Read Kaqchikel Zac 3 Bible Online

Zac 3 - Kaqchikel bible

Zac 3

¹Chirij ri jun achi'el achik' ri' k'o chik jun ri xk'utumej chinuwech: Xintz'et ri nimalej sacerdote rubini'an Josué pa'el chuwech ri ru-ángel ri Jehová. Y ri Satanás k'o-apo pa rijkiq'a' richin nusujuj-apo.

²Jak'a ri ángel xubij chire ri Satanás: Ja ri Jehová xkach'olin. Ja ri Jehová ri kan rucha'on chik ri Jerusalem xkach'olin, re achin re' kan achi'el jun rutza'n si' ri xelesex-pe pa q'aq', xcha'.

³Y ri Josué rukusan jun tzieq tz'il-tz'il.

⁴K'ari' ri ángel xubij chike ri yeto'on richin, chi tikijala' ri rutziaq tz'il ri Josué, y tikiwiqa' rik'in jebelej taq tzieq. Y chire rija' xubij: Ri tz'il atziaq nuk'exewachuj ri amak. Wakami k'a xinwelesaj ri amak, y xkatinwiq rik'in jebelej taq tzieq ri nuk'exewachuj ri ruchojmilal, xcha'.

⁵Chirij ri' xinbij k'a chi tikiya' jun ch'ajch'oj kuchubel-rujolon. Y kan keri' xkiben. Y rokik xbanatej ronojel re', ri ángel richin ri Jehová pa'el k'a apo chiri'.

⁶K'ari' ri ángel ri' xubij chire ri Josué:

⁷Ri Jehová k'iytisanel richin ronojel kere' nubij: Wi rat yabiyin achi'el ninwajo' yin, y wi nataqej ri nupixa' richin ruchojmilal, man xkatinwelesaj ta chupan ri asamaj wawe' pa wachoch. Chuqa' xtachajij ri ruwa-jay richin ri wachoch, y xtinya' k'a q'ij chi xkak'oje' chikikojol ri ángel ri ek'o wawe'.

⁸Wakami k'a, tawak'axaj rat Josué ri at nimalej sacerdote y ri e awachibil. Roma rix kan ix achi'el jun retal richin ronojel ri xtipe, y yin xtink'en-pe ri nusamajel ri xtetamex ruwech chi ja rija' ri xjotayin-pe.

⁹Yin Jehová xtinya' jun abej chawech rat Josué. Y chuwech k'a re abej re' ek'o wuqu' wachaj. Y ja yin ri xkitz'iban chuwech ri abej ri'. Xeri', pa jun q'ij xtinwelesaj ronojel ri mak pa ruwi' re jun ruwach'ulew re'.

¹⁰Toq xtapon ri q'ij ri', rix kan xke'iwoyoj k'a ri iwachpochel, y xtimol-iwi' chuxe' ri juwi-uva y chuxe' ri ruche'el wíkix. Y kan xkixkikot k'a. Yin Jehová k'iytisanel richin ronojel ri yibin, xcha' ri ángel.