Read Kaqchikel Hag 2 Bible Online

Hag 2 - Kaqchikel bible

Hag 2

¹Chupan ri q'ij juwineq jun chire ri ruwuq ik' chire ri juna' ri', xch'on chik k'a pe ri Jehová rik'in ri Hageo. Y ri Hageo xubij chike ri winaqi':

²Jare' ri ruch'abel ri Dios ri ninbij chawe rat Zorobabel, q'atoy-tzij pa ruwi' ri Judá, chawe rat Josué nimalej sacerdote, y chiwe rix konojel winaqi'.

³¿K'o kami jun chiwe rix ri xk'oje' wawe' ojer kan, ri tz'eteyon ta re jay re' y ri jebelej rubanik pa rutikeribel? Y ¿achike k'a rubanon ri nitz'et wakami? ¿Man nuk'en ta pe q'axo'n pan iwánima roma la rubanon?

⁴Ri Jehová nubij chiwe rix Zorobabel y ri Josué chi tik'oje' iwuchuq'a'. Y rix winaqi' tikuqer ik'u'x y kixsamej, roma rija' kan nik'oje' iwik'in. Ri Jehová ri k'o ronojel uchuq'a' pa ruq'a' rusujun ronojel re'.

⁵Y re' xusuj chuqa' chike ri qati't-qamama', toq xe'el-pe pan Egipto. Ri Dios nubij chuqa' chi rija' kan k'o pan inik'ajal rix. Roma ri' man nixibij-iwi'.

⁶Roma ri Jehová ri k'o ronojel uchuq'a' pa ruq'a' nubij chi tiwoyobej na juba', roma rija' nuyikiya' ri kaj y ri ruwach'ulew, ri palou y ri tz'iran taq ruwach'ulew.

⁷Rija' xtuben chike konojel winaqi' chi xkebaybot. Jari' k'a toq rije' xtikik'en-pe ronojel ri kibeyomel re wawe', roma richin rija' ronojel ri saqipueq y ri q'anapueq. Y ri ruk'ojlen ri Dios xtunojisaj ri k'ak'a' rachoch. Ri Jehová ri k'o ronojel uchuq'a' pa ruq'a' rusujun ronojel re'.

⁹Ri ruka'n rachoch kan más k'a jebel xtiban chire chuwech ri nabey. Y chupan ri jay ri', rija' xtuya' uxlanibel-k'u'x, nicha' ri Jehová ri k'o ronojel uchuq'a' pa ruq'a', xcha' ri Hageo.

¹⁰Chupan ri q'ij juwineq kaji' chire ri ik' beleje', chupan ri juna' ri', ri Jehová xch'on chik rik'in ri Hageo. Y ri Hageo xubij chike ri winaqi':

¹¹Ri Jehová ri k'o ronojel uchuq'a' pa ruq'a' nuk'utuj chiwe rix sacerdote, pa ruwi' ri rupixa'.

¹²Wi k'o ta jun ri nuk'uaj chupan ri rutziaq, juba' ti'ij ri kan ch'aron chik y ri tzieq ri' chaq k'ate' xik'o-el rik'in jun kaxlan-wey, o jun q'utun chaq'arisan, ri vino, ri aceite, o xabachike na jun chik ri nitij, ronojel re', ¿xke'ok kami ch'aron chuqa'? Y ri sacerdote xkibij chi man keri' ta.

¹³K'ari' ri Hageo xubij chik: Wi k'o ta jun ri man ch'ajch'oj ta roma nuchop jun kamineq, y k'ari' nuchop jun chike ronojel re', ¿xketz'ilobitej kami kan rije'? Y ri sacerdote xkibij chi keri'.

¹⁴Jari' k'a toq ri Hageo xubij: Keri' k'a ibanon rix chuwech ri Jehová. Ronojel ri isamaj y ronojel ri nisuj chire, chuqa' e tz'ilobitajineq.

¹⁵Kixch'obon utz chirij ri ninbij wakami y chirij ri xtibe-apo chiqawech. Toq xich'on iwik'in pa nabey, rokik toq man jani niya-qa ri nabey taq abej chupan ri rachoch ri Jehová,

¹⁶jun chiwe rix niberukanoj wo'o' quintal ixin, jari' k'a toq xaxe ka'i' rik'in nik'aj nril-pe. Y toq napon rik'in ri yitz'bel-uva richin nrelesaj-pe kawineq lajuj kuku' vino, jari' toq xaxe juwineq kuku'*f1* ri nel-pe.

¹⁷Ri Jehová xuya-pe ruyabil ri tiko'n y chuqa' ri saqboch richin xuk'is ronojel ri isamaj rix. Man rik'in ri' man xtzolin ta pe ik'u'x rik'in.

¹⁸Kixch'obon k'a utz chupan re q'ij re', q'ij juwineq kaji' chire ri ik' beleje', roma ja q'ij re' toq xiben-qa ruxe' ri rachoch ri Jehová.

¹⁹Stape' man jun chik k'o chupan ri ik'ujay, y man jani yewachin-pe ri juwi-uva, ri wíkix, ri granado y ri olivo, jak'a re wakami rija' nutikeriba' nuya' chik urtisanik pan iwi', xcha' ri Hageo.

²⁰Chupan ri q'ij juwineq kaji' chire ri ik' ri', xch'on chik jun bey ri Jehová rik'in ri Hageo, y xubij

²¹chi tich'on rik'in ri Zorobabel, ri q'atoy-tzij pa ruwi' ri Judá, y kere' tubij chire: Yin Jehová kan xtinsiloj ri kaj y ri ruwach'ulew.

²²Y xkentek'mayila' ri kitz'uyubal richin q'atbel-tzij ri ajawaren y xtink'is ri kuchuq'a'. Chuqa' xkentek'mayila' ri ki-carruaje e richin labal y ri yejote' chupan. Xkeken k'a ri kikiej y ri achi'a' ri yech'oke' chirij kiej. Chikijujunal xketzaq roma ri ki-espada ri kach'alal.

²³Chupan ri q'ij ri', yin Jehová ri k'o ronojel uchuq'a' wik'in, xkatinjikiba' chi ja rat nusamajel Zorobabel xtaq'et-tzij pa nubi'. Yin Jehová ri k'o ronojel uchuq'a' wik'in kere' ninbij, xcha' ri Dios.