Read Kaqchikel Sof 3 Bible Online

Sof 3 - Kaqchikel bible

Sof 3

¹¡Kan toq'ex k'a iwech rix aj-Jerusalem roma kan janila ipaban-iwi'! Itz'ilobisan ri ik'aslen, y kan ye'itz'ila' ri iwinaq.

²Rix kan man yixniman ta tzij, ni man niwajo' ta richin yixpixabex. Rix man niwajo' ta nikuquba' ik'u'x wik'in yin, Jehová ri i-Dios, y ni man yinitzeqelibej ta.

³Ri e aj-raqen ri ek'o pan itinamit Jerusalem e achi'el koj ri yewuyin. Ri to'onela' kan e achi'el utiwa'. Rije' xaxe chi'aq'a' yebiyaj richin nikikanoj kiway. Y toq niseqer-pe ri jun chik q'ij, man jun chik k'o kik'in.

⁴Ri e q'alajirisey nuch'abel xa xkinimirisaj-q'anej-ki', y xa yekiq'ol ri winaqi'. Ri e sacerdote xkiqasaj ruq'ij ri wachoch. y kan xkiq'ej ruwi' ri nupixa', ja yin Jehová ri yibin.

⁵Jak'a ri Jehová kan k'o chiri' pa tinamit, y kan man jun itzel nuben. Rija' kan ronojel nimaq'a' nuq'et-tzij pa ruchojmilal, y kan man jun ri man ta nuben. Man rik'in ri' ri nibanon etzelal xa kan maneq ruk'ix.

⁶Rija' kan xeruk'is yan ri winaqi' richin ri ch'aqa' chik ruwach'ulew, y ri kachoch richin tobel kan xtole' kan. Ri Dios kan xuben chi ri kibey kan xmalin kan, y man jun chik wineq niq'ax chiri'. Ri kitinamit kan xwulex kan; kan man jun chik xk'oje' kan chiri'.

⁷Rija' xuch'ob k'a chi rik'in ri keri' ri aj-Jerusalem xtik'oje' rukiy rija' chikiwech. y xtikik'ul ri rupixabanik. Richin keri' man xke'elesex ta el ri chiri', y ri rutojbalil-mak man xtiqaqa ta pa kiwi' rije'. Man rik'in ri' rije' xa chi'anin xemakun rik'in jalajoj ruwech mak.

⁸Roma ri' nubij ri Jehová chike chi tikoyobej na, k'a toq xtapon na ri q'ij richin rija' xtiyakatej richin nuq'et-tzij. Rija' xuch'ob yan chi yerumol konojel winaqi' richin ri ruwach'ulew, richin nuya' pa kiwi' ri ruq'aq'arinen ri royowal. Ronojel ruwach'ulew kan xkeruk'is roma ri royowal.

⁹K'ari' xtinben chike ri tzobaj winaqi' richin ch'aqa' chik ruwach'ulew chi xkech'on wik'in yin, Jehová, y xaxe wik'in yin xkech'on-wi; y konojel xtikinimaj nutzij.

¹⁰Toq xtapon ri q'ij ri' ri nuwinaq ri e talutajineq, kan xketzolin-pe richin nikiya' nuq'ij, stape' ek'o más nej chire ri Etiopía. Xkepe richin nokiya' sipanik chuwe.

¹¹Chupan k'a ri q'ij ri', rix nuwinaq kan man xkixk'ixbitej ta chik roma ri imak ri e ibanalon chinuwech yin. Roma kan xkenwelesaj-el chi'ikojol konojel ri kinimirisan-ki'. Y rix kan man jun bey chik k'a xtinimirisaj-iwi' wawe' pa Jerusalem.

¹²Jak'a yin kan xtinya' kik'aslen ri kiqasan-ki' chinuwech, roma kikuquban kik'u'x wik'in.

¹³Ri ti juba' ri xkekolotej kan chiwe man xtikiben ta chik ri man utz ta. Man xtikitz'uk ta chik tzij. Kan man jun chik itzel ch'obonik xtikimey. Kan xkewa-xke'uk'ya' chi utzil, xke'uxlan k'a y kan man jun chik xtinaqo kichin.

¹⁴Chupan ri q'ij ri' rix kan kere' k'a xtibij toq xkixbixan: Rix winaqi' richin ri tinamit Sión kan kixbixan k'a, kan kixsik'in k'a roma kikoten rix tinamit Israel. Kan kixkikot y kixnimaq'ijun rix aj-Jerusalem. Kan kixkikot k'a rik'in ronojel iwánima.

¹⁵Roma ri Jehová xrelesaj yan ronojel tijoj-poqonal pa qawi'. Kan xeroqotaj yan el konojel ri e etzelanel qichin. Ri Jehová ja rija' ri qa-rey ri k'o pa qanik'ajal roj. Y kan man jun bey chik xtik'oje' rukiy ri ruk'ayewal pa qawi'.

¹⁶Toq xtapon k'a ri q'ij ri' xtubij chiqe roj aj-Jerusalem chi man tiqaxibij-qi', y man qojmayamo-qa.

¹⁷Roma ri Jehová kan k'o pa qanik'ajal roj. Rija' ri k'o ronojel uchuq'a' rik'in, xqojrukol. Roj kan xqojkikot rik'in. Rik'in ri rajowabal xtuya' k'ak'a' quchuq'a'.

¹⁸Chuqa' kan xtibixan k'a rik'in kikoten qoma roj. Yin Jehová kan xtinben chiwe chi xkixkikot achi'el toq niq'ax jun nimaq'ij. Xkixinkol k'a chuwech ronojel k'ixbilal. Roma re' kan jun ejqa'n chiwe rix.

¹⁹Chupan ri q'ij ri' yin xkenk'is konojel ri xetz'ilon iwichin. Kan xkento' ri e kajtajineq kan, y xkenk'en chik pe ri e talutajineq-el. Xtinben chiwe chi xtik'oje' chik iq'ij, y kan utz itzijol xtik'oje' chuwech chijun ruwach'ulew. Y re' pa ruk'exel ri ruk'ixbilal ri xiq'axaj.

²⁰Chupan ri q'ij ri' kan xkixinwelesaj k'a pe akuchi xixuk'uex-wi-el. Kan xtinben chiwe chi xtik'oje' chik iq'ij, y kan xtik'oje' utzilej itzijol chikiwech konojel tinamit ri ek'o chuwech re ruwach'ulew. Re' kan xtibanatej k'a toq yin xkixinwurtisaj chik jun bey. Ja yin Jehová ri yibin.