richin royowal ri Jehová. Naqaj chik y kan xtibebanatej yan. Kan man tikirel ta nak'axex ri koq'ej ri winaqi'. Bis-bis ri kiraqoj-chi'ij ri aj-labal.

¹⁵Ri q'ij ri' kan richin oyowal, q'ij richin bis, q'ij richin poqonal, q'ij richin ch'ujerik, q'ij richin wululen, q'ij richin q'equ'm, q'ij richin muqul, q'ij richin moyew,

¹⁶y q'ij richin yeq'ajan-pe ri trompeta y raqoj-chi'ij, richin nichapatej oyowal pa taq tinamit ri sutin-kij rik'in tz'aq, y pa kiwi' ri nimalej taq torre richin tobel.

¹⁷Ri Jehová xkeruya' janila pa k'ayew ri winaqi', y xtuben chike chi xke'ok moy roma ri kiq'axo'n, roma kan xemakun chuwech rija'. Ri kikik'el rije' kan xtibebiyin achi'el nibiyin ri ya', y ri kixkolob kan xtel-pe jumul.

¹⁸Stape' ri winaqi' k'o saqipueq y q'anapueq kik'in, man jari' ta xtikolon kichin chuwech ri royowal ri Jehová. Roma ri ruq'aq'arinen ri royowal ri Jehová kan xtuk'is chijun ri ruwach'ulew, y konojel k'a ri winaqi' ri ek'o chiri' kan chi'anin k'a xkek'is.