Read Kaqchikel Zac 12 Bible Online

Zac 12 - Kaqchikel bible

Zac 12

¹Ri Dios xuya' chik jun rutzijol chuwe, y jare' ri xubij: Yin Jehová ri xibanon ri kaj y ri ruwach'ulew. Ja yin ri yiya'on ruk'aslen ri wineq.

²Yin xtinben chi roma ri Jerusalem, konojel ri ruwach'ulew ri ek'o chunaqaj xtisach kik'u'x achi'el nikiben ri q'abarela'. Chupan ri q'ij ri' ri Jerusalem xtikisutij-rij, y chuqa' xkeq'ijux ri ch'aqa' chik tinamit richin Judá.

³Y xtinben chike ri ch'aqa' chik ruwach'ulew chi xtikipajk'ij kaqen chirij ri Jerusalem, achi'el xa ta chirij jun nimalej abej. Y konojel ri xtikajo' richin xkeyakatej chirij, yin chuqa' kan xkenwulaj k'a rije'.

⁴Chuqa' xtinben chike chi konojel kiej xtikixibij-ki', y xkench'ujirisaj ri achi'a' ri e ch'okol chikij. Kan xkenchajij k'a ri e aj pa rachoch ri Judá y xkenmoyirisaj konojel kiej kichin ri ch'aqa' chik ruwach'ulew.

⁵Y ri e aj-raqen ri ek'o pa kiwi' ri winaqi' aj-Judá xtikibij-qa pa taq kánima chi yin kan ink'o chikikojol ri ek'o pa Jerusalem, y chi yin ri yiya'on kuchuq'a'.

⁶Chupan k'a ri q'ij ri' xkik'oje' kik'in ri aj-raqen ri' richin xkekik'is konojel ri ajawaren ri ek'o chikinaqaj, achi'el xa ta racheq-q'aq' chukojol si', y achi'el xa ta q'aq' chikikojol boraj trigo. Jak'a ri aj-Jerusalem xkejike' ri akuchi ek'o-wi.

⁷Jak'a yin Jehová, kan xkenkol nabey ri ek'o pa Judá, richin keri' ri kiruwaq'ijaj ri winaqi' aj-Jerusalem y ri rajawaren kan ri David man xtikinimirisaj ta ki' pa kiwi' ri aj-Judá.

⁸Chupan ri q'ij ri' kan xkento' ri aj-Jerusalem ri maneq kuchuq'a', richin xtik'oje' kuchuq'a' achi'el xk'oje' rik'in ri David ojer kan. Y ri rajawaren kan xtik'oje' k'a uchuq'a' rik'in achi'el k'o wik'in yin, y achi'el xa ta ri nu-ángel.

⁹Chuqa' chupan ri q'ij ri', xkenk'is konojel ruwach'ulew ri xkeyakatej chirij ri Jerusalem.

¹⁰Xtinben chike ri e aj pa rachoch kan ri David y ri aj-Jerusalem chi xtipe rayinik kik'in richin yech'on wik'in, y xtik'oje' utzil kik'in. Stape' xkiju' jun kum pa nuch'akul, jak'a kan xkinkitzu' chik jun bey. K'ari' xkebison k'a y xke'oq' k'a woma yin, achi'el xa ta niken jun juney ak'ual.

¹¹Chupan ri q'ij ri' xtibanatej jun nimalej oq'ej pa Jerusalem, achi'el ri oq'ej ri xkiben ri winaqi' aj-Hadad-rimón ri pa taq'aj kojol juyu' richin Meguido.

¹²Chikijujunal ri winaqi' israelita xtikijiq' k'a oq'ej, y ri ixoqi' kiyon xke'oq'. Chuqa' xke'oq' ri e rijatzul kan ri David, ri Natán,

¹³ri Leví, ri Simei, y ri kixjayilal,

¹⁴y ri ch'aqa' chik aj-Israel keri' xtikiben.