Read Kaqchikel Hag 1 Bible Online

Hag 1 - Kaqchikel bible

Hag 1

¹K'o k'a jun q'alajirisey ruch'abel ri Dios rubini'an Hageo. Y chupan k'a ri nabey q'ij chire ri ruwaqxaq ik' chire ri ruka'n juna' richin ri q'atbel-tzij richin ri rey Darío, ri Dios xch'on k'a pe rik'in ri Hageo y xuya' jun rutzijol chire richin nubij chire ri q'atoy-tzij pa ruwi' ri ruwach'ulew Judá rubini'an Zorobabel ruk'ajol ri Salatiel, y chire chuqa' ri nimalej sacerdote rubini'an Josué, ruk'ajol ri Josadac.

²Y ri Jehová ri k'o ronojel uchuq'a' pa ruq'a' xubij chire ri Hageo: Ri awinaq nikibij chi man jani napon ruq'ijul chi nipabex chik q'anej jun bey ri wachoch.

³Wakami k'a tak'utuj chire ri tinamit,

⁴wi kan ruk'amon chi rije' ek'o pa taq jebelej jay, rokik ri wachoch yin xa mulumik abej rubanon.

⁵Roma ri' yin Jehová ri k'o ronojel uchuq'a' wik'in ninbij: Tich'obo' jebel wi utz ri yixajin chubanik.

⁶Rix xixtikonej-qa, jak'a xa juba' ok ri xik'ol. Yixwa', jak'a man ninoj ta ri ipan. Yixqumun, jak'a man nik'o ta qa ri chaqi'j-ichi'. Nikusaj itziaq pim, jak'a man yixmeq'e' ta chupan. Y ri nuk'ul rajel chiq'ij, achi'el xa nuk'ul pa jun peqes ri xa teq'el.

⁷Yin Jehová ri k'o ronojel uchuq'a' wik'in ninbij chiwe chi tich'obo' k'a wi utz ri yixajin chubanik.

⁸Kixjote' k'a pa ruwi' ri juyu', y tik'ama-pe ri che' richin nipaba' chik jun bey ri wachoch, roma re' niqa' chinuwech y nuya' nuq'ij.

⁹Rix nikanoj janila, jak'a juba' ok ri niwil; y ri juba' ri nik'en-pe chi'iwachoch, yin ninben chire chi chaq k'ate' nik'is-qa. Y rix nik'utuj achike roma. Y re' kan roma k'a ri wachoch wulatejineq, rokik chi'ijujunal rix xaxe ri nik'atzin chire ri iwachoch rix ri nikanoj.

¹⁰Roma ri', maneq chik job, y ri ulew man xuya' ta pe ri tiko'n.

¹¹Y xinben chi man niwachin ta chik ri k'echelaj, ri juyu', ri itiko'n, ri juwi-uva, ri olivo y ronojel ri nuya' pe ri ruwach'ulew. Y chuqa' man xkixk'iyer ta chik rix, ni ta ri iwawej man xkek'iyer ta chik. Y ronojel ri itiko'n man xtel ta chik pe, nicha' ri Jehová, xcha' ri Hageo.

¹²Jari' toq ri Zorobabel, ri Josué y konojel ri winaqi', xkak'axaj ri ruch'abel ri Jehová ri ki-Dios ri xubij ri Hageo. K'ari' rije' xkik'en rukiy y xkiya' rejqalen ri Jehová.

¹³Jari' toq ri Hageo, xch'on chik rik'in ri tinamit, y xubij ri rubin-pe ri Jehová chire. Xubij k'a chi ri Jehová k'o kik'in.

¹⁴Y rik'in re' ri Jehová xuk'asoj kánima ri Zorobabel, ri Josué y konojel ri winaqi' israelita. Y roma ri' xepe chupan ri q'ij juwineq kaji' chire ri ik' ri', y xkitikeriba' chik q'anej ri rachoch ri Dios.