Read Kaqchikel Zac 10 Bible Online

Zac 10 - Kaqchikel bible

Zac 10

¹Ri Jehová nubij: Tik'utuj k'a job pa ruq'ijul, roma yin kan xtinya' k'a pe sutz' ri kik'uan job, richin keri' xkeraxer ri q'ayis y ri tiko'n ri ek'o pa taq juyu'.

²Ri nikikuquba' kik'u'x kik'in wachibel xa kiyon rije' nikiq'ol-qa-ki'. Y ri nikibananej chi ketaman ri peteneq chiwech xa kan ruyon tz'ukun taq tzij ri yekibij. Nikibij chi k'o xk'utumej chikiwech, jak'a ri achik' ri' xa man jun nik'atzin-wi. Ri kich'abel richin kuqubabel-k'u'x xa man jun rejqalen. Roma ri' ri nuwinaq xkitalula-ki', achi'el nikiben ri tzobaj karne'l ri maneq niyuq'un kichin.

³Roma ri' yin Jehová kan janila xyakatej woyowal chikij ri yuq'unela' ri'. Kan xtinya' k'a rutojbalil-mak pa kiwi'. Pa kik'exel rije', ja yin Jehová ri k'o ronojel uchuq'a' wik'in ri xkiyuq'un kichin ri winaqi' aj-Judá, y kan xtinben chike chi xtikina-ki' achi'el ri kiej ri janila kuchuq'a' richin yebe pa labal.

⁴Chikikojol k'a rije' xke'el-pe e k'iy aj-raqen, ri xke'ok achi'el abej ri achoq pa ruwi' banon qa jun jay, o achi'el simej che' ri nichapo richin ri jay ri banon rik'in tzieq, o achi'el jun rute-ch'ab ri k'o ruchuq'a' ri nikusex pa labal.

⁵Konojel rije' kan e aj-labal ri man jun xibinri'il chikiwech, y xkekixeq' k'a kan ri e etzelanel kichin, achi'el xa ta nikipalibej ri xeq-ulew pa taq bey. Kan xtikiben k'a labal roma yin kan ink'o chikikojol, y kan xkekich'ek ri achi'a' ri yech'oke' chirij kiej.

⁶Roma yin Jehová kan xtinya' k'a kuchuq'a' ri aj-Judá, y kan xkenkol ri aj-Israel. Kan xtinben chike richin xketzolej chik chupan ri kiruwach'ulew, roma kan ninjoyowaj kiwech. Kan xtinben chike chi achi'el xa ta man jun bey xkijech'ej kan ki' wik'in, roma ja yin Jehová ri ki-Dios, y ninwak'axaj ri kich'owen ri nikiben wik'in.

⁷Ri aj-Israel kan xtik'oje' janila kuchuq'a' chupan ri labal. Kan janila k'a xkekikot, achi'el xa ta janila vino ye'ajin chuqumik. Y toq xtikitz'et k'a ri kalk'ual chi yekikot, rije' chuqa' kan xkekikot. Kan junan xkekikot, roma ja yin Jehová.

⁸Toq yin Jehová xkenwoyoj rik'in xubanik, rije' kan xtikimol-ki'. Toq xkenkol, kan janila k'a xkewinaqir achi'el kibanon-pe ojer.

⁹Stape' yin kan xentaluj k'a el pa taq tinamit, pa taq ruwach'ulew ri ek'o nej, jak'a chiri' xkinoqaqa chikik'u'x y k'o k'a jun q'ij xketzolej chik pe junan kik'in ri kalk'ual.

¹⁰Roma ja yin ri xkik'amo-pe kichin k'a kela' pa ruwach'ulew Egipto. Xkenk'en-pe ri ek'o pan Asiria, y xkenk'uaj k'a pa ruwach'ulew Galaad y pa Líbano. Kan e janila chi winaqi', y kan man xkeruben ta k'a ri ruwach'ulew.

¹¹Y toq xtikik'owisaj ri palou richin ruk'ayewal, yin xtinch'ey ri ruwi' ri ya' ri nibolqo't. y kan xtinchaqirisaj k'a ri raqen-ya' Nilo. Chuqa' xtinwulaj ri nimirisanenri'il ri k'o kik'in ri aj-Asiria, y xtink'is ri ruchuq'a' ri ruwach'ulew Egipto.

¹²Yin kan xtinya' k'a kuchuq'a' ri nuwinaq aj-Israel, y kan pa nubi' yin xkebiyin-wi, xcha' ri Jehová.