Read Kaqchikel Zac 1 Bible Online

Zac 1 - Kaqchikel bible

Zac 1

¹Ri Jehová xch'on wik'in yin Zacarías, ruk'ajol kan ri Berequías, rumam ri Idó y q'alajirisey ruch'abel ri Dios. Y xuya' jun rutzijol chuwe richin ninbij chike ri nuwinaq. Y re' xbanatej chupan ri ruwaqxaq ik' chire ri ruka'n juna' chire ri q'atbel-tzij richin ri rey Darío.

²Ri ojer kan xyakatej janila woyowal chikij ri ite-itata'. Roma ri' wakami rix titzolej-pe ik'u'x wik'in y yin xkitzolej chik iwik'in.

⁴Roma ri' rix man tikowirisaj-iwi' achi'el xkikowirisaj-ki' rije' toq xban ch'owen kik'in koma ri e nabey q'alajirisey nuch'abel yin Jehová k'iytisanel richin ronojel. Ri q'alajirisanela' ri' xkibij chi titzolej-pe kik'u'x wik'in, y tikiya' kan ri itzel taq bey y ri itzel taq banobel. Jak'a rije' xa xkiben chi man xq'ax ta chikiwech y man xkak'axaj ta ri xinbij chike.

⁵Roma ri' rije' xa xeken yan. Chuqa' xeken ri q'alajirisey nuch'abel.

⁶Ri nuch'abel ri xinbij chike ri nusamajela' e q'alajirisey nuch'abel kan xbanatej kik'in ri ite-itata'. Jak'a toq rije' xtzolej-pe kik'u'x wik'in, xkibij chi yin kan xinben kik'in achi'el ri ruk'amon, roma rije' kan itzel ri kibanobal. Y roma ri' xinben kik'in achi'el ri xinch'ob, xcha' ri Dios.

⁷Toq q'axineq chik oxi' ik', ri Jehová xch'on chik wik'in chupan jun achi'el achik'. Y re' xbanatej chupan ri q'ij juwineq kaji' chire ri ik' Sebat.

⁸Y jare' ri xk'utumej chinuwech pa jun tokoq'a': Xintz'et k'a chi jun achin ch'okol chirij jun kiej keq rij. Y pa'el k'a pa jun taq'aj kojol juyu', chikikojol q'echa'. Y chirij-el rija' ek'o jun tzobaj kiej. Ek'o keq, ek'o k'aqo'j, y seq kij.

⁹Y chiri' chinuxikin, k'o k'a ri ángel richin ri Jehová ri nich'on wik'in. Y yin xink'utuj chire ri achike nel chi tzij ronojel re'. Y ri ángel xubij chi kan xtuq'alajirisaj chinuwech.

¹⁰Jari' toq ri achin ri' xubij chi rije' e taqon-pe roma ri Jehová richin nokinik'oj chijun re ruwach'ulew.

¹¹Y toq ri achi'a' xek'achoj kan chire ri kisamaj, xkibij chire ri achin ri k'o kojol q'echa' chi rije' xkik'is yan rutz'etik chijun ruwach'ulew, y xkitz'et kan chi maneq oyowalen kik'in konojel winaqi', y k'o uxlanen kik'in.

¹²Jari' toq ri ángel xch'on-q'anej rik'in ri Dios y xubij chire: Rat Jehová ri at k'iytisanel richin ronojel, ¿k'a janipe' xtajoyowaj kiwech ri e aj-Jerusalem y ri ch'aqa' chik tinamit richin Judá, ri aya'on-pe ri rutojbalil-mak pa kiwi' oxk'al lajuj juna'?, xcha'.

¹³Ri Jehová kan rik'in k'a ch'uch'uj taq ch'abel xuk'uluba-pe ri ruch'abel.

¹⁴Y xeri' ri ángel xubij chuwe richin chi tinbenya' rutzijol chike ri nuwinaq. Y jare' k'a ri rutzijol: Yin Jehová ri k'o ronojel uchuq'a' wik'in, kan janila nik'o ruwi' yixinwajo' rix winaqi' aj-Jerusalem y chuqa' ri juyu' Sión.

¹⁵Yin woyowal juba' chiwe. Jak'a kan janila xyakatej woyowal chikij ri nima'q taq ajawaren ri kan nikina' chi kan jebel e jikil, roma kan xik'o chik ruwi' ri q'axo'n ri xkiben chiwe.

¹⁶Roma ri', rik'in k'a ri joyowanik xkitzolej chik iwik'in rix aj-Jerusalem. Y xtinben chi xtipabex chik q'anej ri wachoch y ri itinamit. Yin Jehová ri yibin, xcha'.

¹⁷Y chirij ri' ri ángel xubij chik chuqa' chi xtinbenya' rutzijol chi ri Jehová xtiberubana' chik jun bey chike ri nutinamit chi xkebe pa jotol, y chi ri Jerusalem xtok chik rutinamit, y xtuya' chik kuqubabel-k'u'x kik'in ri winaqi' ri ek'o chiri'.

¹⁸Chirij ri' k'o chik k'a xk'utumej chinuwech y xintz'et k'a chi ek'o kaji' uk'a'.

¹⁹Ri ángel k'o wik'in, y roma ri' xink'utuj k'a chire ri achike nel chi tzij re'. Y rija' xubij chuwe chi ri kaji' uk'a' ri' nel chi tzij ri kaji' ruwach'ulew ri xetalun kichin ri tinamit Jerusalem y ri ruwach'ulew Judá y ri Israel.

²⁰Chirij ri' ri Jehová xeruk'ut chik chinuwech e kaji' achi'a' e samajiy taq ch'ich'.

²¹Y yin xink'utuj ri achike nokibana' ri achi'a' ri'. Y rija' xubij chuwe chi ri kaji' uk'a' jari' ri ruwach'ulew ri xetalun-el kichin ri winaqi' aj-Judá, richin chi man chik xtikiyek-q'anej-ki'. Jak'a re e kaji' achi'a' re' e peteneq richin nokiya' nimalej xibinri'il pa kiwi' ri kaji' ruwach'ulew ri', y nokik'isa' roma ja rije' ri xetalun kichin ri aj-Judá.