Read Kaqchikel Zac 11 Bible Online

Zac 11 - Kaqchikel bible

Zac 11

¹Chiri' pa juyu' Líbano ri q'aq' kan xtuk'is ronojel tiox-che' y man jun xtiq'aton richin.

²Xtitz'etetej chi ri k'isis achi'el xkebison, roma ri tiox-che' xa xketzaq, y xa xkek'is ri jebelej taq che'. Xtitz'etetej chi ri tuq ri ek'o pa Basán achi'el xkebison, roma ri janila chi che' xa xkek'is.

³Ri yuq'unela' kan xke'oq' k'a janila, roma ri q'os xa kan xtik'is jumul. Ri koj kan xtiwajin ri ruch'abel, y ri k'echelaj ri ek'o chuchi' ri raqen-ya' Jordán kan xkek'is pa jun bey.

⁴Kere' k'a xubij ri Jehová chuwe: Ke'ayuq'uj ri nuwinaq ri e achi'el taq karne'l ri ek'o richin chi yekamisex.

⁵Ri loq'onela' man xtiqaqa ta rutojbalil pa kiwi' toq yekikamisaj-qa. Y ri xek'ayin-el kichin nikibij-qa: Kan janila nim ruq'ij ri Jehová, roma xojbeyomer kan, yecha-qa. Ni ta k'a ri xyuq'un kichin man nujoyowaj ta k'a kiwech.

⁶Roma ri' man xtinjoyowaj ta kiwech ri nuwinaq. Y xkenjech k'a el pa kiq'a' ri kachpochel y pa kiq'a' ri ki-rey. Kan xtikitoloba' kan ri kiruwach'ulew, y kan man xkenkol ta pa kiq'a', xcha' ri Jehová.

⁷K'ari' yin xenchajij rije' achi'el nuben jun yuq'unel ri nuchajij ri nibeken. Y xinchop k'a ka'i' ch'ame'y: Ri jun xinbij Utzil chire y ri jun chik xinbij Junan Kiwech chire. K'ari' xenyuq'uj rije'.

⁸Pa jun ik' xenwelesaj k'a el oxi' chike ri yuq'unela', roma xkiben chuwe richin xik'o yan nuk'u'x kik'in. Chuqa' ri winaqi' xa kan xinketzelaj.

⁹Y chike ri winaqi' xinbij chi man jun bey chik xkenyuq'uj. Y wi k'o ta jun xtiken chike, kan xtiken k'a. Y wi k'o ta jun xtisach-el, kan xtisach k'a el. Y ri k'a xkek'oje' na kan, kan tikitija-qa-ki' chi kachibil-ki'.

¹⁰Xinchop k'a el ri nuch'ame'y rubini'an Utzil y xinq'ej; re' jun retal chi xyojtej kan ri jikibel-tzij ri xinben kik'in.

¹¹Chupan k'a ri q'ij ri' xa xk'is kan ri jikibel-tzij. Y ri winaqi' in kitzuliben y xq'ax k'a chikiwech chi kan ja ri Jehová ri nibanon chuwe richin chi ninben keri'.

¹²Xinbij k'a chike chi wi xqa' chikiwech re xinben kere', kan kinkitojo' k'a. Jak'a wi man xqa' ta chikiwech, man yinkitoj ta. Y rije' kan xinkitoj k'a xaxe rik'in juwineq lajuj raqen saqipueq.

¹³K'ari' ri Jehová xubij chuwe chi tinbenya' kan ri saqipueq pa rachoch ri akuchi k'o-wi ri rubeyomel,*f2* stape' man k'iy ta ri rajel. Xink'uaj k'a el ri juwineq lajuj raqen saqipueq y xinya' kan pa rachoch ri Jehová.

¹⁴K'ari' xinq'ej ri jun chik ch'ame'y rubini'an Junan Kiwech, y re' retal chi nibek'is ri ach'alalri'il chikikojol ri ruwach'ulew Judá y ri ruwach'ulew Israel.

¹⁵Chirij ri' ri Jehová xubij chik chuwe: Wakami k'a tachapa' chik ch'aqa' ch'ame'y kichin yuq'unela', y tabana' chi at jun yuq'unel ri man nitz'aqet ta ri rusamaj.

¹⁶Roma yin kan xtinya' k'a jun aj-raqen ri nichajin kichin ri nuwinaq, achi'el jun yuq'unel ri man xtiniman ta chike ri karne'l kitalun-ki', ni man xkerukanoj ta ri e sachinaqi', ni man xkeraq'omaj ta ri q'ajineq kaqen, ni man xkeruch'elej ta ri e kosinaqi'. Xa kan xaxe k'a xtutej ri rutijul ri karne'l ri e ti'oj, y ni ta k'a ri ruwi' taq raqen xtuya' kan.

¹⁷Toq'ex k'a ruwech ri itzel yuq'unel toq numalij kan ri tzobaj karne'l. Kan xtiqaqa ta k'a ri espada chirij ri ruq'a', y xtel ta el jun runaq'-ruwech ri k'o pa rijkiq'a', richin keri' xtichaqi'j-qa ri ruq'a' y xtimoyir kan jumul, xcha' ri Dios.