Read Kaqchikel Zac 13 Bible Online

Zac 13 - Kaqchikel bible

Zac 13

¹Chupan ri q'ij ri' ri chiri' pa Jerusalem kan xtik'oje' k'a jun achi'el ralaxbal-ya' richin chi chupan ri' xtich'ajch'ojir ri kimak ri e aj pa rachoch kan ri David y konojel ri e aj chiri'.

²Xtinwelesaj ri wachibel ri ek'o chiri', y kan man jun bey chik xkenatex. Chuqa' xkenwelesaj-el ri nikiq'alajirisaj ri kich'abel ri wachibel ri', y keri' chuqa' xkenwelesaj-el ri itzel taq espíritu.

³Y wi k'a k'o ta na jun ri nuben keri', ri rute-rutata' xtikibij chire chi rija' ruk'amon richin niken, roma nubij tz'ukun taq tzij pa nubi' yin. Y toq nich'on, ri rute-rutata' kan xtikichuq'ij pa rupan.

⁴Y xtibek'uluwachitej chi konojel ri e q'alajirisanela' xa kan xkek'ix k'a chi xtikiq'alajirisaj ri xk'utumej chikiwech, y man jun bey chik xtikikusaj sale'y retal chi e q'alajirisanela', y nikitz'uk-tzij chikiwech ri winaqi'.

⁵Xa xtikibij k'a chi xa e samajela' pa juyu'. Xtikibij chi k'a e ak'uala' na toq kichapon-pe ri samaj ri'.

⁶Y wi k'o ta jun nik'utun chike ri achike roma sokotajineq chukojol ruwi' taq kiq'a', rije' xtikibij chi e sokotajineq koma ri kachibil, ncha' ri Dios.

⁷Ri Jehová nubij: Kayakatej k'a rat, espada, kayakatej richin nakamisaj ri nuyuq'unel y wachibil. Richin keri' xketalutej ri karne'l. Y yin chuqa' xkiyakatej chikij ri taq karne'l ri'.

⁸Xtibanatej k'a chi ka'i' chire ri oxi' kan xkenk'is. Jak'a ri jun chire ri oxi' kan xkek'ase' kan.

⁹Y ri xkek'ase' kan, xkenq'axaj pa q'aq', achi'el toq niya'erisex ri saqipueq. Xkentejtobej k'a achi'el nitejtobex ri q'anapueq. K'ari' rije' xtikik'utuj to'onik chuwe, y yin kan xkenwak'axaj. Y chupan ri q'ij ri', xtinbij chike: Nutinamit yin, y rije' xtikibij chuwe: Qa-Dios roj.